23
Levi Mite Mopohna Ho
1 Chuin David ahung teh in, akum atamphat in achapa Solomon chu Isreal te lengpan apansah tai.
2 Aman Isreal gam a lengte, thempuho chule Levi mite akhom in ahi.
3 Levi te chu kum somthum apat chunglam se chu khat-khat in akisim'un, pasal mi 38,000 alhing ui.
4 David in aseijin, “Levite jouse lah a mi 24,000 chu Pathen Hou-In sunga na atoh diu ahi. Adang mi 6,000 chu alamkai le thutan vaihom a pang diu ahi.
5 Adang mi 4,000 chu kotngah a pang diu, mi 4,000 ma chu keiman kapeh tumging ho mangcha a Pathen avahchoi jing dingu ahi,” ati.
6 Chuin David chun Levi mite chu amaho phung khailhah dungjuijin thum'in —Gershon, Kohath le Merari in ahom khenin ahi.
Gershon Chilhah
7 Gershon mite ho chu Lipni le Shimei ahi.
8 Lipni chate chu Jehiel le Zatham le Joel agom a thum
9 Shimei chate chu Shelomith leh Heziel le Haran ahi. Amaho hi Lipni insunga mi upaho ahiuve
10 Chule Shimei chate chu Jahath, Ziza, Zeush chule Beriah. Amaho li hi Shimei chate ahiuve.
11 Chule Jahath chu Haosa lamkai ana hin, Zizah chu ani channa anahi, amavang Jeush chule Beriah teni hin chapa tampi ana hing lhon lou jeh in pakhat insung in akisim tai.
Kohath Chilhah
12 Kohath chilhah ho chu Amram, Izahar, Hebron chule Uzziel ahiuve.
13 Amram cha pasal teni chu Aaron chule Mose ahi. Aaron hin Pathen a dingin pumgo thilto ana lhantheng jing theina dia chule ama achapa ten atonsot a Pathen anga thilto gimnamtui ana hal jing uva; ama lenggam a dinga akipehdoh jing uva, chule ama minna phatthei achan jing theina diuvin, asopipa toh ana kisukhen in ahi.
14 Mose hi Pathen mipan ana kisimin ahi. Achapa te chu Levi chilhah noiya ana kiminvon ahi.
15 Mose chapa te chu Gershom chule Eliezer ahi lhone.
16 Gershom chapa telah a chun Shebuel chu insung lamkai ahi.
17 Eliezer hin chapa khatbou ahingin, Rehabiah, insung lamkai ahi. Rehabiah hin chilhah tampi ana neijiin ahi.
18 Izhar chapa te lah a Shelomith chu ana insung lamkai ahi.
19 Hebron chapa te lah a Jeriah (insung lamkai), Amariah (anina), Jahaziel (athumna), chule Jekameam (alina) ahi.
20 Uzziel chapa te lah a Micah chu (insung lamkai) ahin chule Isshiah (ani channa) ahi.
Merari Chilhah
21 Merari chilhah ho chu Mahli le Mushi ahi.
Mahli chapa te chu Eleazer le Kish ahi lhone.
22 Eleazar chu chapa nei louvin athin, chanu bou aneijin ahi. Asopi Kish chapa ten achanu te akichen pin ahi.
23 Mushi chapa thum ho chu Mahli, Eder chule Jerimoth ahiuve.
24 Hichengse hi Levi insungmi le ason apah ho chengse ahiuve, insung dungjuiya lamkai hon jong, amin cheh uva chingthei tah a kijihlut ahiuve. Amaho ho hi kum somni ahilouleh achunglam ho chu Pakai ina natong thei dia lhing cheh ahiuve.
25 Hijeh chun David in, “Pakai, Isreal Pathen, chun amite chamna apen, chule Jerusalem a cheng jing ding ahi.
26 Tun Pathen Houbuh a kimang le athil ho chengse jong Levi ten apohlele lou diu ahitai,” ati.
27 David hilchahna achaina pen dungjuijin, Levi te chu kum somni a tah le achunglam apat kisim pan ahi.
28 Levi te chun Pathen Houbuh a Aaron chapa te akithopiuva, indan ho sutheng le ding, thil thengho koitup ding chule Pathen Houbuh a natoh chengse vetup ding ahiuve.
29 Dokhanga changlhah luidoh ding, todoh ding changbong ho chule ajat alet aneo dungjuiya haltoh ding chengse jong avettup diu ahi.
30 Jingkah seh leh ding uva Pathen avahchoi dingu ahi. Nilhah le angaima banga abol kit diu ahi.
31 Chule ama hon Sabbath nikho le Lhathah nikho a Pakai anga thilto abol teng ule amijat ana ngaichat dungjui a abol diu ahi.
32 Hiti chun Levi ten ponbuh a kinbol hihen muntheng kibol hihen, asopiu Aaron chapa te chu Pakai kin bolna a akithopi jing diu ahi.