8
1 Mipiho chu abonchauvin Twi Kelkot a chun lunggel khat neiyin ahung kikhom un ahi. Hichun ama hon Ezra kom'a Pathen'in Israel te nit dinga anapeh Mose Danbu chu ahin pohdoh dingin angeh tauve.
2 Hiti chun Ellha nisim 8 nin Ezra thempu pan jong hiche Danbu hi numei le pasal chuleh chapang thu hethei jouse dingin ahin podoh tan ahi.
3 Aman Twi Kelkot phung sung aningkoi laiya chun jingkah apat sunkim geijin mipi ho jouse hetthei dingin ahin simdoh in ahi. Chule mijousen Danbu asimdoh ho chu angai sohkei uvin ahi.
4 Ezra chu hiche ding monga kisem thingpeh kidosang mun'a chun adingin ahi. Ama jetlam'a chun Mattithiah, Shema, Anaiah, Uriah, Hilkiah chule Maasseiah ana dingun ahi. Chule aveilama chun Pedaiah, Mishael, Malkijah, Hashum, Hashbaddanah, Zechariah, chule Meshullam ana dingun ahi.
5 Ezra chu mipi hon amu sohkeina diuvin mun sanglai ah adingin ahi.
6 Hiti chun Ezra in Pakai, Pathen thupitah chu thangvahna apen ahileh mipi ho chun akhut u ana dom sangun, “Amen! Amen!” atiuvin ahi. Hijeh chun tollah abohkhup un Pakai chibai aboh un ahi.
7 Mipiho chu adinmun cheh a adingun, Levi te lah a kon'in Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan chule Pelaiah chun danthu chu mipi ho ahil'un ahi.
8 Ama hon Pathen Danbua kon'in asimdoh un, abih bih in mipi ho hetthei tah dingin hilchetna aneiyun ahi.
9 Hiche jou chun gamvaipo Nehemiah, Ezra thempupa le danthu thempa chule mipi hilla pang Levi te chutoh akikhom uvin mipi ho jah a chun aseiyun, “Tuni hi Pakai na Pathen’u maiya nikho theng ahi, lunghem hih un kap jong kap hih un!” atiuve. Ajeh chu Dan thucheng ho chu ajah phat uva mipi chu kapgam jengu ahitai.
10 Chuleh Nehemiah chun aseiben, “Cheuvin lang an tui tah-tah ganeuvin lang donthei atui tah-tah gadon'un kipa thanop gabol un. Anei joulou ho jong chu nachan’u gachan khompi uvin, ajeh chu tuni hi Pakaiya nikho theng ahi. Lungthoina nei hih un, lung khamna jong nei hih un, ajeh chu Pakaiya nakipa nau hi na thahat nau ahi,” ati.
11 Levi ten jong mipite chu alhamon’un, “Thipbeh in um’un, kap hih un ajeh chu tuni hi nikho theng ahi,” atiuve.
12 Hiti chun mipite chu golvah an neding leh don dingin anei joulou ho panhu ding leh kipah tah a ankong um dingin apotdoh tauve, ajeh chu ama hon Pathen thucheng aja tauvin ahi.
Lhambuh Kut
13 Ajing nikho in mipi ho lah a lamkai ho leh thempu ho, Levi ho acheuvin Danthu them Ezra chu danthu hilchetbe dingin aga tem’un ahi.
14 Dan chu akholchilbe phat un Pathen'in Mose mangcha a athupeh dungjuiya hiche lhasunga kut kibol sunga chu Israel lhambuh sunga um diu ahi ti amudoh un ahi.
15 Hiche hi ama hon aphondoh uva akhodung jouseu leh Jerusalem khopi sunga aphondoh diu ahin, “Potdoh uvin lang mol le lhang tinna cheuvin, Olive thingbah ho hijongleh, thaimi vom do ho hihen lang, tumthing do ho hijongleh thingna do adang-dang hijongleh hiche Lhambuh Kut bolna dingin hin polut uvin tia kisun ahi,” tia aphondoh diu amudoh tauve.
16 Hijeh chun mipi chu apotdoh uvin akisei chengse chu ahin polut sohkei uvin, abonchauvin Lhambuh Kut chu abolcheh uvin, a inchung cheh leh alhonglai dung cheh u chule Pathen Hou-In lhong dunga chun abol uvin, Twi Kelkot le Ephraim Kelkot phunga jong abol abol sohkei uve.
17 Hitobang tah hin soh channa a konna hung kile kit miho chun Lhambuh Kut abol uvin, chule lhambuh jenga acheng uve, ijeh-inem itileh Nun chapa nikho laiya pat hiche nikho geiya hi Israel chaten hitobanga hi anabol khahlou laiyu ahi. Hiche a hin kipa thanopna lentah anaum doh in ahiye.
18 Hiche kut nisagi sung hin niseh le Ezra in Pathen Danbua kon'in asimdoh jingin ahi. Chujouvin aniget channi in danthu dungjuijin khoppi thupitah ana bol'un ahi.