4
Judah Chilhah Dang
1 Judah chapa te chu Perez, Hezron, Carmi, Hur, chule Shobal ahiuve.
2 Shobal chapa Reaiah kitipa hin Jahath ahingin, jahath hin Ahumai le Lahad ahingin ahi. Hichengse hi Zorath mite ahiuve.
3 Etam chapa te chu Jezreel, Ishma, Idbash, chule asopinu Hazzelelponi,
4 Penuel (Gedor hingpa), chule Ezer (Hushah hingpa ahiuve0. Mi hicheng hi Hur khanggui (Ephrathah chapa apeng masapen), Bethleham pu le pate ahiuve.
5 Ashur (Tekoa pa) chun ji ni aneijin, amani chu Helah le Naarah ahi lhon'e.
6 Naarah hin Ahuzzam, Hepher, Temeni, chule Haahashtari ahingin ahi.
7 Helah chun Zereth, Izhar, Ethnan,
8 chule Anub pa Koz, Zobedah le Harum chapa Aharhel insung mite chengse chu ahingin ahi.
9 Jabez kitipa ji asopite dang-dang sanga agunchu jeh in anun jong ama hi nat chungnunga kahin ahi tin amin Jabez asah in ahi.
10 Jabez hi Israel Pathen henga ataovin hiti aseiye, “O Pathen, nangin keima phatthei neiboh tei-teijin lang, nei kaile jing jengin lang, chule hahsatna le gentheina jousea kon’in neichom khen jing jengin,” atin ahi. Hichun hiche ataona hi Pathen’in anoppeh tai.
11 Kelub (Shuhah sopipa) chun Mehir ana hingin, Mehir chun Eshton ahingin,
12 Eshton chun Beth-rapha, Paseah, chule Tehinnah ahingin ahi. Tehinnah chun Ir-nahash ahingin ahi. Mihem hichengse hi Recah son achilhah ahiuve.
13 Kenaz chapa teni chu Othniel le Seraiah ahi lhon'in ahi. Othniel chapa teni chu Hathath le Meonothai ahi lhon'e.
14 Meonothai chun Ophrah ahingin, chule Seraiah chun Joab ahingin, amaho hi thingthem bol mi ahiuve.
15 Jephunneh chapa Caleb chapa te chu Iru le Elah toh Naam ahiuve; chutengleh Elah chapa chu Kenaz ahi.
16 Jehallelel chapa te chu Ziph, Ziphah, Tiria, chule Asarel ahiuvin ahi.
17 Ezreah chapa te chu Jether, Mered, Epher, chule Jalon ahiuve. Mereh jinu ho lah a mi khat in Miriam le Shammai toh Ishbah (Eshtemoa pa) ahinpeh in ahi.
18 Chujongleh Mereh hin Judah numei khat jong akichenpi in, amanun Jered (Gedor pa) ahingin, Heber (Soco pa) ahingin, chule Jekuthiel (Zanoah pa) jong ana hingin ahi. Mered chun Pharaoh chanu Bithia kitinu jong ana kichenpi in, chule amanun jong chapa phabep ahinpeh in ahi.
19 Hodiah jinu chu Naham sopinu ahi. Amanu chapa lah a khat chu Keilah khoa Garm mite pa ahin, chule khat pa chu Eshtomoa mi Maacath mite pa ahi.
20 Shimon chapa te chu Amnon, Rinnah, Ben-hanan le Tilon ahiuve.
Ishi chilhah chu Zoheth le Ben-Zoheth ahi lhon'e.
Judah Chapa Shelah Chilhah Ho
21 Shelah kitipa hi Judah chapa te ho lah a khat ahi. Shelah son achilhah ho chu Er (Lecah pa) ; Laasah (Mareshah pa); chule Beth-Ashbea kho’a tupatpon khonga pang insung mite toh;
22 Jokim; Cozeba mipa; le Joash chule Saraph, Jashubi-Lehem le Moab gamsunga vaipoa ana pang ahiuvin ahi. Mi hijat le abonchauva amin nu chu khanglui laipeh a athusim'u kisutna lekhahoa ana kisunlut peh ahitai.
