15
Thingkhong Toldohna Dia Kigotna
1 David in akhopi a chun injong tampi anasa in chule Pathen Thingkhong koina ding jong ponbuh phatah ana songin ahi.
2 Hichun David in hitin asei e, “Pathen Thingkhong puding chu Levi mite tailou adang pang thei louding ahi. Pakaijin amaho put dinga alhen'u ahin tonsot a ama kin abol diu ahi,” ati.
3 Hichun David in Pakai Thingkhong koina ding mun semna apulut dingin Jerusalem khopi a um Israel mite chu ana kou in ahi.
4 Hiche a ana kikou miho chu ahile Aaron thempu le Levi chate ho ahiuve.
5 Uriel lamkaina a kon'in Kohath nambah ami 120 ahi.
6 Asaiah lamkai na a Meraei nambah akon mi 220 ahi.
7 Joel lamkaina akon Gershon nambah mi 130 alhing uve.
8 Elizaphan son chilhah akon Shemaiah lamkaina mi 200 alhing e,
9 Hebron son chilhah a kon Eliel lamkaina in mi 80 alhing uve.
10 Aminadab lamkaina in Uzziel chilhah te chu mi 122 ma alhing uve.
11 Chuin David in thempu ho Zadok le Abiathar chule Levi mite lah a kon'in: Uriel, Asaiah, Joel, Shemaiah, Eliel le Amminadab ho chu akou khom sohkeiyin ahi.
12 David in amaho kom'a chun hitin aseiye; “Nangho Levi insung mite dia lamkai pipui nahiuve. Hijeh chun Israel Pakai Pathen Thingkong chu akoina dinga kagotna mun a nahin nungput kitna diuvin nangho ahin chule na insung mite cheng nabonun kisutheng un,” ati.
13 Pakaijin adoh lou jeh uchun Pakai vantil Pathen lunghanna ichung uva ana chu in Levi mite chun thingkong chu na-na pohlut theilou u ahi.
14 Hijeh chun thempu ho le Levi mite jouse chun Israel Pakai Pathen Thingkhong Jerusalem mun’a putdohna din kilhaina ana nei uvin ahi.
15 Chuin Pakaijin Mose athuhil bang chun Levi miten Pathen Thingkhong chu alengkou uva moljol in ahinpu uvin ahi.
16 Hichun David in jong lamkai ho chu thu apen Levi mite lasathem le tumging them hon kipala sah a tumging le semjang sai a khutbeh gintho dingin aseiye.
17 Chuin Levi hon Joel chapa Heman le a Levi chankhompi ho alhengdoh un: Levi tetoh sopi Merari nambah sunga kon: Berekiah chapa Asaph ahin, chule Merari phunga kon Kushaiah chapa Ethan ahi.
18 Chule amaho kithopi dingin: Zechariah, Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Eliphelehu, Mikneiah, le kelkot ngahpa—Obed-edom le Jeiel ahiuve.
19 Tumging them lah a Heman , Asaph le Ethan ho chu sum-eng semjang sai dingin ana lheng uvin,
20 Chule Zechariah, Aziel, Shemiramoth, Jehiel, Unni, Eliab, Maaseiah le Benaiah ho cheng chu selangdah sai din ana lhengdoh uvin ahi.
21 Chule Mattithiah, Eliphelehu, Mikneiah, Obed-edom, Jeiel chule Azaziah ho chu la aw lhingset sahna a kimang semjang saidin apan sah uve.
22 Chuin Levi te lah alamkai Kenaiah hi lasah lam bolthei tah ahijeh chun la lamkai din apansah uve.
23 Chule Pathen Thingkhong vengtup dingin Berekaiah le Elkanah chu ana pansah uve.
24 Shebanaiah, Joshaphat, Nethanel, Amasai, Zechariah, Benaiah le Eliezer ho cheng hin Pathen Thingkhong mai a kitol uva saki a kisem pengkul amut diu ahi, chule Obed-edom le Jehiah chu Pathen Thingkhong vengtup in apansah uve.
25 David le Israel upate chule sepai lamkai pipuho chun Pakai Kitepna Thingkhong chu Jerusalem a ahin pohlut a loupitah a kipapi dingin Obed-edom inpia chun ana cheuve.
26 Chule Pathen'in Levi mite akithopi a, ama hon Pakai Kitepna Thingkhong ahin pohlut jeh u chun bongchal sagi le kelngoi sagi kilhainan ana that uve.
27 David le Levi mite Pakai Thingkhong pua pang ahin, lasa a pang ho le la lamkai Kenaniah ho chu tupat ponnem in ana kivon uve. David jong chun thempu ho lengban khat jong ana kiban in ahi.
28 Hiti chun Israel mite chun kipana aw thong’a sampum le sumkon gin le saki mutgin chule khutbeh behgin le semjang saiging tho in Pakai Kitepna Thingkhong chu ahin pulut uvin ahi.
29 Pakai Kitepna Thingkhong David khopia ahin pohlut uchun, Saul chanu Michal in inbang kot apat ahin vetsuh le leng David kipa thanop thoa achop le chu amun ana japi in ahi.