25
David Tahsan Dettah A Atao
David Labol.
1 O Pakai, kahinkho hi nang kapetai.
2 Nang ka tahsan e, ka Pathen!
Nei jumso hihbeh in,
chule kalelna a hin ka melmate kichoisang sah hihbeh in.
3 Nangma tahsan koima chan jumna atolou diu ahi,
amavang mijoulhep gojing hon vang jumna ato diu ahi.
4 O Pakai, lamdih chu neihil in;
kajui ding lampi chu nei kopeh in.
5 Na thutah chu neihil in hichea chun neipui in,
ajeh chu nangma hi eihuhhinga ka Pathen chu nahi.
Nilhumkei keijin nanga hin kinepna kanei jinge.
6 O Pakai, gollui apatna neihin puinau
nami khotona le na mingailutna longlou hin geldoh in.
7 Ka khangdon laiya ka chonset gitlouna ho nei geldoh peh hih in.
Na mingailutna long louva nei puina joh chu galdoh in,
ajeh chu nangma milungset them nahi, O Pakai.
8 Pakai hi apha ahin adih jengbou abol'e;
aman lamdih louva che ho jeng jong lamdih akopeh jinge.
9 Aman mi kineosah ho chu lamdih a apuijin,
ama dei lampi chu ahil jinge.
10 Pakai kitepna nit jing ho leh ama deipeh dungjuiya chon ho chu
ami ngailutna longlou leh akitahna in apuihoi jinge.
11 Namin loupina dingin, O Pakai,
ka chonsetna simjoulou, nei ngaidam in.
12 Pakai ging ho chu koi ho hiuvam?
Amaho chena ding lampi chu Pakaijin avetsah ding ahi.
13 Amaho chu khangtou untin,
achateuvin jong gamsung alo dingu ahi.
14 Pakai hi ama gingjing te dinga gol phapen ahi.
Aman hitobang miho chu akitepna ahil jing e.
15 Kamit tenin Pakai chu ave jingin,
aman kagal mite thangkol a kon'in eihuhdoh jing'e.
16 Neihin angngat inlang nei khoton,
ajeh chu keima ka changseh a lungthom haotah a uma kahi.
17 Kaboina ho akhohse cheh ui.
Oh, hiche hoa kon hin nei huhdoh in.
18 Ka lunggimna hi nei hetpeh in chuleh ka hahsatna ho hi neivet peh in.
Ka chonsetna ho ngaidam in.
19 Ven galmi ijat mong kanei hitam
chule amaho hin ichan geija eihot uhitam!
20 Nei vengbit in! Amaho a konna hin ka hinkho huhdoh in!
Nangma a kisel kahi nei jumso hihbeh in.
21 Kitahna le thenna in eivengbit hen,
ajeh chu nanga hin kakinepna aum jinge.
22 Vo Pathen, Israel te hi
aboina jouseuva kon'in lhatdoh tan.