27
Pathen Thaneina Dol'a David Tahsan Detna
David Labol.
1 Pakai hi keidin vah leh huhhingna ahi—
Chuti ahileh idia kakichat ding ham?
Pakai hi ka kulpi, hahsatna a eihuhdoh pa ahi.
Chuti ahileh kei idia ka kithin ding ham?
2 Migilou ten suhgam dia eihin delkhum uva,
kagal mite leh eidou teuvin eihin nokhum tengu leh,
kipallhu uvin tin chuleh lhugam diu ahi.
3 Galmi tamtah in eium kimvel jeng jongleh,
kalung linglao ponte.
Ijemtin thagam dingin eihin delkhum jongleu,
ka Pathen a lung mongtah a kaum ding ahi.
4 Hiche thil khat Pakai henga kathum kadei pipen chu—
ka hinkho lhumkeija Pakai in'a um ding—
Pakai lolhinna a chu lunglhaisel a um a,
a Hou-In na aphatna ho gel jinga
hinkho man ding hi ahi.
5 Ajeh chu aman hahsatna a konna eihoidoh sah ding;
a Hou-In thenga chu eihoibit ding ahi.
Aman mi maiphah louva songpi chunga eisel ding ahi.
6 Ajeh chu boina hon eihin lonkhum jong le
Aman eihoidam ding ahi.
Ama Hou-Intheng sunga kipah le thanom tah a,
pumgo thilto kabol ding semjang saipum a Pakai thangvah la kasah ding ahi.
7 Kahung taove nei ngaipeh in, O Pakai.
Nami khotona pum in nei donbut in!
8 “Hungin lang nei houlim pin” nati chu ka lungthim in ajan,
hitin adonbutne, “Pakai, kahunge.”
9 Pakai neinung ngat hihbeh in.
Na lunghan nan nasoh hi paidoh hihbeh in.
Nangma hi eikithopi phapen chu nahi jinge.
Tun neipaidoh hih in; nei dalha hih in,
O Pathen ka huhhingpu!
10 Kanu le kapan eipaidoh jeng jongleh,
Pakaijin eikolchah jing ding ahi.
11 O Pakai, ka hinkho man ding dan neihil in.
Lamdih jenga nei puijin,
ajeh chu kagal miten eichanglhi jingun ahi.
12 Amaho khut a nei lhahlut sah hih in.
Ajeh chu ama hon kabol louhel thil a themmo eichan un;
phattin in ka chungah thilse abolgo jingun ahi.
13 Ahijeng vangin, hiche mihing gam a kaum laisen
Pakai phatna kamu jing jeng ding kakinem e.
14 Pakai chu lungneng tah in ngah jingin.
Hangin lang hatnin.
Henge, Pakai chu lungneng tah in ngah jingin.