16
Hoidohna Dinga Pathen Henga David Ajam
David Michtam (Lakai jatkhat)
1 Nei hoibit in, O Pathen,
ajeh chu nanga hi kinem jing kahi.
2 Pakai kom'ah kaseijin, “Nang hi ka Pakai nahi!
Thilpha kanei jouse hi nanga kon bou ahi,” kati.
3 Leiset a Pathen lhentum te hi
pachat umtah ahiuvin!
Amaho hi kei dinga kagal lamkai le kakipa thanopna pen ahiuve!
4 Pathen dang ho nungjui a delle ho chu alung khamnau kibe jing ding ahi.
Amaho thisan a kilhaina ganthat a pang ka hilou ding
a pathen u jong kahou pehlou diu ahi.
5 Pakai hi ka chan ding gou le ka phatthei channa khon chu ahi.
Pakaijin ka ijakai eichintup peh e.
6 Nangin neipeh gam jong hi gam phapen ahi.
Itobanga goupha kidang neipeh hitam!
7 Ijakai eihil'a ka Pakai chu keiman thangvah inge;
janteng jong le avel in eigeldoh sah jin eihilji e.
8 Pakaijin eiumpi dan hi keiman hetna kanei jinge.
Ama hi kakom'a naichakhat a um ahi ti kahei.
Hijeh chun keima lungthomhao ponge.
9 Hijeh hin keima kalung among sellin, chuleh kipanan kadim'e.
Pathen ka thangvah e.
10 Ajeh chu nangin thina mun a nei dalha pon natin
na mitheng te jong lhankhuh a lhahlut sah pon nate.
11 Nangin hinna lampi chu nei musah in natin,
nei umpi jal a kipana le
nei umpina tonsot nopna chu nei pen nate.