17
David Chung'a Pakai Kitepna
1 David chu ama inpia ana umlaijin, themgao Nathan chu akouvin akom'a hitin aseiye, “Ven, Keima la Cedar thinga kisa innom tah a kachengin, ahivangin Pakai Kitepna Thingkhong vang chu ponbuh a kisa mai-mai noiya ana kikoi in ahi!” ati.
2 Nathan in adonbut in, “Nalunga um nagel chan chu bollin ajeh chu Pathen'in naumpi nai,” ati.
3 Ahivangin, hicheni jantah chun Pathen'in Nathan kom'a anasei e,
4 “Chenlang kasohpa David kom'a gaseipeh tan, 'Hiche hi Pakaijin aphondoh ahi: Nangma hi keima umna ding mun sading chu nahipoi.
5 Keiman Egypt gam a kon Israel te kahin puidoh nikho apat tuni geijin insunga kacheng kha hih laiye. Hiti chun ponbuh a kisong Houbuh munkhat a kon mun chom-chom a kana ki chon le jin ahi.
6 Keiman Israel mite toh kilhon khom ding le kamite kelngoi chinga pang lamkai ho kom'a jong, “Ipi ding'a Cedar thinga kisa in hoitah nei sahpeh lou uham?'” tin kasei khapoi.
7 “Tun nangma chen lang ka lhachapa David kom'a hitin gasei tan, 'Hiche hi Van Sepaite Pakaijin aphondoh ahi: Keiman nangma hi hamhing lah a kelngoi chinga napan na a kon kapuidoh a kami Israel te chunga lamkai dia kapan sah ding nahi.
8 Chule keiman nangma na chena mun jousea kalhonpi jinga, nangma masanga na melma te jouse jong ka suhgam jeng ding leiset chunga mi minthang ho banga namin kakithan sah ding ahi.
9 Chule kami Israel te dinga achenna diu mun jong kapeh ding dettah a lungmongsel a cheng uva koiman jong asuhling theilou diu ahi. Namdang ten jong masanga banga asuhmang kitlou diu ahi.
10 Keiman aphat dungjui a kami Israel te chunga Lamkai vaihom dinga ka pansah jing ding ahi.
Chujongle, na melma teu aboncha ka suhgam ding chuche kal a jong Pakaijin na lenggam sungu phatthei aboh ding ahi!
11 Na hinkho abei nunga napu napate kom'a dia nache nungteng jongleh, Keiman na dalhah nason na chilhah te lah a nachapa te khat pen, ka dopsang ding alenggam jong ka hatsah ding ahi.
12 Amapa chun keima dinga Hou-In khat eisah peh ding chule keiman alenggam a laltouna chu a-itih chan a kaphudet jing ding ahi.
13 Hiche mipa dinga chu keima hi apa kahi a, ama chu kachapa hi ding ahi. Nangma masanga mipa chunga kangailutna kana lahdoh banga, ama chunga hi kanung lahdoh louding ahi.
14 Keiman ama ka insung le ka lenggam sunga lenga ka pansah jing ding, chule alenggam a laltouna chu atonsot geiya long louva um jing ding ahi,'” ati.
15 Hiti chun Nathan ahung kile in Pakaijin amusah thil ho jouse chu David kom'a ahung seipeh tan ahi.
David Thangvah Taona
16 Chuin Lengpa David alut in Pakai angsunga atouvin ataove,
“O Pakai, Pathen keima hi koi kahi a, chule ka insung mite hi ipi hija, hichan geiya hi neihin puipeh uham?
17 Tun, O Pathen, na lhachapa keima khunung a lenggam lhoutah hunglhung ding jong nei seidoh peh in ahi! O Pakai Pathen, milentah khat kom'a sei bangin kaheng'a naseije!
18 Hitobang a na lhachapa nei jabolna hi nangma kom'a ipi kaseibe nahlai ding ham? Na lhachapa keima itobang kahi la neihet sohkei ahitai.
19 Na lhachapa keima neigel khohna jal le nalungel lamtah bangin kachunga thil loupi tampi mite mutheijin na boldoh in ahi.
20 “O Pakai, nang tobang koima dang aumpoi. Nangma tobang Pathen dang jong kanei pouve!
21 Nami Israel nam mite tobang leisetna koidang um am? O Pathen, nangma tah in namite asoh channa gama kon'a na-na huhdoh koi nam um kha'm? Nangman namin lentah na hisahna dingin Egypt a kon'a namite na-na lhatdoh ahi. Nangman thil kidangho na-na bol'in alampiuva ding namdang te chu na-na nomang'in ahi.
22 Nangman Israel mite chu nangma mite dihtah mongin na-na lhengdoh in, O Pakai, a Pathen'u nahi tan ahi.”
23 “Chule tun, O Pakai, Keima na lhacha kahitai; keima le ka insungmi chung chang thua nakitepna bangin bol jeng tan. Hiche kitepna hi a itih chan a ding hita hen.
24 Nangma min kiphutdoh henlang chule a itih in kijabol hen chuteng mijousen, 'Van Sepaite Pakai, Israel dinga Pathen chu, Israel te Pathen ahi!' tia asei diu ahi. Chule nasohpa David insung jeng jong nangma angsunga phudet a um ding ahi.”
25 “O ka Pathen, Keima hi nangma anga ngamtah a hungtao a kahi, ajeh chu na lhachapa keima hi ka in ding nei sahpeh a lenggam khat nei tundoh peh ding chu kicheh tah in nei musah tai.
26 O Pakai, nangma bou Pathen nahi. Chule hitobang thilpha tampi hi na lhachapa kei dingin kitepna nanei e.
27 Chule tunjong, na lhachapa insung phatthei naboh a hichu na lhachapa a dinga a-itih gei a nangma masanga um jing ding ahi. Ajeh chu O Pakai, nangma phatthei boh chu ipi hijongleh phatthei boh chang jing ding ahi!” ati.