26
David In Thudih Le Tahsan Ahina Dol Pathen Henga Aphon
David Labol.
1 O Pakai themmona bei kahi hi phongdoh tan,
ajeh chu keiman kitahna neitah in hinkho ka mangin;
nungchon louhel in Pakai a tahsanna dettah kaneije.
2 Pakai nei patep inlang nei kholchil in.
Kachon dan leh ka lungthim hi vechen mongin.
3 Ajeh chu nei ngailutna longlou hi keiman kahe jing e,
chuleh keiman na thudih dungjuijin hinkho kamang e.
4 Keima mijou ho toh jong kakivop khompon
miphalhem ho deilam jong kachepi pon ahi.
5 Keiman migiloute kikhopna kathet in,
thil phalou ho jong ka nuseji e.
6 Themmona kaneilou vetsahna in kakhut kasil e.
Na maicham kahin jon e, O Pakai.
7 Thangvah la sapum in
na kidanna ho kaphong doh e.
8 Na Hou-In theng kangailui, Pakai,
na umpina loupi tah kilandohna mun chu.
9 Michonse ho thoh ding nei thoh sah hih in.
Tolthat ho toh kibangin nei thepmo sah hih in.
10 Set bolnom nan akhut u asuboh un,
chuleh ama hon phatseh in nehguh akilah un ahi.
11 Keiman hitobang hinkho chu kamang pon, kitahna hinkhoa ka ding jinge.
Hijeh chun nei lhatdoh inlang na mihepina chun neipui jin.
12 Tun keima tolgo lai a dettah in ka ding'e,
chuleh keiman lhangphong tah a Pakai ka thangvah ding ahi.