23
Athaliah Douna
1 Athaliah vaihom kal kum sagi lhin kum chun, Jehoiada thempu chun natoh pat dingin thulhuh aneitan ahi. Aman sepai lamkai hangsan mi nga ho chu akouvin chule kithutona anei tauve. Sepai lamkai mi nga ho chu: Jehoram chapa Azariah, Jehohanan chapa Ishmael, Obed chapa Azariah, Adaizah chapa Maaseiah chuleh Zikri chapa Elishaphat ahiuve.
2 Amaho hi Judah khopi ho jousea acheuvin Levi te phung'a phung upa cheh Jerusalem’a ahin puilutnun ahi.
3 Amaho Hou-In achun akikhom'un lengpa chapa Joash chutoh kitepna ana sem'un ahi.
Jehoiada chun amaho kom'ah anaseijin: “ Hiche ahin lengpa chapa aum’e! Avai hopna ding phat chu ahung lhung'e! Pakai thutep dungjuiya David chilhah chu ileng diu ahi.
4 Nabol diu chu hiche hi ahi. Thempu ho leh Levi te chu Sabbath nikhoa kinbol'a ahung tengu leh, hop thum'a hopkhat in Hou-In kelkot ho anga diu ahi.
5 Adang hop thum'a hopkhat chun leng inpi anga diu, chuleh hop thum'a hopkhat man Kulpibul Kelkot phung na nga diu ahi. Mipi abonchauva Pakai Hou-In mai hongcha a chu kikhom ding ahiuve.
6 Ahinlah Pathen insunga chu Pakai kinbol Levi te toh thempu akiseiho tailou adang hunglut thei louding ahi. Amaho chu Hou-Insung'a lutthei diu ahi ajeh chu amaho chu atheng ahiuve. Ahinla adang hose chun Pathen thupeh ngah a apam'a ding diu ahiuve.
7 Nangho Levi te chun, lengpa chu naum kimvel diu nakhut uva manchah nakichoi cheh diu ahi. Insunga hunglut kigo jouse chu natha diu ahi. Lengpa naumpi diu achena chan'a nakilhonpi diu ahi,” ati.
8 Hiti chun Levi te leh Judah ten thempupa Jehoiada thupeh bang-bang chun achon tauvin ahi. Lamkai khat cheh chun anoija ho chu akipuijun Shabbath nileh akin uva akimanchah petnu hihen lang a onpetnu hijongleh aumpi jingun ahi. Ajeh chu thempupa Jehoiada in akin'u kichai teng koima alha ongpon ahi.
9 Chuleh Jehoiada thempupa chun sepai aja-aja lah a lamkai ho chu Leng David in Pathen Hou-In'a akoi ompho ho leh tengcha ho chu ahoppeh un ahi.
10 Hiti chun aman sepai ho chu Hou-In kotmai vella chun chemjam dodohsan akichoisah in lengpa hoibitna dinga chun phasademin pan alahsah in ahi.
11 Hijou chun Jehoiada in Joash chu ahin puidoh in aluchunga lallukhuh akhuhpeh in lengte kivaihomna danbu chu apen hiti chun leng achansah tan ahi. Thempupa Jehoiada leh achaten Joash chu thao anu uvin chuleh mijouse chun, “Lengpa hingsothen” tin asam'un ahi.
Athaliah Thi
12 Athaliah chun lengpa thangvahna a kisam mipi ogin husan chu ajah phat in, mipi dimsetna akikhopnau Hou-In a chu ipi soh hitam tin ahung lhailut in ahi.
13 Amanun agahven ahileh lengthah pa chu Hou-In lutna khombul panga sepai lamkai ho leh sumkon mut hon ana umkimvel chu amun ahi. Ama leng channa a alopnau leh akipapinau ogin chuleh semjang saipum'a lasaho leh sumkon mut ho thil gin chu akithong jeju jengin ahi. Hichun amanun asangkhol abot eh jengin, hiche hi “Lengmun chuna ahi, Lengmun chuna ahi” tin asamtan ahi.
14 Hichun Jehoiada thempu pan amanu chu Hou-In sunga akitha ding chu adeipon hijeh chun sepai lamkai ho chu aseipeh in, “Amanu chu polanga kaidoh unlang koi hijongleh ama chu huhdoh go aum leh that jengun, Pakai Hou-Insung'a amanu chu tha louding ahi,” ati.
15 Hijeh chun ama hon amanu chu amanun leng inpia apuijun sakol kelkot kom'a chun athat tauvin ahi.
Jehoiada In Hou Asemphat
16 Jehoiada thempu pan Joash lengpa leh mipite chu akou khomin Pakai mite ahi jingna diuvin kitepna khat aneipi tan ahi.
17 Hijou chun Baal hou-in'ah acheuvin ajep lhugam tauvin ahi. Ama hon semthu pathen ho leh amaicham ho jong avochip gamun Baal thempupa Mattan jong amaicham maija chun athat tauvin ahi.
18 Jehoiada in thempu ho leh Levi te chu Pakai Hou-In na natohna a mopohna apen ahi. Amaho hin Leng David in angansenau kinho chu atoh diu Mose dan semtoh kitoh a Pakaijin pumgo thilto gimnamtui halnamna kin jong atoh diu ahi. Amaho hin tumging toh thoa golnop bolna jong mopohna alah diu ahi
19 Jehoiada in Hou-Insunga hi miboh ho ahung lut louna dinga avesui dingin Hou-In kelkotna angah ding akoijin ahi.
20 Hiti chun Jehoiada in sepai lamkaiho leh gamsunga mithupiho, gamvaipoho leh mihonpi ahin puijin, chuin Hou-In'a kon'in lengpa chu ahin puidoh in kelkot sahlangpa achun alut un leng inpi chu ajonlutnin, lengpa chu alenggam laltouna a atousah tauvin ahi.
21 Hichun gamsung mipite chu Athaliah kitha tahjeh in kipana leh thanopna a adimsetnun chuleh khopi jong lungmon aum tan ahi.