10
1 O Pakai, idia gamla tah a ding nahim?
Genthei kathoh jiteng ibol'a kisel jia nahim?
2 Migilou ten noise tah in migenthei te adelmang jiuvin,
mi ona dinga asem'u thang'a chun amaho joh hin osah in.
3 Ajeh chu ama hon thilse lam a alung ngaichat hou akiletsah piuvin,
mikilose ho apahcha uvin, Pakai chu ataitom'un ahi.
4 Migilou te vang Pathen holdin akiletsah val un,
alungthim pumpi uvin jong Pathen aumpoi atiuve.
5 Ahinlah amaho hi abol lam-lam uvah alolhing'un ahi.
Achung uva hunglhung ding engbolna ho jong hi amuphaji pouve.
Ama hon agalmi hou jouse chu ataitom'un ahi.
6 Ama hon kachung uva thilse kiti chulou ding ahi tin atahsan un!
boina hoa konna a itih a ongthol ding kahi tauve atiuve!
7 Akam uvah sapsetna, jou le nal, chule gihsalna adimset ui.
Aleimuh uva jong thilse le thil phalou jeng aum'e.
8 Ama hon khopam lam gamthip lah hoa mi achanglhi jiuvin,
themmona neilou ho tha ding agoji uve.
Amit un alhasam te umna achinglhi jingun ahi.
9 Keipi bahkai ho bangin akisel'un,
lhasam le hatloute mat jeng dingin angah un ahi.
Sachangho bangin tahlel te chu len akhu khum'un amandohji tauve.
10 Lhasam a bolsetna toh te chu asugep jiuvin;
miphalouho thahatna noiya chun alhalutji tauve.
11 Migilou ten, “Pathen'in eimupha pouve!
Aman amit sing intin eihon ibol uhi mu hihbeh inte!” atiuve.
12 Hung kipat tan, O Pakai!
Migiloute hi gotna petan, O Pathen!
Hatlou lhasam te hin sumil hihbeh in!
13 Migiloute Pathen samse pum-pum'a iti ongthol diu ham?
Ama hon Pathen'in eithemmo sah pouvinte tin angaito uve.
14 Ahinlah Pakai nangin athilse bol hou hi namu sohkeije.
Nangin hiche ho hi melchih inlang amaho hi gotna pen.
Hatlou lhasam ten atahsan nau nanga akoi uve.
Nulou palou te jong nangin vengbit in.
15 Hiche migilou mi engse ho hi, abanjang'u heh bongin!
Abon uva na suhmang kahsen anungu del jingin.
16 Pakai hi a tonsot-tonsot leng ahi!
Pathen neilou nam mite chu gamsunga kon'a mangthah ding ahiuve.
17 Pakai nangin tahlelte kinepna hi nahetsa ahi.
Nangin thon louva akanau na jahpeh a nahin lhamon ding ahi.
18 Nangin nulou palou te leh bol gentheija umho chungthu adih a na tanpeh ding,
chuteng athi thei mihem in amaho hi asuh lengvai theilou diu ahitai.