9
1 Hijeh chun Israel te chu abonchauvin akhangguiyu chu Israel Lengte Thusimbu. a akijihlut sohkeiye.
Akikaimang Ho Hung Kile
Judah miten Pakaiya kitah louna anei jeh uvin Babylon gamsunga soh changin min akaimang tauve.
2 Agamsung uva hunglut kit a akhopi dung uva hung chenglut masaho chu thempu ho, Levi mite, Hou-In lhacha ho, chule Israel mite adang-dang ho ahiuve.
3 Judah mite lah a Benjamin phung, Ephraim phung, chule Manasseh phung ho ahungun Jerusalem khopia acheng tauve.
4 Judah chapa Perez chapa te lah a inko khat hung kinungle chu achapa Bani, Bani chapa Imri , Imri chapa Omri, Omri chapa Ammihud, Ammihud chapa Uthai chu ahi.
5 Adang inko ahung kinungle ho chu Shilon mite lah a (achapa apeng masapen) Asaiah le achapa te ahiuve.
6 Zerah phung sunga ahung kinungle chu Jevel le a inkote chengse ahiuve.
Judah phung sunga ahung kinungle inko chu abonchauvin 690 alhing uvin ahi.
7 Benjamin phung kon’in Meshullam chapa Sallu ahin, Sallu chapa Hodaviah ahin, Hodaviah chapa Hassenuah ahin,
8 Jeroham chapa Ibneiah ahin, chule Elah chu Uzzi chapa, Micri chapa ahin; chule Meshullam chu Shephatiah chapa ahin, Shephatiah chu Reuel chapa ahin, Reuel chu Ibnijah chapa ahi.
9 Amaho chengse hi ama-ama insung lhah a phung upa cheh ahiuvin, chule akhanguiyu thusim lekhabua kijihlut sohkei ahiuve. Benjamin phunga konna hung kinungle agomin inko 956 alhinguve.
Thempu Ho Hung Kile
10 Thempuho lah a hung kinungle ho chu Jedaiah, Jehoiarib, Jakin,
11 Azariah kitipa Hilkiah chapa, Hilkiah chu Meshullam chapa, Meshullam chu Zadok chapa, Zadok chu Meraioth chapa, Meraioth chu Ahitub chapa ahi. Azariah chu Pathen Hou-In’a vaibol lamkai pipua pang ahiye.
12 Thempu adang hung kinungle ho chu Jehoram chapa Adaiah ahin, Jehoram hi Pashhur chapa, Pashhur chu Malkijah chapa, chule Aiel chapa Maasai ahin, Meshullam chu Meshillemith chapa ahin, chule Meshillemith chu Immer chapa ahi.
13 Hicheng tilouvin jong thempu adang ahung kinungle agomin mi 1,760 ahiuve. Amaho hi apu apauva a insung kailhah a phung upa chengse ahiuvin, chule mihangsan ngen jong ahiuve. Chule amaho hi Pathen Hou-In sunga natonga mopohna nei cheh ahiuve.
Levi Mite Hung Kile Ho
14 Levi phunga mite chu Hasshub chapa Shemaiah ahin, Hasshub chu Azrikam chapa ahi; Azrikam chu Hashabiah chapa ahin, Hashabiah chu Merari chapa te lah a khat ahi.
15 Bakbakkar, Herish leh Galal jong ahiuvin, chutengleh Mica chapa Mattaniah ahin, Mica chu Zicri chapa ahin, Zicri chu Asaph chapa ahi;
16 chule Shemaiah chapa Obadiah ahin,Obadiah chu Galal chapa ahi; Galal chu Jeduthun chapa ahin, chule Asa chapa Berekiah ahi; Berekiah chu Elkanah chapa ahin, ama hi Netophah gamsunga cheng anahi.
17 Kulpi kelkot ngah a pang miho chu Shallum ahin, Akkub, Talmon, Ahiman, chule a inkoteu toh ahiuve.
18 Chule masang chun amaho hi niso lama lengpa kelkot ngah in apang uve. Hiche miho hin Levi mite ngahmun kelkot jong angah uvin ahi.
19 Kore chapa Shallum ahin, Kore chu Ebiasaph chilhah ahin; Korah phunggui a kon ahi. Ama le a inkote, Korah mite chengse chu Hou-In kinbol’in apu apateu Pakai ngahmun ngah a apan bang uvin apang uve.
