32
Jordan Solam’a Phung Ho
1 Reuben leh Gad chilhah ten bong hon tampi anavul un ahi. Chuin Jazer gam leh Gilead gam amudoh tauvin ahile, hiche mun chu bong honte vahna ding’a kilem tah asohdoh tan,
2 Mose leh Eleazer thempupa leh khoppi lamkai ho jouse hengah ahungun ahi. Amahon aseiyun,
3 Ataroth, Dibon, Jazer, Nimrah, Hershbon, Elealeh, Sibmah, Nebo chule Beon khopi ho hi
4 Pakaiyin Israel te dia ana lah ahin, chule hiche gamsung chu ka gancha teu vahna dingin apha lheh e.
5 Namitmu a lunglhaina ka chan uva ahile, Jordan gal lam'a gam neipeh sangun hiche gamsung hi nalhacha keiho chanvou in neisem peh tauvin,” atiuvin ahi.
6 Mose’n jong Gad leh Reuben chate henga aseijin, “Jordan gal a na sopi teu galsat khoh laitah a hi nanghon um den ding na lhen joh diu ham?
7 Pakaijin apeh hiche gamsung galkaiya galsat nasopiu Israel mite chu ipi dinga nasuh thaset got uham?
8 Kadesh Barnea apat gam velhi dinga kasol uchun napu napa teuvin tunia nabol'u bang hi ana bol'un ahi.
9 Eshcol phaicham alhun uva Pakaiyin Israel chate apehna gamsung alut diu chun Israel mipi ho chu ana lungthoi sah uvin ahi.
10 Chuti chun achung uva nasatah in Pakai alunghang in chule akihahsel in,
11 'Egypt gamsung’a konna hung potdoh kum somni a lhah chunglam sen Abraham, Isaac leh Jacob henga ka kitepnasa gamsung chu amu louhel diu ahi, ajeh chu ama hon alungthim pumpiuvin eijabol pouvin ahi.
12 Amaho tailouva Ken mi Jephunneh chapa Caleb leh Nun chapa Joshua bouvin alungthim pumpin Pakai ajui lhonin ahi.'
13 Israel chung’a Pakai alunghang jeng tan ahile, chuin Israel mite hiche khang mite ho chu Pakai mitmua thilse bol jouse athigam kahsen kum som li sung in gamthip noiya avale sah tan ahi.
14 Nangho jong napu napate hou a konna chonsetna chun nahin jui peh tauvin! Hijeh chun Israel mite chunga Pakai lunghanna chu asangjo cheh a lunghan sah ding nagel uve.
15 Chule Pakai nung najuina uva konna na kiheimang hel uva ahile, aman hiche mite ho hi gamthip noiya don louva ahin koi ding, chuteng hiche mite ho chunga hi manthahna alhunsah teitei ding ahitai! ati.
16 Chuin Gad leh Reuben chate Mose angsung’a asei uvin, “Hiche mun'a hin kelngoinou tampi kanei uvin, hijeh chun kelngoi kul ka sempeh uva, chule kacha kanao te hou dinga jong kulpi nei khopi phabep kasah peh diu ahi.
17 Khat cheh in manchah kapat uva, Israel mite gal lamkaiya kapan diu, amaho jouse chenna ding mun kamu kahse uva kigosa dem'a um jing ka hiuvin, ahinlah agamsunga cheng teho jal a hi numei chapang ho kulpi kaikhum'a venbit ding katiu ahi.
18 Chule Israel chaten khat cheh a chen mun anei kahseuva keiho inlam'a hung kile louding kahi tauve.
19 Ajeh chu amaho toh Jordan vadung gal lam'a khu gou kalo khom theilou diu ahi. Solam gamkai Jordan lam hi keiho goulo dinga hung kisep doh ahitai,” atiuve.
20 Chuin Mose’n jong aseijin, “Pakaiya galsat dinga hitia hi na khutchoi utoh na dindet uva,
21 Pakaijin na galmi teu adelmang masangsea na galsat houvin Jordan galkaiya gal asat jing uleh,
22 Pakaijin gam chu ajo tengleh nahung kile diu ahi. Pakai le Israel mipi jouse chunga nakin'u na suh bulhit diu ahi. Chule Jordan solam'a gam chu Pakaiya konna natou u hi ding ahi.
23 Hitobang’a hi nabol lou uva ahile, nangho jouse jong Pakai doumah a chon nahi diu, hiche na chonset nau hin nahin holdoh tei diu ahi.
24 Na numei chapang ho dingin chen mun phabep sahpeh unlang, na kelngoi teu kul jong sem peh uvin, amavang na kitepnau aboncha nabol sohkei diu ahi,” ati.
25 Chuin Gad leh Reuben miten adonbut un, “Keiho, nasoh ten, nei thupeh bang bang uva kajui diu ahi.
26 Ka chateu, jiteu, gancha hon ho hiche Gilead khopi ahin anaum tauvinte.
27 Ahinlah galkon thei jousen nasei banga agal manchah toh Pakaiya galsat dinga galkai ding kahiuve,” atiuve.
28 Chuin Mose’n Eleazer thempupa, Nun chapa Joshua, chule Israel phung khailhah lamkai ho henga thu apetan ahi.
29 Mose’n aseijin, Gad chate le Reuben chate galmanchah choi jousen Pakaiya galsat dinga Jordan vadung galkai diu ahi. Chutia chu abol uva agam chu alah uleh Gilead gam chu amaho gou dingin petan.
30 Ahinlah amaho hin gal manchah choi nom louva nangho toh agalkai uleh, amaho hin Canaan gamsung’a nangho jouse toh chengkhom diu ahi,” ati.
31 Chuin Gad chate leh Reuben chaten aseikit un, “Keiho nasoh te kahiuvin, chule Pakai thupeh bang banga keihon kabol diu ahi!
32 Keiho galmanchah thalhingset toh Pakaiya gal kasat diu, ahin kagou diu chu Jordan a hilangkai hi ding ahi,” atiuve.
33 Chuin Mose’n jong Gad phung, Reuben phung, chule Joseph le Manasseh phung akehkhat chu gam apetan ahi. Aman Amor mite lengpa Sihon lenggam leh Bashan lengpa Og lenggam—akhopi ho le akimvel a gam ho chu apeuvin ahi.
34 Gad chaten khopi atundoh hou chu Dibon, Ataroth, Aroer,
35 Atroth-shophan, Jazer, Jogbehah,
36 Beth-nimrah, chule Beth-haran ahi. Hiche khopi jouse chu kul akai khum sohkeiyun, kelngoite umna ding mun jong tampi asem doh peh tauvin ahi.
37 Reuben chaten khopi atundoh hou chu Heshbon, Elealeh, Kiriathaim,
38 Nebo, Baal-meon, chule Sibmah ahi. Amahon alah u khopi phabep min akhel'un athahsah uve.
39 Chuin Manasseh chapa Machir chate acheuvin Gilead agasat uvin ahile ahin jou tauve, agamsunga ana cheng Amor mite chu abonchauvin adel jam gamhel tauvin ahi.
40 Mose’n jong Gilead chu Manasseh chapa Machir henga apedoh tan, chule hicheva chun acheng tauvin ahi.
41 Jair mite, Manasseh sunga phungbah khat chun Gilead khopi ho abulu jou uvin hiche lhaang chu Jair Khopi ho asah tauvin ahi.
42 Hiti chun, Nobah kitipan Kenath khopi le akimvel kho ho abulu in, athah in hiche ho chu minsahna aneijin Nobah asah tan ahi.