16
David In Kilhaina Thilto Abol
1 Hichun ama hon Pathen Thingkhong chu David in akoina dia ponbuh hoitah asonna mun a chun ahin polut uvin ahi. Chua chun ama hon Pathen a kilhaina pumgo thilto jong ana kat uvin ahi.
2 David in kilhaina kin anei jouvin amite chu Pakai min'in phatthei aboh in ahi.
3 Chujouvin aman ami Israel te numei pasal abonchauvin changlhah alhang a kisem ahin, lengpithei ga a kisem nehthei ana pen ahi.
4 David in Levi mite chu Pakai Thingkhong maiya Israel Pakai Pathen phattheina sima, avahchoi lasah le thangvah dingin mipi jouse lamkai din ana pansah e.
5 Asaph chu amaho lah a lamkai ahin, ama hin lasahna a kimang sum-eng vogingin apangin ahi. Ama bantah a chu Zechariah ahin, chule Jeiel, Shemiramoth, Jehiel, Mattithiah, Eliab, Benaiah, Obed-edom le Jeiel ahiuve. Amaho hi semjang le selangdah sai a pang ahiuve.
6 Chule Pathen Kitepna Thingkhong masang a chun thempu Benaiah le Jahaziel chun tanglouvin sumkon ana mut lhon'in ahi.
David In Pathen Avahchoina La
7 David in hiche nikho chun Asaph le ami Levi te chut Pakai thangvahna la ana peuvin ahi.
8 Pakai chu thangvah na peuvin chule aloupina seiphong uvin.
Vannoi leiset pumpin athibol jouse hecheh hen.
9 Thangvah toh thon ama vahchoi un.
Namtin jouse chung a athilbol kidang ho hillhang uvin.
10 Amintheng chu hapah in kipapi un;
eiho Pakai mite ihiuve.
11 Tantih neilouvin Pakai thahatna chu;
hol jingun lang hou uvin.
12 Thil kidang tampi le datmo umtah,
aboldoh ho leh athutanna ho geldoh jingun,
13 nangho alhacha Israel chate ho,
chule Jacob son chilhah anam deilhen mite nahiuve.
14 Ama hi Pakai eiho Pathen ahi.
Ama thupeh dihtah hi vannoi jousen amu ding ahi.
15 Aman a itih khangin jong
akitepna ageldoh jingin ahi.
16 Hiche hi aman Abraham toh kitepna asem chu ahin
chule Isaac henga kitepna ana nei chu ahi.
17 Aman hichu Jacob heng a Israel mite toh
a-itih khanggei a tonsot adia kitepna thulhuh le suhdetna ana nei ahi:
18 “Nangma chan ding goulo na ding Canaan gam chu
kapeh ding nahi,” ati.
19 Aman hiche aseilai chun nangmaho Canaan gam'a hon lhomcha a,
khopem banga na-na umlai u ahi, ati.
20 Hiti chun amaho chu namkhat apat namkhat a anavahle uvin,
chule lenggam khat apat gamdanga ana vahle uve.
21 Chujongleh aman amaho chu koima suhgentheina le bolgimna ana neisah poi.
Amaho jeh in leng dang ho joh thugahna ananei jon ahi:
22 “Ka lhenchomte natohkhah thei loudiu,
chule kathemgao ho jong nasuh genthei loudiu ahi,” ati.
23 Leiset pumpin Pakai chu vahchoi hen!
Chule aniseh in ami huh hingna thupha chu seiphong leuvin.
24 Namtin vaipi lah a athilbol loupi ho phongjal un.
Athilbol kidang ho mitin vaipi hetsah un.
25 Pakai chu thunei pen ahi! Amin loupi vahchoi dia lomtah ahi!
Pathen dang jouse sanga gin le jadia lom ahi.
26 Namtin vaipi dang ho hou hi semthu milim doi pathen ahin,
eiho Pakai vang hi vanlaijol sempa ahi!
27 Jana le lalna jouse;
thahatna chule kipana Pakai ama kom'a cheng ahi.
28 Vannoi namtin vaipin, Pakai hecheh un,
athahatna le aloupina chu hecheh hen.
29 Pakai chu loupina jouse chang dia lom ahi!
Aumpina noiyah na thilto hinpo uvin.
Aloupina theng jousen Pakai chu houvun.
30 Leiset mite jouse Pakai masang a tijan kithing jeng hen.
Leiset jong linglouhel in dettah in ding jing hen.
31 Van'a le leiyah kipa thanop nan lodim soh hen!
Pakai vaihomna namtin vaipi jousea seiphong leuvin,
32 Twikhanglen le asunga cheng jousen jong avah choina sam uhen!
Loulai dung le mim le chang ho jong kipah thanom in hung pohjal jeng uhen!
33 Gammang thingphung jouse jong kipa lasah in kilingdoh soh hen,
Pakai chu leiset a thutan’a ahung teng.
34 Pakai chu aphatna jallin thangvahna peuvin!
Ama a um tahsan umtah mi ngailutna chun tonsot in athoh jing e,
35 “O Pathen eihuhhing pauvin nei huhhing un!
Namtin vaipi lah a kon'in neipui khom uvin lang neihuhdoh uvin,
chuteng nangma mintheng chu
kakipapi uva ka vahchoi diu ahi.”
36 Pakai Israel Pathen chu vahchoiyun,
ama chu tonsot-tonsot geiya hingjing ahi!
Chule amite jousen “Amen!” tin sam uhen chule Pakai chu vahchoiyu.
Jerusalem Le Gibeon A Pathen Hou
37 Hiti chun David in Pakai Kitepna Thingkhong a aniseh a angaichatna jouse a natong le dingin Asaph le ami Levi te chu ana pansah in ahi.
38 Hiche ho lah a chun Obed-edom (Jeduthun chapa), Hosah le Levi mite mi somgup le get chu kotkhah ngah in ana pang uve.
39 Chule David in Zadok thempu le Levi mite chu Gibeon gamsung a Pakai Houbuh a kimangcha din ana koijin ahi.
40 Pakaijin Israel te chunga dan thupeh jui dia ana nei bangin ama hon Pakai a jingkah nilhah in kilhaina thilpeh maicham jong ana nei uve.
41 Pakai akitahna le mingailutna tonsotna athohhatna jallin ama thangvahna pedingin David in Heman, Jeduthun, chule midang ana minphah chan jong ana pang uvin ahi.
42 Hiti chun ama hon sumkon mut gin le khutbeh gin le tumging thei jat tampi ho mangchan Pathen ana vahchoi uve, chule Jeduthun chapa chu kotkhah ngah in ana pansah uve.
43 Chujouvin mipi jouse chu ama inlam cheh a ana kile uvin David jong ama inlam'a a insung mite phatthei boh dingin ana chetan ahi.