28
David In Solomon Athugah
1 David in alenggam sung’a sepai jalamkai, vaipo le vaibol jouse, phung lamkai hihen gouching hihen, hetthei a panmun la jouse chuleh gal-hang jouse Jerusalem a akou sohkei un ahi.
2 Akipatdoh in hiti hin aseitai: “Ka sopi le ka mite ho, keiman Pathen Kitepna Thingkhong a itih a aum jingna ding, Pathen Hou-In theng sahdoh ding ka ngaiton, kigotnan thil le lo angaicha tampi jong kakoitai,
3 ahin Pathen’in kaheng’a aseijin, ‘Nangman kamin kijabolna dinga Hou-In nasah louding ahi, ajeh chu nangma gal-hang nahin chule thisan naso behseh e,’ ati.
4 Hijeng jongleh, Israel Pathen'in Judah te lah a konna, ka insung uva pat keima tah a itih hijongleh Israel leng dia ei thaonu ahitai.
5 Chutah le, chapa tamtah phatthei eiboh ho lah a konna ka chapa Solomon in kaleng touna mun eikhel ding ahi.
6 Pathen'in kajah a aseiye, “Na chapa Solomon in ka Hou-In theng le akimvel asahdoh dia ka lhendoh ahitan, keiman angaichat ijakai kapeh jing ding ahi.
7 Chule ka thupeh chengse anit jing’a ahile, Keiman alenggam a itih a kaumpi jing ding ahi,' ati.
8 “Hijeh chun tun, Pathen chu idiuva ahetoh, Israel mite jouse mitmua—Pakaiyah kikhom'un—Keiman hiche mopohna hi kapeh ding ahi. Chingtheiyun lang na Pakai na Pathen thupeh chengse nit jingun, chutileh lungmong a gampha lai nalo uva, na chateu le na tuteu khang geiya Pakai phattheina nachan jing diu ahi,” ati.
9 “Chujongleh, Solomon kachapa, napu le napa phattheiboh jing na Pathen chu haimil lou jen’in. Na lungthim pumpin choi’an jingin lang athun um jingin. Ajeh chu thil ijakai amun, ahe sohkeiyin, bel jing lechun na lhaso louding ahi.
10 Hijeh chun, nalunggil in ngaiton Pakaijin a Hou-In theng sa dia nalhendoh ahitai.. Hat jingin lang natohdoh tei ding ahi,” ati.
11 Chuin, David in athilgon ijakai, thil kholna indan ho chule chonset kingaidamna munho umdol jouse Solomon apetan ahi.
12 David in alunggil a agontohsa, Hou-In lim asung apo, indan dang-dang chule Maicham kibolna Muntheng dia agon ho jouse achapa Solomon aseipeh tai.
13 Chujongleh, Hou-In sunga themgao ho leh Levi mite panmun hihen, Pathen houna dia thil le lo kimang ding jouse jong ahiltan ahi.
14 David in Pathen houna a sana le sum-eng man dia lom jat jong ahiltoh in,
15 Solomon jah a Sana thaomei semna ding le sum-eng thaomei semna ding chuleh sana le sum-eng alut ding jat jong ahilthem in ahi.
16 Changlhah hung kitohdoh ho koina ding Sana theng a kisem Dokhang chule, sum-eng a kisem dokhang ho jong akisemna a sana angaicha ding jat jong ahilthem e.
17 Thihkhe sana thengsel ijat asem a, khon, kong, silkong ho jouse sana ijat cheh a sem ding abonchan atetoh peh e.
18 Chujongleh, gimnamtui halna ding maicham phung semna dia sana thengsel man ding jat, chule kangtalai sunga Cherubium vantil in a lhaving teni a akhu khum, Pakai Kitepna Thingkhong sem ding dan jong ahiltan ahi.
19 “Thilgon hichengse hi”, tin David in Solomon jah a, “Pathen'in akhut tah a asut a eipeh ahi” ati.
20 David in abanjom in, “Hat inlang hang jingin, natohdoh ding ahi. Kichat le lunglhah daina neihih hel in. Pakai Pathen, ka Pathen'in na umpi jing’e. Na ngansena bang’a nachai theng tokah a Pakaijin na lhonpi jing ding ahi.
21 Themgao ho le Levi miten akingansena banga Pakai kin abol diu, adangse injong akipeh nathei chan uva pan alah uva, gamsung vaipo ho jouse le thuneina aboncha a nangma thunoi a um ding ahi,” ati.