20
Avel Uva Namdang Ho Toh Kidouna
1 Phat chomkhat jouhin Moab mite leh Ammon mite chuleh apanpi Meun mite chu Jehoshaphat dou dingin ahung kon tauvin ahi
2 Thupole hon jong Jehoshaphat lengpa kom'a chun, “Twipi Thi gallang Edom'a kon'in galmi alei limmin nangma dou dingin ahung kitol uve. Ama hon Hazazon-tamar jong atoupha tauvin ahi,” (Amin dang chu En-gedi hi ahi).
3 Jehoshaphat chu akicha lheh jeng tan Pakai kom'ah ataovin ikati ding hitam tin adong tan ahi. Hijou chun aman gamsung pumpin anngol dingin thu apetan ahi
4 Judah khopiho jousea kon'in mijouse chu Jerusalem'a Pakai kom'a tao dingin ahung tauvin ahi.
5 Hiti chun Jerusalem a Judah mipite jouse chu Pakai Hou-Insung indan thah kisem maija chun akikhom'un, Jehoshaphat lengpa jong achen amasang uvah adingin ahi
6 Amaho okithong leovin ataovun, “Vo Kapu Kapa teu Pakai, Pathen van'a kon'in vannoi leiset chitin namtin chungah vai nahom'in ahi. Nangma hi thaneitah leh thahat tah nahin koiman na kidoupi joupon ahi.
7 Nangma hi ka Pathen'u nahin, namite Israel te hiche gamsunga ahunglut phatnun nangin hiche gam'a ana cheng ho chu na nodoh in na golpa Abraham chilhah te atonsotna achenna diuvin na-na pen ahi.
8 Amaho ana chenglut un nangma janan Hou-In khat ana tungdoh un chuleh hitin ana seijun ahi.
9 'Ijem tia amaho chunga hi engbolna gal, hise, ahilouleh kellhahna ahung chuh a ahileh keihon nangma kijabolna Hou-In maija kadin diu ahi. Chuleh hamsetna kato teng ujongleh kahung pen diu nangin neihin ngaipeh diu neihin huhdoh diu ahi.'
10 Chuleh tuhin Ammon sepaite, Moab sepaite, chuleh Seir Molchunga um hon ipi abol'u kamu uvin ahi. Amaho hi Egypt a konna Israel te ahung doh uva chu amato kisat ding neina phalpeh lou ahin, hijeh a chu amaho chu sumang louva ana otdoh u ahi.
11 Tuhin amaho hin nangin katoupha diuva neina peh u gam'a konna paidoh ding eigotnu ahitai!
12 Vo ka Pathen'u, nangman amaho chunga hi thu natan louding hitam? Ajeh chu eidou diuva hungho hi atam behseh jengun keihon amaho douna dingin tha kanei jou pouve, tuhin iti ding hitam kahe tapouve hitia chu nangma jengbou kavetnu ahitan ahi,” atiuve.
13 Tuhin Judah te jouse chu chapang senho leh aji achateu toh Pakai angsung'ah ading tauvin,
14 hichun Pakai lhagao chu khoppi lah achun Asaph chate lah a konna Levi mipa Mattaniah chapa, Jeiel chapa Benaiah chapa Zechariah chapa Jahaziel chunga Pakai lhagao ahung chun ahi.
15 Hiti hin ahin seije, “Judah mipite ho leh Jerusalem’a cheng jousen chuleh Jehoshaphat lengpa nangman jong ngaijin! Pakaijin nangho kom'ah hitin aseije: Hiche mihonpi jeh khun kicha hih un tijat nan jong neihih un ajeh chu hiche gal hi nanghoa ahipoi Pathen’a joh ahi bouve.
16 Jing nikho tengleh amaho toh kidou dingin konsuh jengun, amaho hi Ziz lhang panga hung kitolsuh diu ahi, chutengleh nang hon amaho chu Jeruel kom gammang gal phaicham monga na kimaitopi diu ahi.
17 Nangho hiche kisatna a hi napan khel-khel loudiu ahi;, napan mun cheh un kigol toh unlang dingdet un chutileh nalah uva um jing Pakai mihuhdohna chu namu diu ahi. Vo Judah leh Jerusalem mite ho! Kicha hihbeh un lungkhamna jong nei hihbeh un, jing leh amaho toh kidou dingin kondoh jengun ajeh chu Pakaijin na umpi uvin ahi!” ati.
