24
Loupina Lengpa
David Labol.
1 Vannoi leiset le asunga um jouse hi Pakaiya ahi.
Vannoi pumpi le asunga cheng mihemte jouse hi Ama a jeng ahi.
2 Ajeh chu Aman leiset khombul hi twikhanglen chunga atun ahin,
twipi thuh lah a aphudet ahi.
3 Koi ham Pakai mol chunga kaldoh jou ding?
Koi ham amun thenga ding thei ding?
4 Akhut le alungthim thengho bou,
chuleh milim semthu houlou
le jou seilouho bou hidiu ahi.
5 Ama hon bou Pakai malsomna amudiu ahin
chuleh ahuhhing pau Pathen toh kiguijopna dihtah anei thei diu ahi.
6 Hitobang miho hin bou nangma nahol thei diu
chuleh Jacob Pathen nangma na chibai thei diu ahi.
7 Khanglui kelkot ho kihonglen un!
Khanglui kotpiho kihong len un lang,
leng loupi chu lutsah un.
8 Koi ham leng loupi chu?
Pakai hattah leh thupi tah,
Pakai koiman ajo joulou gal hattah chu ahi.
9 Khanglui kelkot ho kihong len'un!
Khanglui kotpiho kihong len'un,
loupina leng chu lutsah un.
10 Koi ham Leng loupi chu?
Van Pakai sepai ho—
ama hi Leng loupi chu ahi.
Selah