5
Nehemiah In Suh Gentheiya Umho Aven
1 Hiche phat laitah hin pasal phabep leh aji teuvin a Judah chanpi ho dounan kiphinna thu ahin samphong tauvin ahi.
2 Ama hon hitin aseiyun ahi, “Keiho hi insung mitamte kahiuve, hijeh chun kaki hinsona diuvin neh le chah ka ngaichat be uvin ahi,” atiuve.
3 Adang hon aseiyun, “Keihon kellhah sunga anneh ka kimuna diuvin ka in ule kalouvu chuleh ka lengpileiyu katungdoh tauvin ahi,” atiuve.
4 Chuleh adang hon aseikit un, “Keihon kai pehna dingin kalouvu leh kalengpileiyu sumpa lahna in katung gam tauvin ahi.
5 Mihao ho insung khat bang’a keiho jong insung khat kahiu ahin, chule ka chateu jong amaho a tobang ahiuve. Ahinla kaki hinso theina diuva kacha teu hi sohchang dinga sum'a ka kijoh gam diu ahitai. Chule keihon ka chanu teu hi kada kachamlou uva kajoh gam'u ahitan alonaje kahe tapouvin ahi, ajeh chu kalou uleh ka lengpilei hou hi mi kom'a katundoh gam'u ahitai,” atiuvin ahi.
6 Hiche alunglhai lou nau thulhuh hi ka jahdoh phat in kalung ahang lheh jengin ahi.
7 Giltah a lunggel kanei jouvin, mithupi ho leh vaihom ho chu kaphoh in, “Nanghon nasopi hou sumpa alahna uva sumthoi nalah uhi nasuh gentheiyu ahi,” katin ahi. Hiti chun keiman hiche thu suhtohna dinga hin mipi kikhopna khat kana gongin ahi.
8 Hiche kikhopna a hin keiman hitin kana seiye, “Eihon isopi Jews te namdang ho kom'a amaho leh amaho ana kijohdoh ho hi nung lhatdoh kitna dinga lung akingaito laitah in nang hon amaho hi sohchang dingin nale johdoh kit tauvin ahi. Chule amaho hi ijatvei lom ilhadoh diu ham?” kati. Chujongleh ama hon akihonna diuvin ima sei ding ahepouvin ahi.
9 Chuin keiman kaseibe kit in, “Na thilbol uhi adihpoi! Imelma nam ho hin einoise louna diuvin I-Pathen’u ginna a hi ikimanchah lou diu ham?
10 Keima tah le kasopi ho chule ka natong hon mipi ho kom'a hi sum le pai chule chang leh mim ho kana hom un ahi, ahinla tubeh hin sumthoi hi lahdau hite.
11 Nanghon alou hou le alengpilei hou, chule olive thinglei jouseu chule a in hou chu tuni tah hin lepeh tauvin. Chule bat dinga sum, chang le mim, lengpitwi le olive thaova konna athoi nalah hou chu nale peh tei-tei diu ahi,” katin ahi.
12 Chule ama hon eidonbut un, “Keihon mipi ho chu lepeh sohkei uving ting chule amahoa kon'in imacha ngeh tapou vinge, keihon nasei bang-bang’a chu kabol diu ahitai,” atiuve. Hijou chun keiman thempuho le mithupi ho chule vaihom ho chu kakouvin akitepnau banga atohdoh teina diuvin kaki hahsel sah un ahi.
13 Chuphat in keiman ka ponchol chu kathingin kasei tai, “Nakitep nau dungjuiya chu nabol louvu leh na insung’u leh na thilkeu houva kon'in nathing lhauhen!” kati.
Chule khoppi pumpin eidonbut uvin, “Amen,” atiuvin Pakai athangvah un ahi. Chule mipi ho chun akitep nau bang bangin atongdoh tauvin ahi.
14 Hiti hin kumsom le ni sungin Judah gamvaipo in kapangin chule Artaxerxes leng chan kal kum somni a pat kum som thum le ni chan gei, kei kahin kanoiya vaipo ho ahin katoh nau dinmun dungjuiya kachan ding dol’u chanvou chu kala pouve.
15 Gamvaipo masa hon vang mipi ho pohgih nasa tah ana pohsah un, dangka shekel som li kalval in mipi lah a neh le chah chule lengpitwi ana kidon jiuvin ahi. Chule alhacha uva pangte ho jeng jong mipi chunga ana kinomsah jiuvin ahinlah keiman Pathen kagin jeh in hiti chun kana bol pon ahi.
16 Keima tah jengin jong pal semna a hin lunglut tah in na katongin chule gam leiset lamdoh ding jong kana gelpoi. Chule kalhacha ho jeng jong hiche pal semna ahin kana mangcha sohkeijin ahi.
17 Gamchom-chom'a kon'a kholjin hungji ho tilouvin jong Judah miho vaihom ho mi 150 hi thon louvin anneh kakhang jingjin ahivangin keiman ima kana ngeh pon ahi.
18 Niseh a keiman neh le chah a kato doh jing chu bongchal khat, kelngoi ahilou le kelcha gup ahcha tampi ahi jinge. Chule nisom seh leh don ding lengpitwi suhneng jing angaiyin ahi. Ahi jeng vang'in keiman gamvaipo kahina a eikipe neh le chah kachan ding dol chu kangeh deh poi, ajeh chu mipi hon pohgih apohkhop set sau ahi.
19 Vo ka Pathen, keima hiche mite dinga thil hijat kabol hi nei geldoh peh inlang hiche jeh hin phatthei neiboh in.