20
David In Rabbah Ajo
1 Chuche kum chavang lai a lengpa galbol dia ahung chun Israel mite chun Joab lamkaina noiya Ammon mite anasat uvin ahi. Hichun aman Rabbah khopi chu ana um khum'in ahi. Ahin, David chu Jerusalem'a chun ana umden'in ahi.
2 Rabbah khopia David ahung lhunin lengpa lallukhuh chu aladoh in aman akikhuh in ahi. Hiche lallukhuh chu sanapah jem a kisem chule agih dan jong pound somsagi le nga ahi. David in jong thilman tampi khopia chun ahin kipoh in ahi.
3 Aman Rabbah kho mite chu soh in ana mangin, amaho chu thing-at, thih khenchi a leilai le heicha a thing chanin ana pansah in, Ammon mite chu engbolna ana pen ahi. Chujouvin David le asepai te chu Jerusalem a akile tauve.
David In Philistine Chunga Galojana Anei
4 Chujouvin, Israel te le Philistine te chu Gazer mun a gal in ana kisat kit un ahi. Hiche akisat nauva hin, Hushah kho a Sibbecai jin milen gal-hat minthang ho chilhah a kon Saph kitipa ana that in chule Philistine ten gal ana lel tauvin ahi.
5 Philistine te toh gal kisatna mun khat ma ana umkit in, hichea chun Elhanan chapa Jair chun Gath khoa kon Goliath sopipa Lahmi chu ana that in ahi. Chule Lahmi tenglum chu lentah ahi.
6 Philistine tetoh Gath khopia gal ana kisatna mun uva jong chun milentah gal-hatmi khutjung gup le kengjung gup nei abon'a somni le li nei khat ana pang e, ama hi gollui lai gal-hang minthang ho son chilhah a kon ahi.
7 Chule aman Israel mite totnopna le noise tah a anabol jeh chun David sopipa Shimea chapa Jonathan in ana that tai.
8 David in anatha Philistine gal-hang mite hi Gath khoa kon milui gal-hang ho son chilhah jeng ana hiuve.