18
David Sepaite Galjona Ho
1 Chule David in Philistine te ana kisatpin ana jouvin Gath khopi le avel a kho umho jong chu analo in ahi.
2 Chuin David in Moab mite chu ana kisatpin ana joukit in ama khutnoiya aum uvin don le kai jong David ana peuvin ahi.
3 David in jong Euphrates luipang a kon thahat tah a ahung kontou lai uvin Zobah lengpa Hadadezer sepai te chu Hamath chan in anasat in ajouvin ahi.
4 Hiti chun David in kangtalai 1,000 ana manin, chule kangtalai tol'a pang mi 7,000 amanin, keng lamjot sepai 20,000 ahi. Aman kangtalai kaiya pang sakol jouse akeng atanpeh in kangtalai 100 kaikham bou akhen in ahi.
5 Chule Aram mite Damascus khopi a kon'a Hadadezer lengpa kithopi dia hung kon ho chu David in mi 22,000 jen ana that in ahi.
6 Hichun David in Aram mite gam a Damascus khopi a chun sepai tampi atousah in, Aram mite chu David khutnoiya anaum uvin don le kai jong ana peuvin ahi. Hijeh chun Pakaijin David chu agalkon nalam jousea galjona apejing e.
7 David in Hedadezer sepai lamkai ho kipoh sana lum ho jouse chu Jerusalem ah ahin polut in ahi.
8 Hadadezer khopi Tebah le Cun a chun David in sum-eng tampi ahin kilah in chule Solomon in hiche sum-eng ho chu kisilna twikong le sum-eng khompi le Pathen houna in'a manchah ding thil dang semnan aneijin ahi.
9 Hamath lengpa Toi in Zobah lengpa Hadadezer sepai te jouse David in abonchan ajoutai tithu anajan,
10 hichun amapan achapa Joram chu David galjona kipapi dingin anasol in ahi. Ajeh chu Hadadezer hin Toi ana kisatpi jinglai ahi. Joram chun David chu thilpeh tampi sana, sum-eng le dangka ho anapen ahi.
11 Leng David in hiche thilpeh hung jouse ahin sum-eng le sana namdang mite—Edom, Moab, Ammon, Philistia, le Amalek mite kom'a ahin lahdoh jouse chu abonchan Pakaiya dingin ana tohdoh in ahi.
12 Zeruiah chapa Abishai kitipa chun Chikhuh Phaicham a chun Edom mite mi 18,000 jen ana that in ahi.
13 Chuin aman Edom gamsung a chun sepai atousah in chule Edom mite chu David khutnoiya anaum uve. Hiti chun David chu achena chan a Pakaijin galjona apejingin ahi.
14 Hijeh chun David chu Israel pumpia lengvai pon apangin ama natoh thilbol ho jouse chu ami Isareal te a dinga thilpha le adih jeng ahi e.
15 Zeruiah chapa Joab chu sepai lamkai in apange. Ahilud chapa Jehosaphet chu thuching le lekha sunin ana pang in ahi.
16 Ahitub chapa Zadok le Abiathar chapa Ahimelech chu thempun apang lhon'in ahi. Seraiah kitipa chu thutanna mun a lekha sunin apang e.
17 Jehoiada chapa Benaiah chu lengpa venga pangho chunga vaipon ana pang e. Chule David chapa te chu lengpa kinbolna a vaihom pipun ana pang uve.