13
David In Thingkhong Tollut Ding Agot
1 David in asepai sangkhat chunga lamkai ho leh jakhat chunga lamkai ho chu thu adong toh sohkeijin ahi.
2 Chuin aman Israel mite jouse kom'a chun hitin aseiye, “Nangho le Pakai I-Pathen'u lunglam ahile Israel mite chenna jouse thempuho le Levi mite jaona a ibonchauva ikikhop khom soh theina diuvin thu lhangsapna nei uhite.
3 Saul leng vaipoh laijin Pathen Kitepna Thingkhong chu nahsahmon anaum jongleh tuhi anung lahphat tah chu ahi,” ati.
4 Akihoukhom mipi jousen hichu pha asah utoh kilhon'in aboncha uvin boldin kinoptona anei tauve.
5 Hiti chun David in Pathen Thingkhong chu nung putlut kitna dingin Kiriath-jerim mun a kon'in muntin'a Israel mite aumnau Egypt lhanglam gam Shihor Vadung apat chule sahlam gam Lebo-hamath khopi vel dunga kon abon'uva ahung kikhop khomna diuvin kouna aneijin ahi.
6 Pathen Thingkhong nunglah kitna dingin David le Israel mite chun Judah gam Baalah (Kiriath-jeriam tia jong kikou) mun a chun ana cheuvin ahi.
7 Chuin ama hon Pathen Thingkhong chu Abinadab insunga kon'in ahin ladoh un bongkang thahleh a akoi uve. Chule hiche bongkang chu Uzzah le Ahio tenin ahin tol lhon'in ahi.
8 Hichun David le Israel mipite chun Pathen ang'ah kipah le thanom tah in la asauvin, selangdah le semjang asaiyun, khong le dah chule kipa khutbeh toh thon saki pengkul ana mut uvin ahi.
9 Ahivangin ama hon Nacon changphol lai ahin phah uchun bongchal chu ahung kipal lhun Uzzah in Pathen Thingkhong chu tuh dingin akhut ana lhaangin ahi.
10 Uzzah in Pathen Thingkhong chunga akhut ajah apat in achunga Pakai lunghanna ana chutan hijeh chun Pathen'in Uzzah adengin ama angsunga ana thiden tan ahi.
11 Pakaijin Uzzah chunga alunghanna aphon jal jeh chun David jong ana lungna lheh jengin ahi. Hijeh chun David in hilai mun chu Perez-uzzah asah in ahi, (“hichu Uzzah kisuh gepna mun”) tin tuni geijin akikouvin ahi.
12 Chule David kicha tah a aum phat chun Pathen adongin aseitai. “Pathen thingkhong chu iti keiman kaga nunglah kit a kakom'a kakoi ngam ding ham?” ati.
13 Hijeh chun David injong Pathen Thingkhong chu David khopia pohlut joh sangin Gath mipa Obed-edom insunga ana lhutjo tan ahi.
14 Hiti chun Pathen Thingkhong chu lhathum Obed-edom insunga ana umden in hiche sung chun Pakaijin Obed-edom insung mite chu anatohna lam cheh uva phatthei ana boh in ahi.