39
Chomkah Louva Hinkho Kikhel
La Lamkaipa Jeduthun dia David labol.
1 Kei le kei kaki houvin, “Ka tohna chunga chingthei tah in
thilbol ing kate.
Ka thusei doh chenga chonse louvin
kavel a Pathen ginglou ho aum teng kalei ka kituh tang ding ahi.”
2 Hinla hitia thipbeh a kaum a—
thupha jeng jong cheng khatcha seilouva kaum chun—
ka lungsunga lunggimna akhohse cheh in ahi.
3 Kalunga kagelbe chanin,
ka lunggimna akhoh cheh in,
hiti chun seilouvin kaum thei pon ahi:
4 “Pakai leiset a ka hinkho hi ichan a chom hitam neihin hetsah jingin.
Kahin nikho hi akisim jing hi nei geldoh sah in—
ka hinkho iti chom hitam.
5 Nangin ka hinkho nasem hi ka khutphang availang sangin jong asaojo poi.
Nang dingin ka hinkho lhumkei jong hi haikhat bou ahisoh tan;
mihem hinkho khat cheh jong hi haikhat cheh bou ahi.”
Selah
6 Mihem hinkho hi meilom kitol bang bep bou ahin,
kisah lunggimna ho jong hetmanlou kah in akichai loi jitai.
Gou ikhol khom un, kon ahin man ding ham jong ihedohji pouve.
7 Hijeh chun, Pakai, hoiya kinepna kakoi ding ham?
Nanga bou ka kinepna aum'e.
8 Kaset bolnomna a kon'in nei huhdoh e.
Mingol ho nei nuisat sah hih in.
9 Keima na ansunga thipchet in kaum'e; imacha jong kasei louding ahi,
ajeh chu gotna hi nanga kon ahi.
10 Ahinla Pakai nei engbol hih in!
Na khutgu dounan ka chaolha gamtai.
11 Ka chonset u suhdihna dia neijep tengu le,
kasahlut u chonsetna chu nget in aneh bangin ajunlha jitan ahi.
Tahbeh in mihem khat cheh hi haikhat bou ahi.
Selah
12 O Pakai, ka taona ngaipeh in!
Panpi ngaija ka taona nei ngaipeh in!
Ka mitlhi lon nahsah mon koi hih in.
Ajeh chu keima hi na maljin bou kahin,
keima masanga kapu kapa teu banga,
kholjin vahle kahi bouve.
13 Hiche leiset hinkho hi ka dalhah a kahin kho abei masang
kakipa a kanui kitna din nalung hanna, na gimbolna ho toh nei chom khenin.