9
Mipin Achonset Nau Aphon'u
1 Ellha nisim 30 nin, mipi akikhom kit un, tuchung hin an angol’un khaodip pon asil’un, aluchung uva vut akinu uvin ahi.
2 Israel chilhah ho jouse gamchom miho a kon'in akidalse uvin chule amaho chonsetna le apu apa teu chonsetna aphongdoh tauvin ahi.
3 Pakai a Pathen'u Danbu a konna akisim phong tengleh, nidan thum sungin adinnau mun'ah ading chah kheh jiuvin ahi. Chujou tengleh nidan thum ma achonset nau phondohna le Pakai a Pathen’u chibai bohnan amangun ahi.
4 Levi te—Jeshua, Bani, Kadmiel, Shebaniah, Bunni, Sherebiah, Bani, chuleh Kenani—hicheng hi Levi te kalbia adingun Pakai a Pathen u kom’ah othong sangtah in asamun apentho jengun ahi.
5 Chujou chun Levi te lamkaiho—Joshua, Kadmiel, Bani, Hashabneiah, Sherebiah, Sherebiah, Hodiah, Shebaniah, chule Pethahiah chun mipi ho chu ahin sam'un, hiti hin ajah uvah ahinsei tauve: “Dingdoh uvin lang Pakai na Pathen’u thangvah un, ajeh chu ama tonsot-tonsot a hingjing jeng ahi,” atiuve. Hijou chun amaho ataovun,
“Namin loupi hi vahchoiyin umhen! Phatthei bohna le thangvahna ho jouse chunga choisangin umhen!
6 “Nangma changseh bou Pakai nahi. Nangin vanho leh vanthamjol chuleh ahsi jouse nasem ahi. Nangin leiset le twikhanglen chuleh asunga umho jouse nasem ahi. Nangin aboncha a hi nahoibit ahin van'a vantil te jousen chibai naboh un ahi.
7 “Nangma hi Pakai Pathen nahin Ur gam'a um Chaldea mite lah a konna Abram na-na lhendoh a nahin puidoh a, amin jong Abraham a nakhel peh ahi.
8 Aman kitahna ana suh bulhit jeh in Canaan mite, Hit mite, Amor mite, Periz mite, Jebus mite, chule Gargash mite gam hi ama leh achilhah te peh dingin kitepna na-na neipi in ahi. Chuleh nangin na kitepna bangin na-na tongdoh in ahi. Ajeh chu nangma hi aseidohsa thuchenga kitah jing jenga nahi.
9 “Nangin kapu kapa teu Egypt gam'a aum laiyuva agenthei nau na-na mupeh in, chuleh twikhanglen panga akanau na ngaipeh in ahi.
10 Hiti chun kapu kapa teu anabol genthei jeh un nangman Pharaoh leh avaihomho chuleh amipite dounan melchihna thil kidang tah-tah na-na boldoh in ahi.
11 Nangman twikhanglen chu na-na homkhen in namite tolgoa lam na-na jotsah in ahi. Chule nangman agalmi teu chu twikhanglen sunga na-na lehlut in ahi. Chujongleh amaho chu twipi noilanga song bangin ana lhummang jengun ahi.
12 Nangman kapu kapa teu chu sun tengleh meilom in na-na puiyin, jan tengleh meikong lomin na-na puiyin, alampi diu na-na musah jingin ahi.
13 “Chule nangma Sinai Molsang chunga nahung kumlhan chuleh van'a kon'in nahin seiyin ahi, chena dan le thuhil dih tah-tah na-na pen chuleh thupeh leh thugahna hoi tah-tah na-na pen ahi.”
14 Chule nangman na cholngah nitheng chung chang hilchetna jong na-na pen chule nangman na lhachapa Mose mangchan na thupeh ho le na thugahna chuleh na thuhil ho anit diuvin na-na seipeh in ahi.
15 “Chuti chun amaho agil’u akel tengleh van'a kon'in changlhah na-na pen; adangchah teng ule songpia kon'in twi napen ahi. Nangin peh dinga na-na teppeh gamho alokhum diuvin thupeh jong na-na pen ahi.
16 “Ahinlah kapu kapa teu chu ana kiletsah un chuleh ana louchal’un ahi, chuleh na thupeh chu ana nahsah pouvin ahi.
17 Amaho na thua nun ding ana nom pouvin, chuleh amaho dinga thil kidang na-na bolpeh ho ana geldohji tapouvin ahi. Chusangin alouchal’un Egypt a asoh channa lang uva lepuikit dingin lamkai ana kilhen doh un ahi! Ahiyeng vang'in nangma hi mi ngaidam hat, milungset them le mikhoto them, lunghang vah lou chuleh ngailutna dimset Pathen nahin
18 ama hon bongnou tobang milim semthu ana kisemdoh uva chuleh hitia ana seiyuva, hiche hi na Pathen’u Egypt a konna nahin puidoh pau chu ahi anati uvin, hitobang tah hin Pathen taitomna chu ana nei tauvin ahi.
19 “Ahiyeng vang'in na mikhotona alet jeh in nangin gamthip gam'a chun na-na dalha pon ahi. Sun tengleh meilom in napuiyin, jan tengleh mei kongin napui jing nalaiyin ahi.
20 Na phatna Lhagao chu mangchan na-na hil jing nalaiyin, agilkel teng ule aneh diuvin van'a kon'in manna napen adangchah tengule adon diu twi nape jingin ahi.
21 Kum somli sungin gamthip noiya na-na khoukhah in, chuleh imacha lhahsamna ana tohkha pouvin ahi. Aponsil’u jong asepon chuleh akengu jong ana napon ahi!
