21
Jehoram'in Judah Gam Avaihom
1 Jehoshaphat chu apu apate toh akicholdo khom tauvin, David khopiah ana kivui tan ahi. Hijou chun achapa Jehoram in vai ahin hom tan ahi.
2 Aman Jehoshaphat chate sopi phabep ana neijin ahi: Azariah, Jehiel, Zachariah, Azariahu, Michael, chuleh Shephatiah ahiuve; amaho jouse chu Judah lengpa Jehoshaphat chate ahiuve
3 Amaho chu apauvin sana, dangka, chuleh thilman tamtah-tah hi ana peuvin chuleh kul kikai khum Judah khopi ho khat cheh toh anape cheh in ahinla lenggam vang chu Jehoram anapei ajeh chu ama hi acha masapen ahi
4 Jehoram chu alenggam akisuhdet phat in athahat becheh na dingin asopiho jouse leh Israel leng cha ho jong athat gamsoh hellin ahi.
5 Jehoram leng ahung chan hin akum 32 alhing tan ahi, chuleh Jerusalem a hin kum 8 bou aleng changin ahi.
6 Ama hi Israel lengte chon'in achon'in Ahab tobangin atongin ahi. Ajeh chu aman Ahab chanu akichenpin Pakai deilou lam jengin akimang chan ahi.
7 Ahivangin David toh kitepna anei dungjuijin Davip chilhah ho hi asumang nompon ahi. Ajeh chu David lengmun alojing diuva Pakaijin kitepna ana neisa ahi.
8 Jehoram vaihom sungin, Edom mite in gal ahin bol uvin lenggam atum'in ahin kitundoh tauvin ahi.
9 Ahin Jehoram leh agal lamkaiho chu Sakol kangtalai chungah atouvun Edom ana nokhum mun ahi, ahinlah Edom sepai ten akol khum'un ahin amaho janin ajamdoh un ahi
10 Hichea patnin Edom ten Judah a kon'in chamlhatna ahin nei tauvin ahi, Hiche sunga hin Libnah khopi injong kiphinna ahin neitan ahi. Ajeh chu Jehoram hin apu apa te Pathen apaidoh tan ahi.
11 Ama hin doihouna munho ana tungdoh in Judah leh Jerusalem mipi ho hi Pathen dounan ana chonset sah gamtan ahi.
12 Elijah themgaovin Jehoram chu lekha ahin thotnin:
“Pakai napu napa David Pathen chun nangma hi na paidoh tan ahi, ajeh chu nangin napu Asa lengpa napa Jehoshaphat chon bangin nachon tapoi.
13 Amavang Israel lengho chonin nahung chon'in Judah le Jerusalem mipite hi Pathen doumah nabol sah in Ahab leh Israel lengho bangin nachon tan chuleh nang sanga phajo nasopiho jong nahin that gamhellin ahi.
14 Hiche jeh a hi Pakaijin na mipite leh nacha nanao te leh najite asuh genthei ding chuleh nanei nagou ho jong asuhmang ding ahi.
15 Nangma tah jeng jong nagil sunga thohlel umtah hivei na khumpeh a niseh a khoh cheh-cheh ding ahi,” ati.
16 Hiche chung chon hin Pakaijin Philistine te leh Ethopia te kom'a cheng Arab te chu Jehoram dou dingin ahin choudoh tan ahi.
17 Amaho hi Judah gam'a ahunglut un Judah te akisatpi uvin leng inpia nei le gou um jouse achom'un hiche tilouvin jong aji achate se akaimangun ahi. Achate lah a aneopen, Ahaziah bou akhenpeh in ahi.
18 Hiche jouhin, Pakaijin lengpa gilsunga chun thohlel umtah hivei anatdoh sah tan ahi.
19 Kumni sungin lengpan natna chu athohlel cheh-cheh in ajona in genthei tah in athipi tan ahi. Amipi ten jong apu apa teu athi teng alunghempi nau vetsahna a mei atijiu chu atih tapouvin ahi.
20 Jehoram in kum Somthum le ni alhinna lengmun alo pet ahin, kum 8 sungin bou vai ahom'in ahi. Athi chun koimacha alhase alunghem aumpon ahi. Ama chu lengte kivuina a avui pouvin David khopi sunga vang anavui nauvin ahi.