29
Hou-In Sahna Dinga Thilpeh
1 Hichun, Leng David in Hou-In sung’a mipi ho lam chu angan hitin aseiye, “Ka chapa Solomon, Pathen'in ka lengmun khel dia athaonusa chu ahin, ama chapang nalai intin, jilna neibeh nailou hijongleh, atoh dia lom Pathen'in angansena, a Hou-In sah ding khu mihem mai maiyin ajo chi vang ahipoi.
2 Manchah thei chan mangchan keiman ka Pathen Hou-In sahna din sana, songmantam, thing le song ijakai angaicha jouse kakoitup peh tai. Hiho chu alhingset adia, sana, sum-eng, thih, thing chujongleh, Onyx tampi seh hilouvin, songmantam, songval, songpol, marble song jong alhingset din kakoitup peh tai.
3 “Tunjong, keiman ka Pakaiya dia kakipehdoh nan ka sana le sum-eng jouse jong a Hou-In sahna dia kagotpeh ho ban’in kapedoh tai.
4 Keiman Hou-In bang dung ho sahna din, Ophir a kon sana tons 112, chule dandka thengsel tons 262 jong kapedoh tai.
5 Chuban a, khutthem ho tham ding sana le sum-eng avat ding chengse ho hi, koi tobang ka Pakai ka Pathen adia keijong kakipedoh nom’e ti ium uvem?” ati.
6 Hichun, insung lamkaiho, Israel phung lamkai ho ahin, sepai jalamkaiho, gouching ho chuleh, lengpa vaibol ho jouse jong kiphaltheng tah in akipedoh soh tauve.
7 Pathen Hou-In theng sahna dia akipehdoh nau abonchauva apehdoh jat uchu, sana tons 188, sana lheng 10,000, dangka tons 375, sum-eng tons 675, chule thih talent 3,750 alhing’e.
8 Chujongleh, songmantam tampi jong atodohbe uvin, athil todoh hou chu gou kholna Pakai in achun akholtup uvin Gershon chilhah a kon Jehiel in thil kholna mun avetsui din anganse uvin ahi. .
9 Maicham thiltho ho jouse mipi ten hongphal tah le kiphaltheng tah ato jeh uvin akipah cheh uvin ahi. Chujongleh Lengpa David jong kipah leh thanop nan adim’e.
David Thangvah Taona
10 Chuphat chun, Lengpa David in mipi jouse masang’a Pathen athangvah e.
“Kahung kondohnao Vo ka Pathen’u, atonsot tonsot in nunnom in, namin kithangvah jinghen!
11 Nang'ah, Vo Pakai, minthanna jouse, loupina jouse, thaneina jouse, jabolna jouse, ijakai nang’a hijing hen. Leiset pumpi le vanthamjol abon'a nang’a ahin, Vo Pakai, thil ijakai nangma lenggam thaneina ahi.
12 Houna le jabolna nang’a kon bou ahi. Ajeh chu, imajouse nangma thunoiya umjeng ahi. Thaneina le loupina nangma khut a aum’in, nangma khut a minthanna le thaneina abonchan aum’e.
13 Vo ka Pathen’u, namin thangvah le choi-atna kahin peuve.
14 Ahinlah, keima koi kahiya, ka mite chu ipi hiuvam, nangma angsunga kipah le thanomtah a ipi hijongleh kapeh jeng thei uham? Kanei, kagou jouseu nangma a konna kamu jeng u ahin, kapeh hou jouse nangman neipeh ngen jengu ahi.
15 Chuleh, kapu kapateu bang’a, hiche leiset a hi khopem le maljin mai-mai kahiuvin, ka hinkhou jong nilim kihei bang’in ageina akihephaji tapoi.
16 “O Pakai ka Pathen’u, nangma jabolna, na Hou-In theng sahna dia kahin tokhom'u ijakai hi nang’a ahin, nangman neipeh jengu ahi.
17 Ka Pathen, nangman kalung’u na kholchil sohjin, nalung lhaina namudohji teng nakipahji e ti keima neihetsah in, chule lunggil tah a keiman thil hicheng kabol jong nahen ahi. Ka miten jong kipah le thanom tah a thilto, thilpeh nangma Hou-In theng sahdohna dia ahin choi ujong nei musah jing’e.
18 “O Pakai, kapu u Abraham Pathen, Isaac Pathen, Israel te Pathen, nami ten nathu angai jing ding uvin kahung taove. Nangma na jabol le nahepi nau jong mujing’in.
19 Ka chapa Solomon’in alungthim pumpia na thupeh chengse anit a, na danthu le na hettohsah hihen, ijakai ajui jing’a, keiman ka gontup pehsa na Hou-In theng kisahdoh kahsen lungvulna pejing'o,” ati.
20 Chuphat in, David in mipi ho jah a, “Na Pakai, na Pathen’u thangvah un!” ati. Hichun, mipi jousen Pathen athangvah un, Apu apateu Pathen masang’a abohkhup un, chibai abol uvin, lengpa jong jabolna apeuvin ahi.
21 Ajing nikhon, mipi ten Pakaiya kilhainan bongchal 1,000, Kelngoi 1,000 le kelngoichal 1,000 ahin choijun, pumgo thilton atoh uve. Chujongleh, Israel pumpi min’in lengpitwi le kilhaina tampi jong ahin choi uvin ahi.
22 An nehkhom abol’un, lengpitwi adon’un, kipah le thanom tah in Pathen athangvah uve.
Chujongleh, Leng David chapa Solomon chu mipi ho masang’a leng hung chang din thao anu un, Zadok jong chu thempu din thaonuna achangtai.
23 Chuin, Solomon in apa Leng David laltouna mun chu ahin khel tan, imalam jousea apa athakhel jouvin, Israel pumpin jong ajabol sohkei tauve.
24 Mithupiho, gal-hang ho chuleh Leng David chapa te jousen jong Lengpa Solomon adin kitepna le kipehdohna anei tauve.
25 Chuban’a Pathen'in leng Solomon chu Israel pumpi masanga adomsang’in, a itih a Israel leng ten jong ana chan phahlou, minthanna, loupina le jabolna sangpenin Pathen'in phatthei abohtai.
David Vaihom Sung Thulahgom
26 Hitobanga hi, Jesse chapa David in Israel pumpi lengvai ana pon ahi.
27 Aeng vaipoh chu kum somli alhing’in, kum sagi sung Hebron chuleh, kum somthum le thum sung chu Jerusalem a lengvai anapo e.
28 Ahinkhon haona, jabolna achang’in, kum sottah hinkho kipah le thanom in amangin, atehset a ahinkho lhin mong’in athin, chuphat in achapa Solomon in a lengmun ahin khel e.
29 Leng David vaipoh sungsea thil ijakai kijihlut ho jouse chu,Mitva Neipa Samuel Thusimbu, Nathan themgaopa Thusimbu le Mitva Neipa Gad Thusimbu a akijihlut soh in ahi.
30 Hiche thilsoh ho jouse hin Leng David loupina aphochen uvin, chuleh aleng vaipoh sung’a Israel le akimvel lenggam hoa thilsoh jouse jong ajao cheh e.