1 Chuti chun Pakaiyin Mose henga aseijin, 2 “Israel mite jouse thalhengin Midian mite chunga phulahna neijin ajeh chu alim semthu u houvin apuilut tauve. Chujou teng, nangma nathi ding chule napu napa te lah a najao ding ahitai,” ati.

3 Chuin Mose’n mipi ho henga aseijin, mi phabep lhengdoh un, chule Midian mite chunga phulahna Pakai galsat dingin galvonin vonun. 4 Israel phung ho a konin mi 1000 cheh galmun'a asol uvin, ati. 5 Chuti chun Israel phung sung’a kon mi 1000 cheh alhengdoh tauvin, abonchan mi 12,000 galmun'a din gontup ahitai. 6 Chuti chun Mose'n aphungkhai a mi 1000 cheh chu asoldoh tan, chule Eleazar thempu pa chapa Phinehas in galmun'a alamkai uve. Amahon muntheng a thilkeo ho akichoiyun chule mutging dingin sumkon ho jong akiken'un ahi. 7 Pakaiyin Mose athupeh bang chun amahon Midian mite chu alonvuh uvin, pasal jouse athat tauvin ahi. 8 Midian mite leng nga ho — Evi, Rekem, Zur, Hur, chule Reba—galmun achun athi tauve. Amahon Beor chapa Balaam jong chemjam in athat un ahi.

9 Hiti chun Israel miten Midian numei le chapang ho chu ahin pui tauvin, a gancha hou ahin, athilkeo jouse’u abonchan ahin chom gamhel tauve. 10 Midian mite chenna khopiho le kho jouse abonchan ahalvam tauvin ahi. 11 Gal a achom jouseu, mihem hihen gancha hijongleh asuhkhom nungun, 12 abonchan Mose le Eleazer thempupa, Israel chate khopi pumpi, Moab phaicham, Jordan vadung pang, Jericho a ngahmun asemna uva chun abonchauvin ahin kai sohkei tauvin ahi. 13 Mose leh Eleazer thempupa chule khopi sunga lamkai jouse chu polama ache tauvin, amaho chutoh aga kimuto tauve. 14 Ahin Mose chu galmun a konna hung kile aja ja chunga thunei lamkai ho chunga chun alunghang tan ahi. 15 “Ipi dinga numei jouse na hinghoi uham?” tin angeh in ahi. 16 Hiche numei ho jeh leh Balaam thuhil jeh a Peor chung chang thu’a Israel chate jouse Pakai adia thet umtah a ana chon ahiuvin, hiche jeh chun Pakai mite chunga gamna hoise ana lansah ahi. ✡ 17 Hijeh chun tun pasal chapang jouse le numei hija pasal toh ana kitimat sa jouse jong that jeng tauvin. 18 Numei chapang pasal toh kitimat khaloulai chengse chu nangho dingin hing hoiyun. 19 Chule nangho jouse lah a gal a mithat ahin, mithi tongkha chan chu, ngahmun polam a nisagi sung naum diu ahi. Nangho jouse na hiuvin, gal hinga nahin kai jouseu nithum lhinni le nisagi lhinnia na kisuhtheng sohkei diu ahi. 20 Na ponsil u, kelvun a kisem ahin, savun a kisem, chule thing them a konna kisem manchah jouse aboncha na suhtheng sohkei diu ahi. 21 Eleazer thempu pan galsat akon ho henga aseijin, “Pakaiyin Mose a thupeh sa danthu a kisem chondan chu apen: 22 Sana, dangka, sum eng, chule hahngeh jaona a kisem jouse— 23 thih hiya meijin akahvam theilou chengse chu meiya naleo diu chuteng athenga nasim bep diu ahiye. Chule twiya nasop kit diu ahi. 24 Nisagi lhinni tengleh na ponsil jouseu nasop uva na kisuhtheng diu ahi. Chujou lebou ngahmun a nakile bep diu ahi,” ati.

