19
David In Ammon Mite Ajo
1 Phat chomkhat jouva Ammon mite Lengpa Nahash ahung thi chun, achapa Hanun chu lengin ahung pang tai.
2 David in, “Keiman Hanun chunga hi kakitahna kapohdoh ding ahi, ajeh chu apa Nahash hi keima chunga akitah jingin ahi,” ati. Hiti chun David in Hanun pa thina jeh a lunghemna akon lungmon sahna dingin asottolle ho asol'in ahi.
Ahivangin David sottolle ho Ammon gam alhun phat un,
3 Ammon mite lamkaipa chun Hanun kom'a chun, “Nangman hiche mipite hi napa jabolna jal'a hunga nagel mong ham? Ahipoi! David in amaho hi agam umdan ho vetoh le a chujou tengleh hung kon uva agamsung mite jouse hi nokhum ding lung agot joh ahi,” tin aseiye.
4 Chuin Hanun in David sottolle ho chu amanin asam'u avopeh un chule aponsil hou jong akongjang atobuh dung uva achetan peh in abon chauvin David henga anungsol tauve.
5 David in amite chunga hitobang thilsoh umchan le asottolle ho jachatna ho thu ajah jeh chun Jericho khopi achun akhamul'u ahung khandoh kah uva thamden uva chujou teng hung kile dingin thu athot e.
6 Ammon mite chun, David lungdouna athilbol u ahetdoh phat uchun Hanun le Ammon mite chun Zoab le Aramaacah chule Ram-naharaim gam a kon sakol touthem sepai le kangtalai tampi thalahna din dangka pounds 75,000 jen ana thot in ahi.
7 Chujongleh ama hon kangtalai 32,000 jong athalah uvin, Maacah le asepai te jong ana kithopi uve. Chule hiche sepai ho chu Medaba mun a Hanun in ama khopi tah a ana pansah sepaiho toh chun ana umkhom uvin ahi.
8 David in hichu ajah phat in Joab le asepai gal-hang ho chu ama kisatpi din anasol paijin ahi.
9 Hichun Ammon mite jong ahung kondoh un khopi kelkot phung'a chun galsat dingin ahung kigoldoh tauve, chule galsat dia hung kon lengho jong chun ama hina thei cheh in galsat dia kigotna panmun akisem uvin ahi.
10 Joab in amelma ten anung ama a ahin nokhum amudoh phat in Israel te sepai hatlai ho chu Aram sepai te kisatpi dingin alhengdoh in ahi.
11 Chule aman sepai dang adalhah chengse chu asopipa Abishai lamkaina noiya Ammon mite kisatpi dingin apansah e.
12 Joab in asopipa jah a chun, “Aram mite chu kahin jolel le neihung kithopi ding chule nangin jong Ammon mite najolel le kahung kithopi ding nahi.
13 Hangsan'un! I-Pathen ule imite uva dinga gal isat diu ahi. Pakaijin ama deilam'in hinbol jeng tahen,” ati.
14 Joab le asepai ten Aram mite àsat un anadel jam tauve.
15 Chule Ammon miten Aram mite jam amudoh phat uchun Abishai a kon'in ana jam un akhopi uva ana kile tauve. Chuin Joab chu Jerusalem a akile tan ahi.
16 Aram miten Israel te ajolel u ahetdoh phat uchun Euphrates luipang le avel dunga kon'in Aram sepai te akoukhom in amaho chu abon'un Hadadezer sepai jalamkaipa thunoiya ana umsah uvin ahi.
17 David in hitobang thil umdan ho ahetdoh phat in Jordan Vadung vel dung jousea Israel sepai te chu galsat din ana koukhom in Aram mite toh ana kisat tauvin ahi.
18 Chule Aram mite chu Israel te a kon'in ana gallel un, ana jamkit tauvin ahi. Hichea chun David sepai ten Aram sepai lamkai pipu Shobach pum in sepai kangtalai tol mi 7,000 le kenglam sepai mi 40,000 jen ana that uvin ahi.
19 Hadadezer thunoi a leng umhon jong Israel ten gal ajo amudoh phat uvin, David angsunga akipelut uvin ama thunoiya aum tauve. Chujouvin, Aram miten a-itih a jong Ammon mite akithopi kit diu anom tapouve.