30
Huhdohna Jal'a David In Pathen Athangvah
Hou-In Kilhandoh Nia Sah Dia David Labol.
1 Pakai nangin nei huhdoh tah jeh in kahin thangvah e.
Nangin kagal mite ka chunga na kithang-at sahpon ahi.
2 O Pakai, ka Pathen, panpi ngaichan kahin kouve.
Nangman ka tahsa na kiledoh sah tai.
3 O Pakai, nangin lhankhuh a kon'in neihin puidoh e.
Thina kokhuh a ka lhahlutna dinga kon'in jong nei hoidoh sah e.
4 Nangho Pathen mite jousen Pakai thangvahna la sauvin!
Amintheng chu choi an'un.
5 Ajeh chu alunghan hi phat chomcha bou ahijin,
ami hepina vang hinkhoa ding ahi!
Ka na nikho ho jong kipanin ajui pai jitai.
6 Keiman ka phatthei nikhon,
“Imachan eisutang jou ponte!” kanati.
7 O Pakai, nami hepina hin mol bangin eisudet tai.
Keija kon a nakihei mangji tengleh, keima ka dingjou jipoi.
8 O Pakai, nahenga kahung tao ahi.
Nami hepina chu kathum in hitin kaseije,
9 “Keima kathi a lhankhuh a ka lhahlut teng,
nang dinga ipi phachom ding ham?
Ka tahsa leivui in nang navah choi thei ding ham?
Na kitahna thu chu hiche hin aphondoh thei ding ham?
10 Neihin ngaipeh in, Pakai, neihin khoto in.
O Pakai neihin kithopin”
11 Nangin kalung khamna hi kipah tah a lamna in nei heidoh pehtai.
Nangin kalung khamna silpon nei lahdoh peh in kipana silpon joh nei silpeh tan,
12 hitia chu thipsan louva thangvahna la kasah jing theina dingin.
O Pakai ka Pathen, keiman nangma tonsot in thangvah jing tang'e!