23 Amaho chengse hi bel denga pang ho, Netaim le Gederah kho’a cheng ahiuve. Hiche a chu amaho hi cheng khom uva lengpa natonga pangji ahiuve.
Simeon Chilhah Ho
24 Simeon chapa te chu Jemuel*, Jamin, Jarib, Zohar,* chule Shaul ahiuve.
25 Shaul chilhah ho chu Shallum le Mibsam, chule Mishma ahiuve.
26 Mishma chilhah ho chu achapa Hammuel, Zaccur, chule Shimei ahiuve.
27 Shimei hin chapa som le gup jen ahingin, chule chanu gup ahinge; ahinlah asopi pasal dang vang cha tamnei aum pouvin ahi. Hijeh chun, Simeon insung mite hi Judah insung mite bangin apung thei mong-mong pouve.
28 Amaho hi Beersheba, Moladah, Hazar-shaul,
29 Bilhah, Ezem, Tolad,
30 Bethuel, Hormah, Ziklag,
31 Beth-marcoboth, Hazar-susim, Beth-biri, chule Shaaraim dunga jong acheng uve.
32 David lengvaipoa ahung pan masanga kho hijat hi amaho thuneina noiya um ngen ahiuve. Amaho son achilhah ho chu Etam, Ain, Rimmon, Token, chule Ashan pum'a khopi nga,
33 chule akimvel dunga akhobah chengse chutoh Baalath mun chan geiyin jong acheng uvin ahi. Hicheng hi amaho chenna mun ahin, chuleh, hiche min chengse ho hi amaho khanggui kisimna lekhabua ana kisunlut ah ahi.
34 Simeon son achilhah dang ho chu Meshobab, Jamlech, chule Amaziah chapa Joshah,
35 Joel le Joshibiah chapa Jehu toh, Seraiah chapa ahin, Asiel chapa ahin,
36 Elioenai ahin, Jaakobah ahin, Jeshohaiah ahin, Asaiah ahin, Adiel ahin, Jesimiel ahin, Benaiah ahin,
37 chule Shiphi chapa Ziza ahin, Allon chapa ahin, Jedaiah chapa ahin, Shimri chapa ahin, chule Shemaiah chapa ahi.
38 Hiche ho hi phunggui hao Simeon a dinga lamkai phabep min ho chu ahi. A insung hou apungin,
39 chule amaho hi Gerar gamkai langa akitol uvin, phaicham gam'a niso lam geiyin jong acheuvin, akelngoi hon teu din hamhing um umna ahol uvin ahi.
40 Hikom'a chun ama hon gam phatah, hamhing thalhinna gam lentah, chule cham lenna le lungmong tah a chenna thei akimu uve.
Hiche gam a ana cheng masa mite chu Ham son achilhah mi phabep anahi uvin ahi.
41 Hinlah, Simeon insunga ama ama kailhah cheh’a haosa chapa te chu hikom'a hin Judah lengpa Hezekiah leng vaipoh layin ahunglut uvin, hikom'a ana chengte Ham son achilhah phabep ho chule Meun mite ponbuh ho ahin, achennau in ho ahin, amu phah-phah asumang uvin ahi. Hiti hin amaho chu asuhmang phat uvin amaho khel’in ana cheng uvin, tuni gei hin ama hon mun chu alo nalaiyuve. Ijeh-inem itileh hiche gam'a hi akelngoi teu neh ding hamhing pha amu u ahi.
42 Chuin, Simeon mite lah a mihem ja nga tobang chu Seir molsang geiyin akitol uvin, alamkai diuvin Pelatiah, Neariah, Rephaiah, le Uzziel—abonchauva Ishi chapa te ahiuve.
43 Amaho hin Amalek mi athimoh a jamdoh chengse jong asumang uvin, chule amaho khel’in tuni geiyin acheng den tauve.