12
David Leng Ahina Dinga Panpi Ho
1 Kish chapa Saul kom Ziklag mun a ana kisel laiya David toh ana umkhom ho chu gal-hang mi David toh gal anasat khom ho chu ahiuve.
2 Hiche miho hi Benjamin phung'a kon Saul sopite ahiuvin thalpi kap them cheh chule akhut jet le vei mangcha thei a songchang bom kap them cheh mi ahiuve.
3 Alamkai uchu Gibiah mi Shemaah chapa Ahiezar ahin; ama bantah a lamkai chu Joash ahi. Gal-hang adang ho chu:
Azmaveth chapa teni Pelet le Jeziel;
Bareah;
Anathoth kho a Jehu;
4 Gebeon a kon Ishmaiah kitipa hi gal-hang somthum lah a lamkai le akithang pen ahi;
Chule Gederah kho a kon Jeremiah, Jahaziel, Johanan le Jozabad ahiuve.
5 Haruph kho a kon Eluzai, Jerimoth, Bealiah, Shemariah le Sephatiah ahiuve.
6 Korah mite phunga kon Elkanah , Isshiah, Azarel, Joezer le Jashobeam ahiuve.
7 Gedor a kon Jeroham chapa teni Joelah le Zebadiah ahi lhon'e.
8 David gamthip noi kulpi a anaum laiyin Gad mite gal-hang galbol them cheh ho chun ana panpi uvin ahi. Amaho chu lumchoije le tengcha kho them cheh Keipi bahkai banga gin umtah chule mol'a sakhi golpai banga chom jangkhai jeng ahiuve.
9 Ezer chu lamkai pipu pen ahi.
Ani channa chu Obadiah ahi.
Athum channa chu Eliab ahi.
10 Mishmannah chu ali chan na ahi.
Jeremiah chu angana ahi.
11 Agup channa chu Attai ahin,
Sagi channa chu Eliel ahi.
12 Aget channa chu Johanan ahi.
Ko channa chu Elzabad ahi.
13 Jeremiah chu asom channa ahi.
Macbannai chu som le khat channa ahi.
14 Amaho hi Gad mite gal-hang lamkai pipu ngen ahiuvin ahi. Chule anemnung pen chu sepai jakhat ahiuvin asang jo pen ho chu sangkhat vel ahiuve!
15 Hiche mite ho chu kum kihei kumbul a Jordan vadung letlha hel'a twi hunglon chun vapam achennau mun a kon'in solam le lhumlam gam'a ana homkhen uvin ahi.
16 Chule adang ho Benjamin le Judah phung mite chu David kulpi achun ahungun ahi.
17 Chuin David jong amaho kimupin ahung pot in, hitin aseije. Kipah tah a keima kithopi dia hung nahiu le eiho loikhat ihiuve. Amavang kagal mite angsung'a keima pedoh dinga hung nahiu le vang ka pului u Pathen'in nangho chunga gotna napeh diu ahi.
18 Chuin Amasai kitipa somthum ho lah a lamkai pa chu lhagao houpina achangin hitin aseiye,
“ David, keiho nanga kahiuve!
Jesse chapa, nangma lam a pang ding kahiuve.
Chamna le phatthei nan najui jing hen,
chule nangma nakithopi jouse jong lolhing uhen,
ajeh chu Pathen'in nangma napanpi ahi,” ati.
Hiti chun David in amaho chu akiloipin asepai te chunga lamkai dingin jong apansah tan ahi.
19 David Philistine te toh kithokhom a gal ana konlai chun Manasseh chate Israel sepai ten jong ana panpi uvin ahi. Ahivangin Philistine sepai lamkai ho chun, “David hi nikho khat le Saul lang joh a hung pang a eiho sugam le ilol u tan a hung pang thei ahi,” atiuvin David toh kilhon khom jing chu ana nom tapouvin ana solmang tauve.
