17
Mi Sugenthei Te Akon Gimna Aum Teng Hoidohna Dia David Taona
David Taona.
1 O Pakai adih thumna a kaka ogin hi nei jahpeh in.
Ka taona hi nei ngaipeh in.
Lungthengsel le dihtah a katao ahi.
2 Kathem chan na nei phondoh peh in,
ajeh chu nangin thudih a natong namu chet ahi.
3 Nangin kalunggel ho napatep jin janteng jongleh ka lungsung na velhaji.
Nangin kapum changin nei vechilin ka thepmona namupoi.
Ka kamsung jenga jong setna potlou ding ahitai.
4 Keiman na thupeh dan ka juijin,
migilou ho le mi engse ho khonung kajui jipoi.
5 Ka kalson dan hin na lampi kajui jingin;
nangma lampia kon'in ka potdoh pon ahi.
6 Keima nangma kom'a taova kahi ajeh chu O Pathen, nangin nei sanpeh tei ding kahei.
Ka taona hi lunglut tah in nei ngaipeh in.
7 Na mingailutna longlou chu kidangtah in nei musah in.
Agalmite a konna hoidohna ngaicha ho chu
na thahatna gimnei tah chun na huhdoh ji e.
8 Nangman namit teni na chintup jing bangin keima jong nei vesuijin.
Na lhaving limnoija chun neisel'in.
9 Kavel a eidou jing migilouho a kon'in eivengtup in,
eithatgo ka melma hoa kon'in nei huhdoh in.
10 Amaho hi mi khotona bei ahiuve.
Akiletsah nau thucheng chu ngaitan!
11 Ama hon eihin juilut un eium kimvel uvin,
tola selhuh dingin agomkom ahol'un ahi.
12 Aneh ding changlhile—
keipi bahkai gilkeltah le keipi nouvin achan lhihle tobang ahiuve.
13 Hung kipat tan, O Pakai!
Kidinte pin lang, seplhu jengin!
Na chemjam'in migilou hoa kon'in nei huhdoh in!
14 O Pakai, naban thathat in
vannoiya ama phatchomna ngaito ho hi sumangin.
Amavang nangma goulu ho hi nangman vahva jingin.
Achateu nei jong suhnengpeh inlang,
ason apahteu goulo ding geija adalhah peh theina diuvin gontoh peh in.
15 Mona beija hinkho kaman jeh a, namel kamu tei ding ahi.
Kathodoh teng, nangma toh kimaitoa ikimuto ding chule kalung nachim tante.