11
Israel Chunga David Leng'a Akipansah
1 Hichun Israel mipite chu Hebron khopia David heng'a chun ahung uvin, “Keiho hi nangma tahsa tah le thisan kahiuve.
2 Masang Saul leng ana hi laia jong, nangma hi Israel te gal lamkai ana hijing jeng nahi, chule Pakai na Pathen'in na seipeh banga 'Nangma hi Israel mipi kelngoi chingpha le lamkai dia lhendoh nahi,'” atiuve.
3 Hiti chun Hebron mun’a chun David in Pakai le Israel upaho masang'ah kitepna theng ana semin ahi. Hichea Pakaijin Samuel kom’a anasei bang chun David chu Israel te dia leng dingin thaonu ana hin ahi.
David In Jerusalem Alonvuh
4 Chujouvin David le Israel mipi te chun Jerusalem (chulai phat a Jebus tia jong ana kihe) mun chu ana nokhum un anasat uve. Hilai chu Jebus mite gamnei dihtah te chenna gam ahi.
5 Chule Jebus miten David chu, “Hilai mun'a nahung lutthei louhel ding ahi!” ana tiuve. Ahivangin David in Zion kulpi, tua David Khopi tia kihe mun lai chu ana lotan ahi.
6 David in asepai miho kom’ah, “Koi hijongleh Jebus mite ganokhum masapen aum leh chu ka sepai jalamkai luboh’a pang ding ahi!” ati. Hichun Jebus mite hinsat nokhum masapen in Joab kitipa, David sopinu Zuriah chapa chu ahung hitoh kilhon'in David gal lamkai panmun masapen chu ana chang tan ahi.
7 David in kulpi chu chennan amangin hichu David Khopi tin akikou e.
8 David in akhopi chu nisolam’a pat avel dung jouse chu akehletbe in ana semtoh in ahi. Chule Joab in amoh chengse chu ana semphan ahi.
9 Hatchungnung Pakaijin apanpi jeh in David thaneina chu ahung hatdoh cheh-cheh jengin ahi.
David Dinga Gal-hang Ho
10 Amaho hi David gal-hang lamkaiya pang Israel mipi toh kitho khom a Pakaijin ana kitepna banga David aleng diuva hin tungdoh ding ho chu ahiuve.
11 David gal-hang lamkai minthang ho chu hiche ho hi ahiuve. Amasapen chu ahile Jashobeam kitipa Hachmon mi David dia gal-hat mi thumho lah a lamkai ahi. Amapa hin achemjam mangcha in akidoupi galmi 300 chu kisattona khat in ana that jouvin ahi.
12 Anina pen chu ahileh Ahoah son chilhah Dodai chapa Eleazar ahi.
13 Amapa hi Pas-dammim a Philistine te ana satlai uchun galmun’a David toh ana kitho khom lhon ahi. Chule hiche galmun hi sakol chang dimset ana ke khah jeh chun Israel mite chu ana jam tauve.
14 Ahivangin Eleazar le David hi galmun’a kon nung chon louvin Philistine mite chu anasat lhon'in ahi. Chule Pakaijin amani ana huhdoh in minthang tah in galjona sangtah jong ana chang lhon e.
15 Sepai lamkai minthang somthum lah a thum ho chu Adulam songkoa David anaum lai chun Raphiam phaicham a Philistine sepai ho toh ana kimuto uvin ahi.
16 David hi chuche phatlai chun akulpi sunga ana um'in ahi. Chule Philistine miten Bethlehem khopi ana toupha uvin ahi.
17 David in amite jah a chun ngaicha tah in hitin aseije, “Ohe, koitobang eingailu toukhat aum a hiche Bethlehem kelkot phunga twitheng khu eigathal peh thei hile,” ati.
18 Hichun gal-hat lamkai thumho chun Philistine bang chu apal keh un, Bethlehem kulpia um twi chu David don dingin ahin choipeh uve. Ahivangin David in hiche twi chu don louvin Pakaiya ding joh in ana katdoh in ahi.