20 Ziglak a David ana kilea Manasseh chate David ana jop ho chu: Adnah, Jozabad, Jediael, Michael, Jozabad, Elihu le Zillethai ahiuve. Amaho lamkaina noiya Manasseh phung'a kon sepai mi 1,000 ahiuve.
21 Hiti chun amaho hin David chunga gal hinbol gamho jouse chu hatah in ana douvun ana kisatpi uvin ahi. Chule amaho hi mihangsan tah gal-hang lamkai thei cheh ahiuvin ahi.
22 Chule aniseh in David langa pang ding le akithopi ding sepai akibe jingin, Pathen sepai tampi banga ahung umdoh kahsen mi ahung kikhom jinge.
23 Pakai kitepna dungjuiya Saul lenggam vaipohna pumpi David chansah dinga Hebron khopia hung kikhom doh sepai ami mong monga akihop jat u hicheng hi ana hiuve.
24 Juda phung sunga kon galvon le tengcha tho thei cheh mi 6,800 alhing e.
25 Chule Simeon phunga gal-hang agom a mi 7,100 alhing e.
26 Levi phunga kon gal-hang mi 4,600 alhingin ahi.
27 Hichea hin Aaron insunga kon Jehoaida lamkaina noiya mi 3,700 alhing e.
28 Chule Zadok kiti galbol mihangsan tah insunga kon'in jong gal lamkai cheh mi 22 alhing e.
29 Benjamin phunga konna Saul inkote galsat sepai mi3,000 ahiuvin chule amaho lah a atamjo hi Benjamin insungmi a kon Saul lam'a pang ana hijing uve.
30 Ephriam phunga kon'in jong galsat hangsan tah mi 28,000 alhingin chule ama hung kondohna phunggui sunga dia jong jaumtah le mi minthang cheh ahiuve.
31 Manasseh nam kehkhat Jordan lhumlam a kon sepai mi 18,000 umho chun David leng ahung hina dingin ana kithopi uvin ahi.
32 Issachar mite le a insungmi a kon'in jong lamkai mi 200 ana lhing e. Hiche miho jouse hi Israel te chunga thil hunglhung ding le phat kihei dan ho hetthemna nei cheh ahiuve.
33 Zebulun phunga kon'in jong galbol a themtah gal-hang sepai mi 5,000 alhing e. Amaho hi David toh kitho khom a galsat dia gal manchah toh kigosa cheh ahiuvin ahi.
34 Naphtali phunga kon'in jong gal-hang cheh gal manchah lhingset a lumpho le tengcha mangcha thei sepai lamkai mi 1,000 le galsat sepai mi 37,000 alhing uve.
35 Dan phunga kon'in jong galmun a dia kigosadem a galsat ding mi 28,600 alhing uve.
36 Asher phunga kon'in jong galbol dan kichuh sepai 40,000 jong galsat dia kigosa ahiuve.
37 Chule Jordan vadung nisolam a kon'in jong Gad le Reuben phung chule Manasseh nam kehkhat chu galsat dia manchah chom cheh kichoi lhingset sepai mi 120,000 alhing uve.
38 Hebron mun hinjon a galsat dia kigosadem a um sepai tampi ho ahiuvin chule Isareal mipi jousen jong David chu Isareal pumpia aleng diuvin adeisah sohkei uve.
39 Chuin a insungmi asopi ten David chu vailhunna ding thil ijakai agongtoh uvin nithum sungin David toh an nehkhom le lengpitwi donkhomna anei uve.
40 Avel a um Isachar, Zebulun le Naphtali ho chengin jong sangan le sangongsao chule sakolpol le bongchal ho chu neh ding pohnan amangcha uvin ahi. Chule neh ding don ding changlhah hihen theichang ga changlhah, bongchal, kelngoi le kelcha ho geiyin golnop bolna din ahin polut uvin ahi. Hichu Israel pumpia dinga kipa golnop loupitah ana hin ahi.