22
Judah Gam'a Ahaziah Vaihom
1 Chuin Jerusalem’a cheng ten lengpa chapa aneopen Ahaziah chu ama khel'in leng achansah tauve, ajeh chu Arab miten ahin delkhum uva achate ama chunga ho chu athagam'u ahitai. Hijeh a chu Juda lengpa Jehoram chapa chun vai ahom ahi.
2 Ahaziah chu leng ahung chan achun kum somli le ni alhing tan, ama hi Jerusalem a apansan kumkhat vai ana hom'in ahi. Anu chu Omri tunu Athaliah ahi.
3 Ama jong hi Ahab chon bang bangin achon'in anu thupeh dungjuijin thilse jeng ana bollin ahi.
4 Apa thi jouvin Ahab insung mite thumob dungjuiya achon jeh in Pathen mitmun thilse jeng abol'in amanthah lotan ahi.
5 Amaho thumop dungjuijin Israel lengpa Ahab chapa Jehoram toh Aram lengpa Hazeal toh kisatto dingin Ramoth-gilead a akon lhon'in hichea chun Aram ten Jehoram chu asukha uvin ahi.
6 Ramoth a akisukhah chu amaha damdohna dingin Jezreel khopia akinung letan ahi. Ajeh chu Joram akisukhan, Judah lengpa Ahaziah chu Jezreel a adammona vil dingin achen ahi.
7 Joram vedinga achesuh chu Pathen'in alhuhna dinga akalson sah ana hikhatai. Ajeh chu ama agalhun phat in Nimsi chapa Jehu toh akisat ton alhuh kam lotan, Pakaijin Jehu chu Ahab insung mite sugam dinga ana lhen ahitan ahi.
8 Jehu chun Pathen thupeh dungjuiya Ahab insung mite sugam dinga ahung kipat laitah hin aman Judah leng chate leh Ahaziah sopi ho chate chu amudoh in athat gamtan ahi.
9 Hijou chun aman Ahaziah chu ahol in ahileh Samaria a ana kisel chu amudoh tauvin ahi. Jehu kom'ah ahin puilutnun, athat tan ahi. Ajeh chu ama hon avuiju chun amaho akihouvun, “Ama hi alungthim pumpia Pathen hol Jehoshaphat tupa ahi,” atiuve. Hiche jou chun Ahaziah insunga lenggam vaipo thei ding ahing nalai ho lah a aum tapon ahi.
Athaliah Lengnun Judah Gam'a Vai Ahop
10 Ahaziah nu Athaliah hin achapa athitai tihi ahetdoh phat in ama ahung kipatnin Judah gam'a lengmun hin chuthei jouse chu asumang gamtan ahi.
11 Ahinlah Ahaziah sopinu Jehosheba, Jehoram chanu chun Ahaziah chapa chapang Joash chu lengpa chate ana thagam holah a kon chun ana seldoh in ahi. Amanun chapang Joash chutoh avekolnu chu lupna khat a akoijin ahi. Hiti chun, Jehoram lengpa chanu Jehoiada thempu pan ana kichenpi Jehosheba, Ahaziah sopinu chun Athaliah in athagamna dinga kon chun ana seldoh in ahi.
12 Hiti chun Athaliah in gamsunga vai ahom kum 6 sungse achun Pathen Hou-In'ah ana seldoh in ahi.