6
Kulbang Kisapha Adouhon Adou Jing'u
1 Ka melma teu Sanballat, Tobiah, Geshem kiti Arab mipa le midang hon, kotpi chengse le kelkot ho ka tundoh loulai vangun, Jerusalem pal chu akigen chaiyin avanglai mun khatcha aum tapoi ti amudoh phat un;
2 Sanballat le Geshem in Ono phaicham a khokhat a kimuto dingin thu eihin thot lhonin ahi.
Ahinlah amani hin keima chunga thilse agon lhon ahi chu keiman kahen ahi.
3 Hijeh chun keiman adonbutna in thu hiti hin kathot in ahi, “Keiman natoh lentah khat katoh ahi, hijeh hin hung thei ponge, nangni toh kimuto ding gunsetna iti kanatoh kangah thei ding ham?” kati.
4 Hitobang hin amanin livei jen thu eihin thot lhon'in ken jong ka donbut ngai ngaiyin ka donbut in ahi.
5 Angavei channan Sanballat in alhachapa ka kom'ah ahin sol'in akhut ah hondohsa lekhathot khat ahin choiye.
6 Hiche achun hitin aseiye,
“Hiche vella um nam mite lah a hin thu kithang khat akijan, Geshem in jong hichu adih ahi ati, hichu ahileh nang leh Judah te hin lengpa dounan galbol ding agon ahi, hiche jeh a hi pal nasem phat u ahi ti thukithang dungjuiya nang hi leng chang dinga kigong nahi,” akiti.
7 Aman athupoh dungjuijin nang hin Jerusalem a nangma chung chang phongdoh dingin themgao ho jong apansah in, 'Veuvin! Judah gam'ah leng khat aumtai!'
“Hiche thu kithang hi lengpa kom'a athu hi gale lhun tei ding ahi ti nahet ding doltah ahi, hijeh chun hungin lang hiche thu hi seikhom hite,” akiti.
8 Hichun keiman lethuhna kapen, “Nahin thusei chu khatcha adih aumpoi, aboncha chu nangin nabol thu ngen ahi bouve,” kati.
9 Amaho hin suh kichat a chule keiho hi lunglhah sah ding chule ka natoh uhi suhtang ding atiu ahi. Hijeh chun keiman natoh chu gut tah in kamano jon ahi.
10 Khonungin, Mehetabel tupa Delaiah chapa Shemaiah chu a inmun'a aumna a kaga chen kaga kimupi in ahi. Hichun aman hitin aseiye, “Eiho Pathen Hou-In sunga kimutou hitin kot kikha khum uhite, chule na melma ten tujan a hi nahung tha diu ahi,” ati.
11 Ahinla keiman ka donbut in, “Koiham kei dinmun'a dinga kichat jeh a jam ding'ah? Chule koiham kei dinmun'a dinga ahinkho kihuhdohna dinga Hou-In sunga kisel ding'ah? Ahipoi hitia chu kaum louding ahi,” kati.
12 Pathen'in ama kom'a chun thu aseipoi ti kahei, aman hiche gaothu chu Tobiah leh Sanballat in achohdoh lhon a aseisah lhon ahi bouve ti kahet ahi.
13 Ama hon kichat sah a chule chonset sah ding eigot lhon ahi bouve. Hiteng chuleh oimoa thepmo sah ding eigot lhon ahi.
14 Vo Ka Pathen, Tobiah leh Sanballat thilse bol ho pihi hin geldoh in. Chuleh keima kichat sah tei ding eigoa themgaonu Noadiah le themgao dang ho jouse jong hi hin geldoh in.
Natong Hon Kulbang Ajo U
15 Hiti chun Ellha nisim 2 channi, pal kasah patni uva pat nisomnga le ni nin pal chu kagen chai tauvin ahi.
16 Ka melma hou le avel a cheng mite hon ajahdoh phat un akicha lheh jengun jum akisa lheh jengun ahi. Hiche hi Pathen panpina jal a atohdoh jouvu ahi ti ama hon ahedoh tauvin ahi.
17 Hiche nisomnga le ni sung hin Tobiah leh Judah mithupi ho kikah a hin lekhathot tamtah akithotto le-le jengun ahi.
18 Ajeh chu Judah gam'a mi tamtah in ama kom'a hi kihahsel a kihen ohna ana neiju ahi. Ipi jeh inem itileh ama hi Arab chapa Shecaniah tupa ahin, chujongleh achapa Jehohanan chun Berekiah chapa Meshullam chanu chu akipuiya akichenpi ahi.
19 Hijeh chun mihon kei kom'a ama thilpha bol jeng aseiyun, kei thusei jouse jong ama henga alhut jiuvin ahi. Chule Tobiah hin keima suh kichat teina dingin lekha eihin thot jingin ahi.