31
David In Kicha Le Tija Pum'a Pathen Akou
La Lamkaipa dia David Labol
1 O Pakai, nei huhdoh ding ngaichan nakom kahin bel e;
Jumna nei musah hihbeh in.
Nei huhdoh in ajeh chu nangma chondih tah Pathen nahi.
2 Ka taona najah nadin nei ngaipeh teijin;
nei hung huhdoh loijin.
Kakiselna songpin pang jingin lang,
ka hoidohna kulpi hijingin.
3 Nangma hi ka songpi le ka kulpi nahi.
Namin loupina dingin kahahsatna a kon'in nei huhdoh in.
4 Ka dougal hon kalhuhna dinga thang eikampeh nauva kon'in neihuhdoh in,
ajeh chu ka hoidohna hi nangma a bou aum'e.
5 Ka lhagao nangma khut a ka pedoh tai.
Nei huhdoh in, Pakai, ajeh chu nangma hi kitah jing Pathen nahi.
6 Phatchomna bei semthu pathen hou ho khu keiman kathet ahi.
Kenvang Pakai ka tahsan jing e.
7 Nami ngailutna longlou jeh in keima kipah thanom jing inge,
ajeh chu nangin kaboina ho nei hetpeh jingin,
chuleh ka lunggimna jouse nangin nei hetthem peh jingin ahi.
8 Nangin ka dougal ho khut ah nei pelut pon
lungmonna mun joh a neikoi jin ahi.
9 Nei khoton, Pakai, ajeh chu keima hahsatna a um kahi.
Ka mitlhin kamit akhutan ahi.
Ka hinna le ka tahsa abeipai ding ahitai.
10 Lungkham a thipai ding kahi tai;
genthei nan ka hinkho asuchom tai.
Chonset in ka jaitha anem sah in;
asung langa beipai ding kahitai.
11 Ka melma ten eisamseuvin
kaheng kakom ten eitheuvin ahi—
Kagol kapaite jeng jongin eihin nai ngam tapouvin ahi.
Lampi dunga eimu jongleh,
ajammang gamji tauve.
12 Keima mithisa bang leh,
bel kehsa bangin notthap in kaum tai.
13 Keima chung chang hi thujou ngen eikisei khum in,
tijatnan eium kimvel tai.
Ka dougal ten kei dounan thilse agong un,
ka hinkho hi suhmang ding agouve.
14 Ahinlah Pakai, keima nanga kingai jing kahin,
“Nangma ka Pathen nahi!” kati.
15 Khonung ka khankho hi nang khut a um ahi.
Hitia tang louva eidelle jing hoa kon'in nei huhdoh in.
16 Nami khotona chun nasohpa hi hin salvah in.
Nami ngailutna longlou chun neihin huhdoh tan.
17 O Pakai, nei jumso hihbeh in,
ajeh chu panpi ngaichan nangma kakou jinge.
Miphalou ho chu jumsah jon;
amaho chu alhankhuh uvah thipsan sahtan.
18 Jouthu potna alei u suthip in—
ami noise nau le Pathen mite ahouset nau lei chu suthip jengin.
19 Nangma gingte dingin
nangin ijakai nasuh nengpeh hi iti phat a pha hitam.
Panpi ngaicha a nakom'a hung te nangman na phatthei jin,
vannoi mite mitmu changtah in nangman phatthei naboh jin ahi.
20 Nangin amaho chu suhset ding gohoa kon'in na angsunga na hoibit jin,
chuleh ahouset nau lei le danga kon'in jong,
na angsung'ah na hoibit jinge.
21 Pakai chu thangvah in umhen,
ajeh chu Aman angailutna longlou kidang tah chu eimusah jinge.
ka chenna khopi gal akinokhum a kon'in jong eihoidoh sah tan ahi.
22 Lung linglao pumin keima kapeng jah in,
“Pakai toh eiki sukhentai!” kati.
Hinla nangin nei khoto dia ka kana neijah peh in
panpi ngaicha a ka kouna nei donbut tai.
23 Nangho Pathen mite ho Pakai chu ngailu uvin!
Ajeh chu Pakaijin ama a kingai jingho chu ahuhdoh jingin ahi.
Ahinlah mi noise ho chu engbolna nasatah apejin ahi.
24 Hijeh chun Pakaiya kinepna neiho jouse,
hat unlang hangun!