9
Pathen'in thu adih a atanjeh a David in athangvah
La lamkai pan Alumoth-labben lakaiya sah dia David lasem
1 Pakai kalungthim pumpin nangma thangvah ing kate;
Thil loupi nabol ho hi seiphongle ing'e.
2 Nangma jal a kipana a ka dimset ding ahi.
Namin'in vahchoi la sang e, O Hatchungnung Pen.
3 Nang nahung dindoh teng kagal mite anungjam jiuvin;
akiseplhu uvin na angsunga athidenji tauve.
4 Ajeh chu nangin ka dihna lam a thu nei tanpeh in;
navan laltouna a kon'in thu adih in nahin tan e.
5 Nangman namtin vaipi na lethuh in migiloute na sumang'in;
amin'u tonsot a din nathai mangtai.
6 Melma te chu nangin a itih a dingin na sumangin;
khopi na suhmang ho jong tun suhmil'in aumgam tauve.
7 Ahinlah Pakai hi tonsot leng ahin,
thutanna dingin alaltouna atungdoh in ahi.
8 Aman leiset hi thudih a achungthu atan a
namtin vaipi chunga hi dihtah a vai ahop ding ahi.
9 Pakai hi bol gentheija umho dinga hoidohna ahin,
hahsatna nikho hoa dinga kicholdona kulpi ahi.
10 Namin heho jousen nahin tahsan ui,
ajeh chu, O Pakai, nangin nangma holte chu na dalha ngaipoi.
11 Jerusalem'a vaihom Pakai vahchoinan la sauvin.
Suhmil theilou atohdoh ho namtin jah a seiphongun.
12 Ajeh chu aman panpi beiho tolthat ho phu alaji.
Aman mi gentheiho kana jong nahsah mon akoi jipoi.
13 Nei khoto teijin O Pakai.
Eibolse teuvin ichan a eisuh genthei uhi ven.
Thina kokhuh a kon'in nei loidoh in.
14 Jerusalem kelkot phungho a lhangphong tah a ka thangvah theina dingin
neihuhdoh in, chutengleh neihuhdoh jal a kakipa thanom ding ahi.
15 Midang ho lhahlutna dia asem u kokhuh a chun namtin vaipi alhalut ui.
Athangkam uva chun amaho keng joh a ohtai.
16 Pakai hi athutan dihna a kon'in akilangdohji.
Migilou ho vang amaho thangkamna a a-ohden jiuvin ahi.
Selah
17 Migilouho vang lhankhuh a lhalut unte.
Hichu Pathen nahsah lou namtin vaipiho chunga gotna jong ahi.
18 Ahinlah panpi ngaicha ho chu nahsahmoa umjom jing lou diu;
chule migenthei te kinepna jong tonsot a suhmil a um louding ahi.
19 Hung thouvin, O Pakai!
Mihemho kinoise sah hihbeh in!
Namtin vaipi ho chungthu hi tanin!
20 Amaho hi tijatnan lungkham sah in, O Pakai.
Namtin vaipi hi mihem mai-mai ahiu kihetdoh sah in.
Selah