10
Saul Thi
1 Philistine ten Israel chunga gal ahin bol tauve, chule Philistine te masanga Israel te ajam gam tauvin ahi. Gilboa Molsang chunga gal alel uvin akijam chap jeng tauvin ahi.
2 Philishtine ten Saul le achapa te ajam nauva apha uvin, hichun achapa thum-Jonathan, Abinadab, chule Malkishua ho chu athat tauve.
3 Saul din gal kisat chu adou hah cheh-cheh jeng tan, chuin Philistine thalpi kapthem mihon ma Saul chu amudoh uvin chule melse tah in amavo uvin ahi.
4 Hichun Saul’in jong agalvon popa jah a leltah in ahin seijin, “Na chemjam satdoh jengin lang neithat pai jengin, achuti louva ahileh hiche cheptanlou Philistine mite khu hung uvin tin kichepna a einei diu ahitai,” ati.
Ahivanginla agalvon popan chutia bol jeng ding chu atijat behseh jeh in anompon aboldeh tapoi. Hiche jeh chun Saul’in jong achemjam akisadoh jengin, achunga alhun akibah lut jeng'e.
5 Hichea hin agalvon popan jong Saul thi amudoh phat in ama jong achemjam chunga akibah lut pai jengin athi pai-pai tai.
6 Hitobang hin Saul le achapa mi thum ho chu chumun’a chun abonchan athi khom cheh tauvin, alenggam vaihomna phat sungu jong ahung kichai tai.
7 Hichun Jezreel Phaicham'a cheng Israel mite leh asepai teu ajam gam tauvin, Saul le achapa te jong athi tauve, ti amudoh phat uvin achennau khopi jouse adalhauvin ajam gam tauve. Chuin Philistine te ahung kitollut uvin akhopi ho chu alotauve.
8 Ajing nikhoa Philistine mite chu mithi long chomdoh a ahung uva ahileh, Saul le achapa te long chu Gilboa Molsanga amudoh tauve.
9 Hijeh chun ama hon jong Saul galvon chu ahoh lhauvin, chule alu jong akitan lhah tauve. Chuin ama hon amilim doi houvu leh Philistia gamsung pumpia mitin henga Saul athi kipana thu alhangsam le-le tauvin ahi.
10 Ama hon Saul galvon chu a pathen limsemthu ho hou-in sunga akoiyun, chule alu jong chu Dagon hou-in sunga atah uvin ahi.
11 Hinlah Jabesh-gilead khoa cheng mitakip in Philistine ten Saul abolnau ajah doh phat uvin,
12 agal-hang lai jouse akipat uvin Saul tahsa along le achapa te long jouse chu abonchauvin Jabesh khoa ahin polut sohkei uvin ahi. Chujongleh agubuh jouseu chu Jabesh khopia gangpi phung noiya avuiyun, nisagi sungin an angol uvin ahi.
13 Hitobang tah hin Saul chun Pakai thupeh anit pon, chule gaochang mi pou adong len, iti chon ding ham, ti doh ding agopon ahi. Hiche jeh a chu Pakaijin ama chu athadoh a, lenggam chu Jesse chapa David joh apeh ahitai.