21
David In Mijat Asim
1 Israel douna din, Satan’in Israel chate mijat simdin David lengpa atildoh tai.
2 Hijeh hin David in Joab le a sepai lamkai ho jah ah, “Sahlam gamkai Beersheba apat lhumlam gamkai Dan chan gei Israel mijat gasim uvin lang, nasimdoh jat u chu kaheng’a hinchoi’un, keiman kahet nom’e,” ati.
3 Ahin Joab in adonbut in, “Pakaijin Israel chate ajat ja’n hin punsah hen. Ahin ka pakai le ka lengpa, amaho khu namite hilou ham? Iding’a ka pakai pa’n hiche nabol nom ham? Iding’a Israel te chung’a themmona lhunsah ding nagot ham?” ati.
4 Ahivang’in, lengpan athusei chu apetchah in, hijeh chun Joab jong lengpa thupeh nit in Israel chate chenna gam jousea mijat agasim in Jerusalem ahung kile tai.
5 Hichun asimdoh jat chu David heng’a ahetsah tai. Gal-hang chemjam lamthei cheh chu mi 1,100,000 alhingin, Judah mite jong 4,70,000 alhing uve.
6 Hiche jatsim ahin Joab in Levi mite le Benjamin mite vang asimtha pon ahi ajeh chu, lengpa thupeh chu Joab in ama boldia adeimo behseh jeng ahi.
David Chonset Jeh A Thutanna
7 Hichun, Pathen'in mijat sim kibol chu alunghanpi jeh in ami Israel te chu gotna achan tan ahi.
8 Chuphat in David in Pathen jah a hitin asei tai, “Vo Ka Pathen, keiman nangma doumah tah ka boldoh tai, ngol-hoitah hijongleh nei ngaidam kit in,” ati.
9 Chuphat chun, Pathen'in David ding’a mitva neiya pangpa Gad heng’a hitin aseitai.
10 “David heng’a gache’n lang Pathen'in hitin aseiye tin gaseipeh tan, 'Gimbolna thum lah a hin khat kilhen inlang, hichu keiman ka guilhun sah tei ding ahi,” ati.
11 Hijeh chun David heng’a Gad ahung’in hitin aseitai, “Pathen'in hicheng thum hi na gonpeh tai.
12 Kum thum sung’a kellhah ding nadei’am, nagal miten chemjam a lhathum sungsea nasuhgam ding nalhen ding ham ahiloule, nithum sunga gamna hise nasatah a lhung’a na lenggam sung pumpia Pakai vantil in namite asuhgam ding hoijoh nalhen ding ham? Eihin solpa Pathen heng’a iti kalhut ding kilhen'in,” ati.
13 “Ka dinmun ahahsa valtai!” tin David in Gad jah a aseitai. “Iti nama jongleh mihem khut a kipeh sang’in Ka Pakai, Ka Pathen khut joh a kipelut tang’e. Ajeh chu, amihepina kidangtah chu kakinem nalaiye,” ati.
14 Hichun, Pathen'in Israel te lah a gamna hise alansah tan, mi 70,000 jen in thina atoh tai.
15 Chuban’a jong, Pathen'in Jerusalem sugamhel din mithat vantil ahinsol tan ahileh, akigot jinglai in, Pathen'in alung ahin heiyin, vantil jah a, “Aphaset tai! Ngatan!” tin aseitai. Chupet tah chun, mithat vantil chu Jerusalem chungvum’a ana pansa tan ahi. Hichu Jebus mipa Araunah changphol ahitai.
16 David in vanlang a Pakai vantil ten chemjam pum a Jerusalem suhgam ding agot u amu phat in, Israel lamkai pipuho toh kisih pumin khaodip ponsil pum’in tollang angauvin ahi. .
17 Chuin, David in Pathen jah a aseitai, “Israel te mijat sim ding’a thupeh nei chu keima kahi, abolkhel le achonse chu keima kahi, kamite vang kelngoi bang’a themmona ipi aboldoh u hitam? O ka Pakai le ka Pathen’u, nalung hanna kei le ka insung mite chung’a chuhsah tan, namite vang sugam hih hel in,” ati.
David In Maicham Asah
18 Hichun, Pakai vantil’in Gad jah a David achetou a Jebus mipa Araunah changphol a maicham phung asah din thupeh aneitai.
19 Hijeh chun David in Gad thulhut bangin Pathen thupeh chu boldin achetou tai.
20 Araunah le achapa te mili chun suhlou chang ana den pettah un Vantil chu amu uvin ahileh, achapa te chu akichat jeh un ajam uvin akisel gam tauve.
21 Araunah in David chu changphol ahinphah amu phat in, atohban dalhan Lengpa chu ana bohkhup tai.
22 David in Araunah jah a hitin aseitai, “Na Changphol mun hi aman lhingsel keiman nape’ng ting, Pakai maicham phungkhat satang’e, chuteng Pakai lung hanna hiche gimna hise jong thip tante,” ati.
23 “Kilah inlang nadei bangtah in mangcha tan, chujongleh keiman pumgo thilto a manchah din bongchalte, maicham mei tina din changsuh thing chule, thilto din suhlou chang jong pehtha inge,” tin Araunah in David jah a aseitai.
24 Ahivangin Leng David in Araunah adonbut in, “Keiman aman lhingset napeng ting, nangma thil vang maicham thilto din kilah tha pong’e,” ati.
25 Chuin, David in Araunah chu sana pheng 6000 chu changphol man dingin apetai.
26 Hilai mun ahin David in maicham phung khat asan, pumgo thilto le kichamna maicham asemin, taona amang tan ahile, Pathen'in asanpeh hetna din van'a kon meikou ahin sol lhan pumgo thilto jouse akavamhel tai.
27 Hijeh chun Pathen'in chemjam ana lam’a kigo vantil chu achempai a anungkoi din thu apetai.
28 Pathen'in amaicham sem asanpeh ahet phat in David in jong Araunah changphol mun achun kilhaina maicham asemtai.
29 Hiche phat laiya hi, Pakai Houbuh maicham le pumgo thilto maicham phung, Mose in gammang laiya anasem chu Gibeon mun a aumpet ahi.
30 Ahivangin David chun hiche laimun a chu Pathen lung gahol a gache ding chu agel le mithat vantil chemjam toh gotsadem a anaum jeh chun angapcha pon ahi.