22 “Chutengleh nangin kapu kapa teu chu lenggam ho leh namdang ho chunga galjona na-na pen chuleh na mite hi gamsung ningkoi jousea na-na koiyin ahi. Ama hon Heshbon Lengpa Sihon toh Bashan Lengpa Og gam jong anala uvin ahi.”
23 “Nangman achilhah teu chu ahsi jat naphah sah in apu apa teu na-na teppeh agama chun napuilut in ahi.
24 “Amaho analut un agam'u ana lahpeh un ahi. Chule nangman nam pumpi amasang uva na-na sunem in ahi. Chule gamsunga ana cheng Canaan mite jeng jong thaneilou bangin na-na lhan ahi! Hiti chun na miten hiche nam ho hi aleng teu pumin anop-nop analo tauvin ahi.
25 Kapu kapa teuvin kulpi kigen khum akhopi ho ahin, agam phalai jouseu ahin, ana lahpeh un ahi. Chule thil le lo pha tah-tah dimset in ho jong atou phauvin, twikul kigeihomsa ho leh lengpilei chuleh oIive thinglei le theiphung tamtah alahpeh un ahi. Hiti chun ama hon lungnachim set in athaodoh tokah seuvin aneuvin na phatthei bohna lhingset a ana kivah un ahi.
26 “Ahiyeng vang'in amaho ana louchal’un, chuleh nangma dounan ana kiphin nalai uvin ahi. Chule na danthu ana nungsun’un, na themgao ten na henga hung kile dinga ana gihsal jeh un ana that gam’un, chule nangma dounan thet um tah-tah thil anabol tauvin ahi.
27 Hijeh chun nangman agal miteu kom'a na-na pedohjin, ama hon ana sugenthei jiuvin ahi. Ahivangin ama hon athohgim uva nakom'a ahung tao teng ule nangman van'a kon'in ataonau na ngaipeh kit jin; chule na mikhotona jal’in nangin ahuhdoh diu na solpeh kitjin, ama hon agalmi uva kon'in aga huhdoh jiuvin ahi.
28 “Ahinlah ama hon olna ahinmu phat-phat ule avelin nangma mitmun thilse ahin bolkit jiuvin, chuleh nangin agalmi hou noiyah nasunem kit jin ahi. Ahiyeng vang'in ama hon kap pum-puma panpi ngaicha a nangma kom ahinbel tengule van'a kon'in ataonau nahin sanpeh kitjin ahi. Chuti chun na mikhotona kidangtah jal'in nangin avel vel'in na huhdoh kit jin ahi.
29 “Nangman na danthua ahung kilehei kitna diuvin na gihsal jin ahinla amaho akiletsah un, alouchal’un, nathupeh anahsahmo jiuvin ahi. Chule na danthu ho hi ajui uleh ahindoh jeng theina diu jong ajuinom pouvin ahi. Amaho alouchal’un nangma na nungngat un nathu angainom pouvin ahi.
30 Na mingailutna jal’in kum hijatpi hi nahin khongaiyin ahi. Chule nangman na Lhagao nahin sol in, aman themgao ho mangchan agihsal sahjin ahi. Ahinla ama hon anahsah deh jipouve! Hijeh chun nangman agamsung miho khut a gal nalelsah jin ahi.
31 Ahinlah na mikhotona anat sat jeh in amaho chu na sumangpai dehpon chule na donda dehpon ahi. Itobanga lungset them leh khoto them nahi hitam!
32 “Tunvang, ka Pathen’u loupi tah leh thahat tah chuleh gimneitah ami ngailutna longlou puma akitepna nit jing Pathen, ka thohgim nau hi nahsah mon neikoi peh hihbeh un. Ajeh chu Assyria lengten eichotpha uva pat tuni geihin keiho le ka lengteu, kalamkai teu, ka thempu teu, le kapu kapa teu, namite ho jouse chunga hin hahsatna nasatah achutan ahi.
33 Nei engbol chan’un nangma hi nadih jinge, chule keiho ka chonset val jeh uvin nangman kachan diuva kilom bep neipeh jiu ahi.
34 Kaleng teu, ka lamkai teu, ka thempu teu, kapu kapa teuvin na dan anit pouvin, na dan thupeh leh na gihsalna jong anahsah pouvin ahi.
35 Ama hon lenggam tum aneiyun, nangman na phatna ho na bohlhah khum vangun ama hon nangma najen pouve. Chule nangman gam phatah leh gam lentah napen ahinlah ama ho athilse bolna uva kon'in ahung kilehei nom deh pouve.
36 “Hijeh chun tunikho hin, nangin kapu kapa teuvin nengtah le lungmong tah a aneh diu gam phatah na pehna mun'a hin sohchangin kaum tauve! Hiche gampha laitah a hin kasoh chang tauve.
37 Ka chonset jeh uvin hiche gamsung sohdoh gapha tah-tah ho hi nangin keiho chunga vaihom dinga natun lengho khut ah achugam tan ahi. Chule ama hon keiho chungleh ka gancha hou chunga tha anei tauve. Chujongleh ama hon adei deijin eimangcha uvin keiho ka genthei lheh jeng tauve,” atiuvin ahi.
Thungai Dia Anop U
38 Hichun mipi hon adonbut un, “Hiche chung changa hin keihon kitepna giltah kaneiyun, hichu ka jihlut un ahi. Hiche mohor kinam khum thulhuhna lekha chunga hin ka lamkai teu, Levi te, chuleh ka thempu hou min achongin ahi,” atiuvin ahi.