20 Masang laiya chu Eleazar chapa Phinehas kitipa hi amaho kulpi kelkot mopoa ana pangji ahi; hijeh chun Pakaijin jong amapa chu ana umpi jing jenge.
21 Chule hiche jou chun Zechariah kitipa Meshelemiah chapa chu kikhopna ponbuh kotphunga kot ngah in ana pang jin ahi.
22 Chuche lai chun hongcha kelkot dung ngah dinga kilhengdoh miho mong-mong chu mihem 212 alhing uvin ahi; chule amaho hi akhang guiyu kisimna a akho-akho uva kisim sohkei ahiuve. David le mitva neipa Samuel chun amaho hi akitah jeh uva apu apate hou chu hitobang apanmun uva hi apansah lhon ahiuve.
23 Hijeh a chu amaho le ason achilhahho chu Pakai Hou-In, ponbuh a Hou-In kelkot phung dung ngah a apansah u ahiye.
24 Hiche kelkot ngah a pang ho chu niso lam, nilhum lam, Sahlam le lhang lam’a pang sohkei uva, mun lia pang ahiuvin ahi.
25 Amaho kithopi din a inkoteu, akho mun cheh a hung uva nisagi gia amaho hi ahung panhu jing jengu ahi.
26 Kelkot ngah a pang lamkai cheh Levi mili ho chu indan jouse leh Pathen Hou-In sunga thil kibol jouse ngah a jong pang ahiuve.
27 Amaho hi Pathen Hou-In kimvel a geh jiuva, hitia hi amaho chunga in-nga kiti mong mong chu kikoiya, jingkah seh leh kot ahon jiu ahi.
28 Kelkot ngah a pang mi phabep khat chu Hou-In kinbolna a kimangji manchah thil le lo simtoh in apang jiuvin ahi; ijeh-inem itileh hitobang thilkeo ho chu akilah doh le akikoi lut chan’a aman louna dinga simtoh ji-ji ngai monga ahi.
29 Midang ho jong chu thilkeo dang le manchah thil thengho, changbong le lengpitwi, thaotwi, gimnamtuui le adang-dang lhutnam ding anamtuui ho vetup din apansah uvin ahi.
30 Hinlah thempuho chu lhutnam ding gimnamtui chohhal din apansah uve.
31 Levi mi, Mattithiah kitipa leh Korah insung kon Shallum chapa apeng masapen pa chu changlhah pheng semna din avaibol’in apangin ahi.
32 Chujongleh Kohath phunga kon mi phabep jong chu cholngah nikho seh leh todoh ding changlhah semin apanguvin ahi.
33 Levi miho lah a tumging them tah-tah ho chu Hou-In sung dan’a achengden jeng uvin ahi. Amaho hi Hou-In kinbolna ho a ongthol’in aum theiyuve; ijeh-inem itileh amaho hi asun ajan a lasa a pang jingjeng ahiuvin ahi.
34 Mi hichengse hi Jerusalem Levi miho apu apauva a insung lhah cheh a phung upa jeng ahiuve.
Lengpa Saul Insung Kailhah
35 Gibeon pa Jeiel chu Gibeon khopia achengin ahi. Ajinu min chu Maacah ahin,
36 chule achapa apeng masapen chu Abdon ahiye. Jeiel chapa te adang ho chu Zur, Kish, Baal, Ner, Nadab,
37 Gedor, Ahio, Zechariah, chule Mikloth ahiuve.
38 Mikloth hi Shimeam pa ahiye. Inko hijat hi Jerusalem khopia kinaicha chan ana cheng uve.
39 Ner hin Kish ahingin,
Kish in Saul ahinge.
Saul’in Jonathan, Malkishua, Abinadab, chule Esh-baal ahinge.
40 Jonathan chu Merib-baal pa ahin,
chule Merib-baal chu Micah pa ahiye.
41 Micah chapa te chu Pithon, Melech, Tahrea, chule Ahaz ahiye.
42 Ahaz hi Jadah pa ahi.
Jadah chu Alemeth, Azmaveth, chule Zimri pa ahi.
Zimri chu Moza pa ahi.
43 Moza chu Binea pa ahi.
Binea chapa chu Rephaiah ahin,
Rephaiah chapa chu Eleasah ahin,
chule Eleasah chapa chu Azel ahiye.
44 Azel hin chapa gup ahingin, amin'u chu Azrikam, Bokeru, Ishmael, Sheriah, Obadiah, chule Hanan ahiuve. Amaho chengse hi Azel chapa te ahiuve.