19 Aman, “Pathen'in hiche twi kadon ding hi aphatsah poi. Ajeh chu hiche twi hi ahinkho phal ngam’a twi thal a che ho thisan mantam tah toh kibang ahi,” ati. Hijeh chun David in twi chu ana don pon ahi. Hichu gal-hang mithum ho natoh lolhin vetsahna ahi.
David Ding'a Mihat Somthum Ho
20 Abi'shai hi Joab sopipa ahin, somthum ho lah a lamkai ahi. Amapa hin atengcha keoseh mangchan agalmi 300 jen chu ana that jouvin ahi. Hichea kon chun gal-hat mithum ho bangin ahung minthang tan ahi.
21 Abi'shai hi gal-hat mithum ho lah a apan joulou vang'in mi somthum ho lah a hin lamkai minthang tah khat ahi.
22 Jehoiada chapa Benaiah kiti gal-hang tah Kabzeel kho a kon mi khat jong anaum e. Amapa hin mihat tah ho natoh jong aboldoh in, hiche lah a chun Moab mite gal-hang mini jong ana that in; chule buhbang lhah lai jingkah in jong Keipi bahkai khat jong ana that e.
23 Aman achangseh in khetbuh mai mangchan Egypt gal-hang milentah asan dan feet 7-1/2 a sang tengcha lentah kichoija galvon lhingset a kivonpa chu ana that in ahi. Benneah in Egypt mipa tengcha chu alahpeh in, ama thanan anei e.
24 Hitobang thil nasatah ahin boldoh a kon hin mi minthang gal-hang thumho bangin ahung loupi doh e.
25 Hiti chun ama hi mithum ho lah a apanlou vang'in somthum ho sang'in, jana sangtah ana chang in chule David in ama vengtup a lamkai din apansah tan ahi.
26 David sepai mihat ho chu:
Joab sopipa Asahel;
Bethlehem kho a kon Dodo chapa Elha'nan;
27 Harod kho akon Shammoth;
Pelon mi Helez;
28 Teko'a khoa Ikkesh chapa Ira;
Anathoth khomi Abiezer;
29 Hushath mi Sibbecai;
Ahoh kho a kon Ilai;
30 Netophah mi Maharai;
Netophiah mi Ba'anah chapa Heled;
31 Gibeah kho (Benjamin chate gamsung) a Ribai chapa Ithai;
Pirathon kho a kon Benaiah;
32 Nahale-gash kom'a Hurai;
Arabah a konna Abi-albon;
33 Bahurim khoa Azmaveth;
Shaalbon kho a Eliahba;
34 Gizon kho a kon Jashen;
Harar khoa Shagee chapa Jonathan;
35 Harar khoami ma-ma Sharar chapa Ahiam;
Ur chapa Eliphal;
36 Mekerah khomi Hepher;
Pelon mi Ahijah;
37 Carmel kho a Hezro;
Ezbai chapa Paarai;
38 Nathan sopipa Jo'el;
Hagri chapa Mibhar;
39 Ammon mi Zelek;
Beeroth khomi Naharai, ama hi Zeru'iah chapa galvonpoa pang ahi;
40 Jattir khomi Ira;
Jattir khomi ma-ma Gareb ahi;
41 Hit mi Uriah;
Ahlai chapa Zabad;
42 Reuben phung a kon Shiza chapa Adina ahin,
ama jong hi Reuben chate lah a lamkai khat ahin, Sepai somthum apuije;
43 Maacah chapa Hanan;
Mithna a kon Joshaphat;
44 Ashtaroth khomi Uzzia;
Aroer mi Hotham cha teni Shama le Jeiel;
45 Shimri chapa Jediael
Tiz a konna asopipa Joha;
46 Mahavah mi Eliel;
Elnaam chapa teni Jeribai le Joshaviah;
Moab mi Ithmah;
47 Eliel le Obed;
Zobah a konna Jaasiel ahiuve.