25 Pakaiyin Mose henga hiti hin a seipeh in, 26 “Nang leh Eleazer thempu chule phung jousea insung lamkai hon gal hinga nahin puiyu mihem ho leh gancha ho jouse abonchan simtoh tem’un. 27 Chuteng galsatna a konna kichomdoh thil ho chu hopni naso diu, akehkhat chu galsat miho napeh dingu chule akehkhat chu mipi napeh diu ahi. 28 Galsat miho chan a kon chun, amasan thil kichom ho chu Pakai dingin mihem ahin, bongchal ahin, sangan ahin, kelngoi ahin 500 lah a khat cheh napeh dingu ahi. 29 Galsat sepai ho chan lah a akehkhat chu Pakaiya kilhaina dinga Eleazar thempu napeh diu ahi. 30 Israel chate jouse chan ding lah a konna somnga lah a khat chu mihem ahin, sangan ahin, kelcha ahin, kelngoi ahin, chule gancha dang hijongleh na lahdoh ding ahi. Hichengse chu Pakai Houbuh kinbolna mun’a natong Levi mite nahop diu ahiye. 31 Chuti chun Pakai thupeh bang chun Mose leh Eleazer thempu pan jong abol lhon tan ahi.

32 Gal mun'a kon galsat mihon ahin chomdoh u gal thil jouse chu agomin, kelcha le kelngoi 675,000, 33 bong 72,000, 34 Sangan 61,000 35 chule nungah theng 32,000 ahi.

36 Gal a kichomdoh akehkhat chu galkon sepai achangun ahi. Agom'in kelcha le kelngoi 337,500 ahin, 37 hiche ho lah a 675 chu Pakaiya din apeuvin, 38 bong 36,000 lah a 72 chu Pakaiya din apeuvin; 39 sangan 30,500 lah a 61 chu Pakaiya din apeuvin, 40 chule nungah theng 16,000 lah a 32 chu Pakaiya din apeuvin ahi. 41 Pakaiyin athupeh bang chun, Mose chun Pakai dinga athilto chu Eleazer thempupa henga abonchan apedoh tan ahi.

42 Gal a kichom galsat miho chan le Israel chate chan akon akeh khat cheh chu Mose’n achom'a akoidoh in ahi. 43 Agom gom'in kelcha le kelngoi 337,500, 44 bong 36,000, 45 sangan 30,500 46 chu nungah theng 16,000 ahi. 47 Chan akehkhat Israel chate chan akon chun mihem ahin ganchalah akon hileh somnga lah a khat cheh alheng doh in, hichengse chu Pakai Houbuh a lhacha a pang Levi mite ho chu apen ahi. Hiche ho jouse hi Pakaijin athupeh banga Mosen abol ahi.

48 Chuti chun asang sang chunga vaihom thuneiya pang, aja ja chunga vaihomma pang ho chu Mose henga ahungun, 49 chule aseiyun, “Na lhacha a pang, keihon, ka thuneina noi uva um galsat miho abonchan ka sim toh sohkei un, mihem khat jeng cha jong kalah uva alhasam le amang thai aumpoi!. 50 Pakai ding’a thilto chu keihon mihem ama ama kipehdohna cheh in, sana kol a kisem chaokol ahin, chao jang, mohor numna khut jem, bilba ho, khi vui ho, hichengse a kon'in Pakai angsunga keiho kithoidamna dingin kahin choi tauve. Hiche hin kahinkhou Pakai anga asuhtheng a chule midih a eisem diu ahi,” atiuvin ahi.

51 Chuin Mose leh Eleazer thempu pan galsat lamkai hon ahin choi thil le lo jouse chu asang lhon tan ahi. 52 Agomin, galsat lamkai hon Pakaiya atodoh u chu pound 420 ahi. 53 Galkon sepai jouse gal thil kichom themkhat chu ama ama chan dingin akilah sohkeiyun ahi. 54 Chuin Mose leh Eleazer chun asang le aja chunga galsat lamkai ho a kon chun sana tampi chu asang lhonin Israel mite hi Pakaiya kon ahi bouve ti geldoh a aum jing na diuvin Houbuh sung lam achun ahin choilut lhon tan ahi.