38
David Lungheiya Pathen Henga Ataona
Pathen'in Asuhmil Louna Dia David labol.
1 O Pakai lung phatmo nan nei lethuh hih in,
ahilouleh na lunghan jeh in jong neijep hih in!
2 Na thalchang ho ka sunga akikam dentan,
na khuttum in neivo lhutan ahi.
3 Nei lunghan khum jeh in katahsa pumpi hi anan;
ka chonsetna ho jeh in ka tahsa achip soh tai.
4 Ka thepmo nan eilon khum in—
agihdan pohjou hoi ahi tapoi.
5 Ngol hoi tah a kana chonset jeh in
ka maha anase tan a uidoh leotai.
6 Ka thohgimna hin ei kongkon sah tai.
Lunggim tah in nilhum kei in ka vahlen ahi.
7 Khosihpi kasunga meikong bangin a allin,
chule ei dammo sah tai.
8 Keima kalhasam in kapum in kagoi lhatai.
Ka lungthim natna a kon'in kapeng pengin ahi.
9 Pakai, nangin ipi kangai chat ham nahei,
nangin ka khoisatna jouse najai.
10 Kahaina hu alhasam tan katha abeitai,
chule kamit in jong kho amu tapoi.
11 Ka ngailut cheng le kagol kapai ten kahivei hi akichauvin eidalha tauve.
Ka insung mite jeng jong achomin aum tauvin ahi.
12 Hiche jenga jong chun ka galmi ten ka thina ding thang akam nalai uve.
Ka manthahna ding tohgon anei uve.
Nilhum keijin ka thina ding agong tauvin ahi.
13 Hinlah ken eikigihna ho jouse chu ka kijahmo sah e.
Amasang uvah apaomo bangin thipbeh in kaum tai.
14 Imacha jah louding kanom in,
chuleh donbutna jong donbut louding kanom e.
15 Ajeh chu O Pakai, nangma ngah jinga um a kahi.
Nangin ka taona nei donbut tei ding ahi, O Pakai ka Pathen.
16 Keima katao in, “Ka dougalte noise tah in eivetsah dan,
ahilouleh ka lhuhna a jong kitaisah dan,” kati.
17 Keima tang louva ka thohgimna ah akichai pai ding kahi tai.
18 Hinlah ka chonsetna ho ka phongdoh in;
kana chonna ho chu kakisih behseh jeng'e.
19 Keiman dougal khoh tah-tah ho kanei e;
ama hon ajeh beihel in eidou ui.
20 Ama hon thilpha kabol chu thilsen eile thuh un
chuleh thilpha ka chepi jing jeh in eidouvun ahi.
21 O Pakai, nei dalha hih in.
Ka Pathen keiya kon'in um gamla hihbeh in.
22 O Pakai, eihuhhingpa hungloi inlang,
nei kithopin.