2
1 Ipi dinga chitin namtin ho hibanga hi lunghang uham?
Ipi dinga thil phachomlou ngaitona a aphat u amoh man chatvai u hitam?
2 Pakaijin leng dinga athaonupa dounan
leiset lengte akikhom un;
chule vaihom thunei hon jong thulhuh asem un,
hitin asei ui.
3 “Ei-kihennauva kon ahin kilhamlhao hitin,
Pathen thaneina'a kon'in kilha ongu hite,” atiuve.
4 Hinlah Pakaijin avan laltouna a kon'in amaho chu ahin nuisat e.
Pakaiya din nuijat umtah ahi tauve.
5 Chuin Pakaijin amaho chu lunghang tah in aphoh in,
alunghan jah jeng chun amaho atijatsah tai.
6 Chutah in “Keiman kalhendoh leng chu ka lhangtheng Zion molvum a ka tousah e,” ati.
7 Keiman thugahna chu phongdoh inge:
Pakaijin kaheng'ah hitin asei e, “Nangma hi kachapa nahi.
Keiman tunia nangma hi kahin nahitai.
8 Kaheng'a nathum pouleh chitin namtin hi nagoulo dinga kapeh ding,
vannoi leiset pumpi geija nagou kahisah ding ahi.
9 Nangman amaho hi thih jol'a najep boh a
belkhengpa bel kivoh chip banga ahal hal a nakoi ding ahi.
10 Hijeh chun, Vo leiset lengte, kichih theiyun!
Chule leiset thutan ho, nang hon thuhil ngaipha uvin!
11 Pakai chu ging tah in akin bol un,
chule kithing pum in Ama chu houvun.
12 Pakai lungsatna nachung uva achuh a na manthah masangun,
akengphang kolchah in chop un—
ajeh chu Pakai lungsatna neocha jong eihodia deojah ahi.
Atahsan nau Pakai a koi jing ho chu anunnom ahiuve!