27
Sepai Lamkaiho
1 Israel sepai jalamkaite le avaibol teuvin lengpa hongbit dia asepai te ahon hon a akivaihop dan u chu hiti ahi. Sepai hon khat a mi 24,000 alhing uvin, kum khat le lhakhat cheh pan ala teiyun ahi.
2 Sepai hon mi 24,000 ho panmun la masapen alamkai chu Zabdiel chapa Jashobeam ahi,
3 Ama hi Perez insung a kon sepai vaihom ho jouse lah a jong thaneipen ahi.
4 Sepai hon mi 24,000 lha nina a lamkai chu Ahoah insungmi Dodai kitipa ahin, anoidou a thanei vaihom din Mikloth kitipa akikoi e.
5 Sepai hon mi 24,000 lha thumna a lamkai chu Jehoiada chapa Benaiah ahi.
6 Benaiah kitipa hi David sepai hangsan, mihat somthum ho lamkai a jong ana pang ahi. Achapa Ammizabad chu anoidou din apansah e.
7 Sepai hon mi 24,000 lha lina a lamkai chu Joab naopa Asahel ahi. Ama hi achapa Zebadiah in athi jouvin apanmun akhel tai.
8 Sepai hon mi 24,000 lha ngana a lamkai chu Shammah ahin, ama hi Izrah mi ahi.
9 Sepai hon mi 24,000 lha gupna a lamkai chu Tekoa akon Ikkesh chapa Ira ahi.
10 Sepai hon mi 24,000 lha sagena a lamkai chu Pelon akon Ephraim chilhah Helez ahi.
11 Sepai hon mi 24,000 lha gietna a lamkai chu Hushah a kon Zerah chilhah Sibbecai ahi.
12 Sepai hon mi 24,000 lha kona a lamkai chu Benjamin gamsung, Anathoth a kon Abiezer ahi.
13 Sepai hon mi 24,000 lha somna a lamkai chu Netophah a kon Zerah chilhah Maharai ahi.
14 Sepai hon mi 24,000 lhasom le khatna a lamkai chu Ephraim a Pirathon a kon Benaiah ahi.
15 Sepai hon mi 24,000 lhasom le nina a lamkai chu Netophah a kon Othniel chilhah Heled ahi.
Israel Phung Lamkaiho
16 Aban a ho hi Israel sunga phung ho le alamkai ho ahiuve:
| Phung | Lamkai |
| Reuben | Zicri chapa Eliezer |
| Simeon | Maacah chapa Shephatiah |
|
17 Levi | Kemuel chapa Hashabiah |
| Aaron (thempu te) | Zadok |
|
18 Judah | Elihu (David sopipa) |
| Issachar | Michael chapa Omri |
|
19 Zebulun | Obadiah chapa Ishmaiah |
| Naphtali | Azriel chapa Jeremoth |
|
20 Ephraim | Azaziah chapa Hoshea |
| Manasseh (lhumlam) | Pedaiah chapa Joel |
|
21 Manasseh (solam) Gilead | Zechariah chapa Iddo |
| Benjamin | Abner chapa Jaasiel |
|
22 Dan | Jeroham chapa Azarel |
Hiche ho hi Israel sung'a phung lamkaiho ahiuve.
23 Leng David in mijat sim abolna achun kum somni apat anoilam ho asimtha pon ahi. Ajeh chu, Pathen'in Israel chate chu van'a ahsi jat a phatthei aboh dia akitepna akoisa ahitai.
24 Zeruiah chapa Joab chun mijat sim ijat a aboldoh kigot vang'in alosap jing’e. Ajeh chu Pathen lung hanna changa, Leng David khanga Israel mijat sim chu lolhing lou ahitai.
David Lenggam'a Migun Ho
25 Adiel chapa Azmaveth chu lengpa thil kholna ngahtup din nganse ahi.
Uzziah chapa Jonathan chu khopi thil kholna mun jouse ngahtup din nganse ahitai.
26 Kelub chapa Ezri chun lengpa loubol ho vetup din apangin ahi.
27 Ramah a kon Shimei chu lengpa lengpilei ngahtup in apang in ahi. Sepham a kon Zabdi chu lengpa ju le lengpitwi thah in apang’e.
28 Geder a kon a Baal-hanan chun Judah te moul bul a um lengpa Olive honsung chule theichang, theibalei chu angahtup in ahi. Lengpa heng’a Olive thao thah jing din Joash ngansena achang’e.
29 Sharon a kon Shitrai chu Sharon Phaicham lang’a gancha chunga mopo'n apange. Adlai chapa Shaphat chu phaicham lang’a gancha mopo'n apang e.
30 Ishamel chilhah Obil in sangongsao te amopoh e. Meronoth a kon Jehdeiah in Sangan ho amopoh in ahi.
31 Hagar mi Jaziz in lengpa kelngoi le kelcha amopoh e. Amaho chengse hi David Lengpa gou ching jeng ahiuve.
32 David pangahpa, Jonathan chu michingtah le thil hethei tah chule lengpa semang khat ahi. Hachmon mi Jehiel chu lengpa chapate hilna lam amopoh in ahi.
33 Ahithophel kitipa hi Leng insung a thumop themtah ahin. Ark mi Hushai kitipa hi lengpa dia agol khat ahi.
34 Benaiah leh Abiathar chapa Jehoiada in Ahithophel athi jouvin a panmun ahin khel in ahi. Joab chu lengpa sepai jalamkai ahi.