24
Joash In Hou-In Asemphat
1 Joash leng ahung chan chun kum sagi ahibep in, chuleh Jerusalem’a chun kum somli vai anahom'e. Anu chu Beersheba khopia konna Zibiah kitinu chu ahi.
2 Aman Jehoiada thempupa ahin laisen Pakai lungdei lam ngen ana bollin ahi.
3 Jehoiada in Joash lengpa chu ji ni apuipeh in amanin chapa le chanu ho ahinpeh lhon'in ahi.
4 Ama leng ahung chan phat chomkhat jouvin Pathen Hou-In chu semphat ding ahin gotan ahi.
5 Aman thempu ho leh Levi te chu hiche thupeh ho hi apen: “Judah khopi hoa hi na cheleuva kumlhun seh a Hou-In semphatna dinga mipi ho jouse lah a sum nadon dingu ahi. Kinom hih un!” ati. Ahivangin Levi ten gangtah in apan jeng pouve.
6 Hijeh chun Joash lengpan thempulen Jehoiada chu akouvin adongtan ahi, “Ipi dinga kumseh a Hou-In semphatna dinga Pakai lhachapa Mose’n mipi holah a sum dong dinga dan anasem dungjui ja thupeh kanei chu Levi ten Judah leh Jerusalem’a agadon louvu ham?” atin ahi.
7 Ajeh chu miphalou numeinu Athaliah chaten Hou-In chu avohset uva Pakai Hou-In sunga thil theng ho chu Baal doi houna a anaman a asuhboh ahi.
8 Hichun lengpa thupeh dungjuijin Thingkhong khat chu Pakai Hou-In kelkot polanga chun akhaijun ahi.
9 Ama hon Juda gam leh Jerusalem gam pumpia thu athotnun Pathen lhacha pa Mose Pathen'in gamthip a thu anapeh bang-banga apeh ding chule atohdoh cheh diu ahi
10 Hijou chun lamkai ho jouse leh mipi ho jouse chun kipah leh thanom tah cheh in atohdoh diu ho chu Thingkhonga chun adipset uvin ahi.
11 Sum kholna chu adim teng, Levi ten hichu kingpa migun ho kom'a apolut jiuve. Chuteng thutanna a thuchingpa le thempulen migunho ho chun alah uva Hou-In a chu anungpoh jiu ahi. Hiti hin niseh in abol jiuvin, chule sum tampi akhomdoh uvin ahi.
12 Lengpa leh Jehoiada chun Hou-In semphatna dinga mopohna neiho kom'a chun apelut jilhon'in ahi. Amaho chun Hou-In semphatna dinga songkheng them ho leh thingthem bol ho chuleh thihkheng themho kom'a apehlut jiuvin ahi.
13 Natongho chun hatah in atongun Hou-In chu dettah in akisah tilla tobang asodoh sah tauvin ahi.
14 Asemphat chai phatnun sana leh dangka aval ho chu lengpa leh Jehoiada khut a apelutnun amanin Pakai Hou-In na manchah ding sana le dangka chu kong le bel semna in amang lhon'in ahi. Jehoiada hin laisen Pakai Hou-In'ah pumgo thilto tang louvin abol jingun ahi.
15 Jehoiada chu ateh cheh-cheh tan, kum 130 alhingin athitan ahi.
16 Ama chu athiphat in David khopia lengte kivuina a avui tauve, ajeh chu ama hin Pakai Hou-In le Pathen dingin chuleh Israel mipite dingin thilpha ana bollin ahi.
Jehoiada Semphatna Nungset Kit
17 Jehoiada thinung hin Juda lamkaite ahungun lengpa kom'ah chibai ahung boh un ahileh lengpan jong amaho thu angai tan ahi.
18 Ama hon apu apa teu Pathen, Pakai Hou-In chu adalhauvin semthu pathen leh doiho ahouvun hitia hi asuhkhel jeh un Pathen lunghanna Judah le Jerusalem mite chunga ahung chutan ahi.
19 Ahijeng vang'in Pakaijin athemgao ho asol'in ama kom langa ahung kile kitna diuvin gihna thu agasei sah in ahinla amaho ahung kilehei nom pouvin ahi.
20 Hijou chun Pathen Lhagao chu Jehoiada thempupa chapa Zechariah chungah ahung pansan ahileh ama jong mun sanga adingin hiti hin ahin samtan, “Pathen'in hiti hin aseije: Nanghon ipi dinga thupeh hi nangai dauva nachung uva hamsetna nakiloilut khum uham? Nang hon Pathen na dalha tauvin ahileh aman jong na dalha tauve!” ati.
21 Lengpa Joash hin Zechariah dounan mipi toh akihoutoh un, hiti chun lengpa thupeh dungjuijin mipi hon Pakai Hou-In hongcha a songin asep tauvin ahi.
22 Joash lengpan apa Jehoiada in itobang thilpha abolpeh tichu asumil hel jengin achapa chu athat tan ahi. Zechariah chun athikon'in “Pakai eibolnau ho hi hinven lang kaphu neihin lahpeh teijin,” atin ahi.
Joash Vaihom Kichaina
23 Hiche kum chavang laijin Aram sepai ten Judah leh Jerusalem mite ahindel khum'un alamkai hou athat gam'un thil tamtah achomdoh un Damascus lengpa agah thotnun ahi.
24 Aram galmi chu lhomcha bou ahi, ahinla Pakaijin amaho sanga gamchenga tamjo Judah te chu ajosah in ahi ajeh chu amipi ten apu apa teu Pakai a Pathen'u chu donlouvin anakoi tauvin ahi. Hiti chun Joash lengpa chunga chun Pathen thutanna ana lhung tan ahi.
25 Ama chu nasatah in akisukha tan chuleh agal miten adalhah phat chun asepai lamkai teni akihoutoh lhon'in alupna a agathat lhon tan ahi. Jehoiada thempupa chapa ana tha jeh a aphu ana lah lhon ahitai. Ama chu David khopia ana vuijun, ahinlah lengte kivuina mun ana hitapoi.
26 Ama douna a ana kihoutoh teni chu Ammon minu Shimeath chapa Zozacar leh Moab minu Shomar chapa Jehozabad ahi lhon'e.
27 Lengte lekhabu ah Joash chate thusim leh ama douna chung changa themgao thuseidoh ho chuleh Hou-In ana sahphat thu ho chu Lengte Chungchang Hilchetbu a ana kijih lut in ahi. Ama khel'in achapa Amaziah in vai ahin homtan ahi.