18 Hichun Jehoshaphat tollah abohkhup in, chuleh Judah ho leh Jerusalem'a cheng jouse abohkhup un Pakai achibai tauvin ahi
19 Hichun Kohat chate leh Korah chate adingdoh un a o neicha sun-sun'un Pakai avahchoi tauvin ahi.
20 Hiti chun jingpi tah in athouvun Tekoa gammang'ah alut tauve. Hitia chu ahung potdoh phatnun, Jehoshaphat adingin aseitai, “Vo Judah te leh Jerusalem’a cheng ten ngai uvin! Pakai na pathen chung uvah na tahsan nau ngamlha uvin chutileh na kiphudet diu ahi. Athemgao ten nas eipeh uchu tahsan'un chutileh na lolhin diu ahi,” ati.
21 Ama mipi ho toh akihoutoh jouvin, lengpan lasathem ho chu kinthenga akimanchah tengu leh avonngai hou chu akivonsah in chuleh amaho chu sepai ho masanga chun akijot sah in:
“Pakai chu vahchoi un;
ajeh chu ami ngailutna hi tonsot ading ahi! atiuve.
22 Ama hon hiche la chu asah phatnun Pakaijin gal miho chu athe cheh tan ahi.
23 Ammon gal mite le Moab gal miten Edom gal miho chu akisatpi uvin asumang hel tauvin ahi. Hijou chun amaho leh amaho akisatto uvin akithat gam tauvin ahi.
24 Judah gal mite chu neldi gam'a insang kisa a chu kaldoh uva avet uva ahileh gal miho chu tolla achap jengun koimacha ahoidoh aum pouvin ahi.
25 Jehoshaphat leh amite chu gal mite thilkeo ho chu chom'a ahung uleh mithi ho chunga chun thil mantam tah-tah leh thil manlu tah-tah songmantam jeng jong amu uvin ama hon apohlel set u achomdoh un nithum jen achom-chom jengun ahi.
26 Nili channan Phattheina Phaicham'ah akikhom uvin Pathen athangvah un ahi; hijeh a chu hiche phaicham lah chu tuni geijin Phattheina Phaicham akisah tan ahi.
27 Jehoshaphat nin a sepai te chu Jerusalem langah kipah tah in alepui tan ahi
28 Amaho hi Jerusalem khopi lamah ahungun selangdah leh semjang ahin saijuvin sumkon amutnun Pakai Hou-In lang ajontauve.
29 Hiche gamsung leh nam mite ho hin Pakaijin Israel te gal miho jouse ajopeh tauve ti ajahdoh phatnun kichat nan adim tauvin ahi
30 Hiti chun Jehoshaphat in lungmong tah in vai ahom'in Pathen'in akimvel mitea kon'in lung olna apetai.
Jehoshaphat Vaihom Sung Lahchom
31 Jehoshaphat hi Judah te lenga ahung pan chun akum 35 alhing tan ahi. Ama hi Jerusalem'a apansan kum 25 sungin vai ana hom'in ahi. Anu hi Shilhi chanu Azubah ahi.
32 Ama hin apa Asa chena dungjuijin achen apampet pon ahi. Chuleh Pakai mitmun dihtah in ana chonin ahi.
33 Ahinlah doihouna mun ho chu asumang dehpon ahi, chuleh mipi hon jong apu apa teu Pathen houna a alungthim'u aheilut hih lai uve.
34 Jehoshaphat thilbol dang ho jouse chu, akipatna apat achaina gei Hanani Chapa Jehu Thusimbu jihna a chun akijihlut in, hiche hi Israel Lengte Thusimbu kijihlutna ahi.
35 Hiche jou hin Judah lengpa Jehoshaphat hin Israel lengpa thil dihlou boljing Ahaziah toh ana kivop in ahi
36 Amahi toh ana kivop lhon'in Tarshish cheding kong ana sem lhon'in Ezion-geber mun'ah ana koi lhon'in ahi.
37 Ahinlah Mareshah a um Dodavah chapa Eliezer in Jehoshaphat chung changah gaothu ana seijin, “Nangma Ahaziah toh nakivop jeh in na natoh chu asubei sohtai,” ati. Hijou chun kongho jouse jong Tarshish lam'ah achethei tapon ahi.