2
Hou-In Sahna Dinga Kigotnaho
1 Solomon chun Pakai min jabolna dingin Hou-In khat le ama chenna ding mong-mong Leng Inpi khat sadoh dingin kigel lhuhna aneitan ahi.
2 Hichea ding chun natong ding mi s70,000, thinglhang gam'a songkhoh ding mi 80,000 chule natongho vesui ding mi 3,600 alhengdoh tan ahi.
3 Solomon chun Tyre Lengpa Hiram henga dingin thu hiti hin athot in,
“Kapa David in achenna ding leng inpi asahna dinga, Cedar thingtum na-na bolpeh bang chun keima jong neihin bolpeh in.
4 Keiman jong Pakai ka Pathen jabolna dinga Hou-In kasah ding ahi. Hiche mun chu atumbeh a ama angsunga gimnamtui halnamna a changlhah agol gol'a koina a, beitih neilouva kitohdoh thiltona a chule jingkah nilhah le Cholngah Nikho a pumgo thilto tona ding, lhathah nikho seh a man ding; chule Pakai ka Pathen’u angsunga aphat kiteppeh kut hoa manna ding mun hi ding ahi. Aman hiche thil ho hi itih a boljing dinga Israel athupeh ahi.
5 “Hiche Hou-In hi inlen thupitah hi ding ahi, ajeh chu ka Pathen uhi pathen dang jouse sanga lenjo ahi.
6 Hijeng jongleh koiham Pathen chenna ding inlentah akilomtah sadoh jou ding chu? Ijeh-inem itileh ama chu vanho jousen jong adol louding ahi! Hiti ahijeh chun, pumgo thilto ho halnamna ding tilou chu; keima koi kahia Pathen chenna ding In chu kasah jou ding ham?
7 “Hiti ahijeh chun sana dangka, sum-eng le thih khengthem ho ponsandup, asan-ao le pondum khongthem ho, chule song khengthem ho neihin solpeh in. Amaho chun kapa David in ana lhendohsa Judah le Jerusalem a natoh thilbol themho toh chun atohkhom diu ahi.
8 “Lebanon gam'a um Cedar thing, chah thing le algum thing jong chu inthing dingin neihin tolpeh in, ajeh chu Lebanon’a um namite chu thingsui, thing-at lama amaho phajou ding aumpoi. Amaho kithopi dinga chu kamite kahin solpeh diu ahi.
9 Keiman kasah ding Hou-In hi inlentah le thupitah ahi ding jeh hin, inthing tamtah lut ding ahi.
10 Na thingtan miho dinga chu atoh man diu suhlou changbong atena dim 100,000, sakol chang atena dim 100,000, lengpithei twi atena 110,000 le Olive thaotwi atena dim 110,000 kapeh ding ahi.
11 Lengpa Hiram chun Solomon lekhathot adonbut in:
“Pakaijin amite alungsetnin, hijeh chun Aman alengpa uvin na pansah tai.
12 Vahchoiyun Pakai, Israel Pathen, van le leiset sempa chu! Ama chun Leng David chu chapa chingtah khat thepna le thil hetthemna toh apeh than, ama chun Pakai Hou-In le Leng inpi asahdoh ding ahi.
13 Keiman natong themtah, khutthemna sangtah nei Huram-abi kitipa chu kahin solpeh e.
14 Ama hi anu Israel nam mi Dan phunga kon ahin, apa hi Tyre gam mi ahi. Ama hi sana dangka sum-eng le thih a konna thilsem themtah chule thing le songa konna jong thilsem themtah ahi. Ponsandup, ponsan-ao, pondum le tupat ponnem khongthem, thiljem semthem jong ahin, itobang jem hijongleh akingansena jouse chu boldoh jeng thei ahi. Hitia chu ama hin napa kapu David in ana lhendoh natong themsa ho tochun atoh khom diu ahi.
15 Hiti ahijeh chun tun kapun naseisaho suhlou changbong, sakol chang, lengpithei twi le olive thao twi chu neihin thot jengtan.
16 Keihon itobang thing hijongleh nadei dei uchu Lebanon lhanga hinsui uving ting, Mediterranean dillen panga kon'in pum chungah Joppa chan hin tolpeh tauvinge. Hiche lai munna kon'a chu nang hon thing ho chu Jerusalem chan nakitol lut thei u ahitai,” ati.
17 Solomon chun apan anabol bangin Israel gamsunga cheng gampam miho simna aneijin ahile agomin mi 153,600 aphan ahi.
18 Amaho lah a chun mi70,000 chu thilpole ding, 80,000 chu thinglhang gam'a songkhoh ding chule 3,600 chu natoh vesui dingin ngansena aneitan ahi.