3
Solomon In Hou-In Asah
1 Hiti chun Solomon chun Pakai Hou-In chu Jerusalem'a Moriah Mol achun asapan tai, hichelai mun hi apa, David henga ana kilahna mun chu ahi. Hou-In kisahna chu Jebus mipa Araunah kitipa changphol David in ana deilhen mun chu ahi.
2 Hou-In kisah pat chu Solomon leng chan kal kum li lhinna ahi.
3 Pathen Hou-In kibulphuna dinga Solomon in agon chu adung feet 90 le avai feet 30 a len ahi.
4 Hou-In maiya avaitanna kisa hongcha chu adung feet 30 chule asandanfeet 30 ahi. Aman asunglang chu sana thengsellin aloi jin ahi.
5 Hou-In kimlai dan-lenpen chu chah thingin achunga sana thengsellin athopsah in chule tum-thing le khao kipheh limin ajemhoi sellin ahi.
6 Hou-In bang chu songmantam hoitah chule Parvaim gam'a hungkon sana in ajemhoi sellin ahi.
7 Hiti hin Hou-In inkam jouse, akotjol ho leh ajol ho, abang ho leh akot ho jouse chu sana in atomin, chule bang dunga chun cherub lim ageidoh sohkeijin ahi.
8 Chule muntheng chungnung pen feet 30 a Hou-In vai toh kikotnin asemin, chule athuhlam feet 30 ma alhinge. Asunglam chu sana thengsel agih tena tons 23 lut in alhajol'in, atomlhah sah in ahi.
9 Hongcha sahna a kimang sana thingkil jong chu ounces 20 cheh agih in ahi. Achunglam dan ho jong chu sanan atomjol sah sohkeijin ahi.
10 Aman cherub lim ni asemin, hiche teni chu sanan atomin; muntheng chungnunga chun akoiyin ahi.
11 Apangtoa kikai cherub teni lhamong asemsa chu feet 30 asaovin ahi. Hiche lhaving chun ni lah a amasapa feet 7-1/2 asaovin, hiche lhaving chun Hou-In bang aphai. Alha langkhat pa jong chu feet 7-1/2 ma asaovin lhaving langkhat chu aphan ahi.
12 Chutobang ma chun cherub lim nina pa jong chun tong ngaa sao lhaving aneijin, hiche chun Hou-In bang lang khat chu aphai; Alhaving nina pa jong chu feet 7-1/2 asaovin cherub lim masa pa lhaving chu aphan ahi.
13 Hiti chun alangtoa cherub teni lhamong chu feet 30 ahi. Amani chu akeng lhon’in ading gel lhon'in, Hou-In kim lam chu anga lhon'in ahi.
14 Muntheng chungnung lutna laitah achun tupat ponnem'a kisem adum, asandup le asan-ao pat a kijem chule cherub a lim kikhuibeh pondal khat aki dallin ahi.
15 Hou-In mai langa ding chun Solomon in khompi ni feet 27 a sang aphutnin, ani gellin khom alu kisemhoi feet 7-1/2 in akijop saotou in ahi.
16 Solomon in khivui tobangin sumkol asemin, khompi teni alehvum chu jephoina in amangin ahi. Chujongleh kolbuthei lim 100 asemin sumkol ho achun ajemhoi din abeh in ahi. Chule Hou-In maiya lutna lama khompi teni chu khat lhanglam'a, chule khatpa joh chu asahlam'a aphut in ahi. Lhanglam'a kiphut khompi chu Jakin asah in sahlam'a pa chu Boaz asahtai.