11
Mikitah Kiselna Mun
La Lamkaipa Dia David Labol
1 Keiman eiveng tup din Pakai katahsan e.
Hijeh a chu nangin ipi dia,
“Vacha bangin na hoibitna dingin hiche molchunga khun galeng tan! nati ham.
2 Migilouhon athalchangu akhao toh
suhtoh san akoi un aloisal tauvin ahi.
Ama hon munthip a konin
milungdih ho ahin kap un ahi.
3 Dan leh thupehho akisuhset teng,
michonpha pa chun ipi abol thei nahlai ding ham?”
4 Ahinlah Pakai chu a-Hou-In munthenga chun aum'e;
Pakai chun van'a kon'in vai ahinhom nalaije.
Aman mijouse ahin vechil sohkeijin,
leiset chunga mitin ahin kholtoh e.
5 Pakaijin michonpha le migilou ani gelin ahin kholtoh e.
Aman thunoh baotam bol ho athen ahi.
6 Aman migiloute chunga mei-am lenglung leh kathsong meikong gojuh a ajuhsah ding,
hui savetvut pum'a gotna apeh ding ahi.
7 Pakai dihna hin thu adih a kitan achepi.
Hijeh a chu thudih chepi ho chun Pakai mai amu diu ahi.