5
Reuben Chilhah
1 Israel cha amasapen chu Reuben ahi. Ahinlah, aman apa jalou tah a apa thaikemho lah a khat alupkhompi jeh chun a upat hi asopipa Joseph chapa te joh achang uvin. Hiche jeh a chu, Reuben hi khanggui kisimna lekhabua chun apen masah dungjuijin akijih lut tapoi.
2 Judah son achilhah te chu athahat pen’a ahung pan uva chule amaho phunga konna leng khat ahung kisepdoh jeng vang'in, upatna kiti hi Joseph bou achangin ahi.
3 Israel chapa apeng masapen Reuben chapa te chu Hanoch ahin, Pallu ahin, Hezron ahin, chule Carmi ahi.
4 Joel son achilhah ho chu Shemaiah ahin, Gog ahin, Shimei ahin,
5 Micah ahin, Reaiah ahin, Baal ahin,
6 le Beerah ahi. Assyria Lengpa Tiglath-Pileser pa chu Beerah anahi.
7 Beerah inkote chu ama phung sunga akhangguiya akisimtoh a akijih toh tengleh alamkai chu Jeriel ahin, Zechariah jong ahi;
8 chule Azaz chapa Bela ahin, Shema chapa ahin, chule Joel chapa jong ahi.
Reuben mite ho hi Aroer apat Nebon chan gei, chule Baal-Meon chan geiya cheng ahiuve.
9 Chule amaho hin Gilead gam'a chun gancha tamtah anei jeh uva niso lama jong acheng uvin, nelgam jotna lampi langa pat Euphrates luipi gal lam geiyin acheng uvin ahi.
10 Sual leng vaipoh laiyin jong Reuben mite hin Hagar mite chunga gal abol uvin ahi, hiche Hagar mite chu ajo phat uvin Gilead niso lama amaho ponbuh jouse a chun alhung keiyin achen den lo tauvin ahi.
Gad Chilhah Ho
11 Gad son achilhah ho chu Reuben mite ho toh kigalsaiyin acheng uvin Bashan apat Salecah chan geiyin alouve.
12 Joel chu Bashan khoa lamkaijin apangin, Shapham khoa lamkai anina in apangin, ama ni ban’a Janai le Shaphat ajong pang ahi lhon'e.
13 Amaho insunga phunggui sagi lamkai ho chu Michael ahin, Meshullam ahin, Sheba ahin, Jorai ahin, Jacan ahin, Zia ahin, chule Eber ahi.
14 Hiche ho chengse hi abonchauva Huri chapa Abihail son achilhah jeng ahiuve; Huri chu Jaroah chapa ahin, Jaroah chu Gilead chapa ahin, Michael chu Jeshishai chapa ahin, Jeshishai chu Jahdo chapa, chule Jahdo chu Buz chapa ahi.
15 Ahi chu Abdiel chapa ahin, Abdiel chu Guni chapa ahin chule Guni hi amaho insung lhah a lamkai ahi.
16 Gad mite hi Gilead gamsung, Bashan gamsung, chule akhobah jouse le Sharon gam hamhing phatna lai jousea acheng uvin ahi.
17 Mihem hijat khanggui thusim hi Judah lengpa Jotham lallai le Israel lengpa Jeroboam lal laiya kisimtoh a kijih doh ahiye.
Jordan Solam'a Phung Ho
18 Reuben chapa te leh Gad chapa te chule Manaseh phung keh khat jong hin gal-hang mihat, pho le chemjam thoa gal bolthei, thalpi kap them, galsat themtah tah sepai 44,760 jen galbol dia gonsa anei jing uvin ahi.
19 Amaho hin Hagar mite chung le Jetur mite chung, chule Naphish mite le Nodab mite chunga gal abol uve.
20 Gallai hin ama hon Pathen hengah panpina athum un, ama hon Pathen tahsanna anei jeh uvin, aman ataonau chu asanpeh tai. Hijeh chun ama hon Hagar mite le amaho panpi chengse chu ajou sohhel tauve.
21 Ama hon akisatpi Hagar mite thil achompeh ho chu sangongsao 50,000 jen ahin, kelngoi le kelcha 250,000 jen toh ahin, sangan 2,000 chule mihem 100,000 jen gal-hingin akaiyun ahi.
22 Gal kisat chu Pathen'in apanpi jeh un Hagar mite simsen lou akijam chap jengin ahi. Sohchanga akitolmang kah seuvin amaho gamsunga chun Reuben mite, Gad mite, chu Manaseh mite acheng tauve.
23 Manasseh phung kehkhat jong mihem atam lheh jeng uvin, Bashan gam'a pat Baal-hermon gei, Senir gei, chule Hermon Molsang geiyin achengdoh peh jeng uvin ahi.
24 Ama ama pajang lhah a insung cheh uva a upa chengse chu: Epher ahin, Ishi ahin, Eliel ahin, Azriel ahin, Jeremiah ahin, Hodaviah ahin, chule Jahdiel toh ahiuve. Amaho mihat gal-hang ho hina lama minthanna anei uvin, chule ama-ama insung pajang lhah a a upa chengse chu ahitauvin ahi.
25 Ahivangin amaho hin apu apateu Pathen ahou khel uvin, Pathen'in asuhmangsa mite gam'a vaipo ho pathen limsemthu doi ho akou tauvin ahi.
26 Hiche jeh hin Pathen'in Assyria lengpa Pul (Tiglath-Piteser jong akiti ) lungthim ahin tildoh peh in, hiche Reuben mite le Gad mite toh, chule Manasseh phung akeh khat hi akaimangin ahi. Assyria ten amaho hi Halah kho le Habor kho, Hara kho, chule Gozan Vadunga ahin kailut uvin, tuni geiyin aumden tauve.