26
Kelkot Ngah Ho Mopohna
1 Kelkotbul ngah ho kivaihop dan chu hiti ahi:
Korah chilhah a konna Kore chapa Meshelemiah kitipa hi Abiasaph insung a kon ahi.
2 Meshelemiah chapa te chu Zechariah (atahpen), Jediael (a nina), Zebadiah (a thumna), Jathniel (a lina),
3 Elam (a ngana), Jehohanan (a gupna) chuleh Eliehoenai (a sagena) ahiuve.
4 Kelkot ngahpa Obed-edom chapa te chu Shemaiah (atahpen), Jehozabad (a nina), Joah (a thumna), Sacar (a lina), Nethaniel (a ngana),
5 Ammiel (a gupna), Issachar (a sagena), chule Peullethai (a gietna) ahiuve. Pathen'in Obed-edom chu nasatah in phatthei aboh in ahi.
6 Obed-edom chapa Shemaiah chun chapa mibolthei cheh ahing’in a phungsung u vaihomna a panmun nasatah alo cheh uve.
7 Amaho chengse chu, Othni, Rephael, Obed chule Elzabad ahiuve. Chuban le, asopi teniu Elihu le Semakiah jong chu mibolthei tah ma ahi lhon e.
8 Obed-edom chilhah, achapa te le a tute mi somgup le ni chengse hi natohna a feltah le bolthei cheh ahiuve.
9 Meshelemiah chapa te mi som le giet le asopite chengse hi mibolthei tah ahi cheh uve.
10 Merari phung sunga kon'in Hosah chun Shimri chu achapa te lah a atahpen ahilou vangin lamkai din alhengdoh tai.
11 Achapa te chu Hilkiah (a nina), Tebaliah (a thumna), chule Zechariah (a lina) ahiuve. Hosah chapa te le asopite mi som le thum chengse chu kelkot ngah in apang uve.
12 Hitobanga kelkot ngah ho kivaihop dan hi Levi dang ho banga a insungmi cheh in Pakai na chu atoh u ahi.
13 Kelkot ngah dia kelkot tin a insung miten ahin deilhen hi kum le lha hihen, thep le theplou man a kive hilouvin vang kisan dungjuiya pangji ahiuve.
14 Solam kelkot ngah a pang din Meshelemiah le aloite nganse ahitauvin, sahlam chu michingtah a kihepa Zechariah,
15 Lhanglam kelkot chu Obed-edom nganse ahin, achapa te chu thil kholna kelkot ngah in apang uve.
16 Shuppim le Hosah chu lhumlam kelkot apat Hou-In jottouna kelkot chan angah a ngense ahi lhonin ahi. Angapi ho chu akimaingat sah in limgeh in apang uve.
17 Solam kelkot phunga chun niseh in migup, sahlam a mili, lhanglam a mili ma chuleh mili kingato cheh in thil kholna kelkot phunga apang jing’ui.
18 Lhumlam kelkot phunga mi gup chuleh mili chu kotpi a kon a Hou-In jottouna chan'a apangun, mini ma avellah achun apang’e.
19 Korah le Merari phungsung a kelkot ngah ho kivaihop dan hiti chu ahi.
Gouching Leh Migun Ho
20 Levite lah a Ahijah lamkainan maicham thil kholna mun le Hou-In gou ho kholna mun avetup uve.
21 Gershon phungkhai, Libni insung’a kon'in Jehiel chu lamkai khat in apang’e.
22 Jehiel, Zetham chule Joel chapa te jong Pathen maicham thil kholna mun chu ngah din ngansena achang tauve.
23 Hiche lamkai a pang cheng hi Amram, Izhar, Hebron chuleh Uzziel chilhah ahiuve.
24 Amram phung sunga dia, Shebuel chu Mose chapa, Gershom chilhah ahi. Ama hi thil kholna a vaibol pipu Ahi.
25 Asopite Eliezer in ahin ho chu, Rehabiah, Jeshaiah, Joram, Zicri chule Shelomoth ahiuve.
26 Shelomoth le asopite hi Leng David, insung lamkai pipu, sepai jalamkai chuleh mi thupi hon Pakaiya dia maicham thilto a ahin peh hou anga u ahi.
27 Galmun a kon a kichomkhom thil hoi lai-lai ho jong Pakai Hou-In sunga manchah le din ahin lhandoh jiuve.
28 Chujongleh, Shelomoth le asopi ten Themgao Samuel, kish chapa Saul, Ner chapa Abner le Zeruiah chapa Joab thilto ho jong achingtup jing uve.
29 Izhar phung a kon'in Kenaniah ahung pengdoh in ahi. Ama le a chapa te toh Israel sunga vaibol le thutan in apang uve.
30 Hebron phunga kon'in Hashabiah ahung pengdoh in ahi. Ama le asopite thil bolthei cheh 1,700 toh Jordan vadunga patna lhumlam a um Israel te gambeh sunga, Pathen thulam hihen lang Lenggam thu hijongleh ngansena lentah achang tauve.
31 Chujongleh, Hebron phung a kon'in Jeriah ahung pengdoh in, ama hi Hebron mite phunggui kisut dan a lamkai le khat anahi. (David lengpa kum somli alhin a akholdoh dungjui uva, Hebron te lah a mibolthei tampi Gilead gam Jazer khopi a amudoh u ahi.)
32 Mibolthei tah miho chu mi 2,700 chengse chu Jeriah sopite ngen jeng ahiuve. Amaho hi Leng David in Jordan Vadung apat a solam a asol a Reuben leh Gad chule Mannaseh chilhah akehkhat langpi vekol dinga ijakaiya Pathen thulam hihen lengpa thu hijongleh ngansena lhingset chang ahiuve.