25
Amaziah In Judah Gam'a Vai Ahop
1 Amaziah hi leng ahung chan chun kum somni le nga alhing tan, ama hin Jerusalem’a kum somni le ko sungin vai ana hom'e. Anu chu Jerusalem’a konna Jehoaddin ahi.
2 Ama hin Pathen lunglhaina lamjeng ana bollin ahinlah alungthim pumpi ana pepon ahi.
3 Ama hin athaneina ahin kisuhdet phat in apa ana that sepai lamkai teni chu ana that in ahi.
4 Ahinlah achateu ana thapehpoi, aman Mose Dan a kisei ana juijin ahi. “Achate thilse boljeh a apate kithat louding chuleh pate thilse boljeh a achate kithat louding dan chu anajui ahi. Mi chu ama tah in thilse abol jeh a bou kithat ding ahi,” ati.
5 Lengpa Amaziah in Judah leh Benjamin phungsung asemtoh in aphung dungjuijin galsat thei sepai ho chu sangkhat chunga vaihom jakhat chunga vaihom akoijin ana gongtoh in ahi. Hiche ho chu kum somni leh achung langho abonchauvin 300,000 alhingun ahi. Hiche ho chu tengcha leh ompho mangcha a galsatje them cheh lhentum ho chu ahiuve.
6 Hiche chungchon chun aman sepai 100,000 , dangka pounds 7,500 in Israel sepaiho achodoh in ahi.
7 Ahinlah themgao khat ache in lengpa kom'ah, “Hiche Israel sepai ho hi kilhonpi hih in, Pakaijin Israel aumpi poi. Aman hiche Ephraim miho khu apanpi louding ahi.
8 Nangin amaho chu na sepaite toh nasoltha a ahileh, iti pan jong leu chun nagal miten najo diu ahi. Galjo leh gallelna hi Pathen khut a um ahibouvin, aman nagal mite najopeh ding ahinai” ati.
9 Amaziah chun themgaopa kom'a chun “Ahileh ka sumpeh ho chu iti ding hitam?” ati.
Pathen mipan adonbut in, “Pakaijin hiche sanga tamjo chu nahin lepeh thei ahinai!” atipeh e.
10 Hijeh chun Amaziah in a sepai chohsa ho chu a inlang uva alesol tan ahileh amaho Judah mipi ho chungah lunghang tah in a inlang uva akile tauvin ahi.
11 Amaziah ama le ama akihan lhon Chikhuh Phaicham achun a sepai te apuilutnin Edom sepai te chu akisatpin 10,000 athatnin ahi.
12 Chuleh adang10,000 jong gal-hingin aman in ahi. Agal-hing amat uchu kawl chunga apuitouvun hiche a kon chun aseplha uvin ahileh abonchauvin anoilanga songpi chunga achu uvin abon'un athigam tauvin ahi.
13 Chujouvin, Israel sepai te Amaziah in galla akonpi nomlou anungsol hou chun Samaria leh Beth-horon kikah a um Judah khopi ho chu adelkhum'un mi 3000 lang athat un thil tamtah jong achomdoh un ahi.
14 Amaziah in Edom mite agajo a ahung kileu chun Seir mite doibom ho chu ahin polutnun akitunun gimnamtui alhutnam'un pathen houvin ahou tauvin ahi!
15 Hiche athilbol hin Pathen alunghan sah lheh tan hijeh chun aman a themgaopau chu Amaziah kom'ah asol'in hitin agaseije, “Nang thaneina a kon jenga jong amite huhdoh joulou pathen ho chu nangin ibola nahou ham?” agatisah in ahi.
16 Amaziah chun themgaopa thusei chu asutangin lunghang tah in ahin donbut in, “Nang hi itih a lengpa thumop dinga ka pansah nahim? Thip in achuti louleh nang hi kahin thatei ding nahi!” atin ahi.
Hijeh chun themgao pa chun hiche gihna hi aseijin athip tai: “Nangin kahilna ho jouse chu na nahsah loujeh in Pathen'in nang hi na suhmang got ahitai tihi kahetai,” ati.
17 Judah te lengpa Amaziah in ama thuhil'a pang ho thu chu alan Israel tetoh kisat dingin tohgon ahin neitai. Hiti chun, aman Israel Lengpa Jehoahaz chapa chuleh Jehu tupa Jehoash kom'a chun thu ahin thot tan: “Hungun galmun'a kimutou hite!” tin ahin chouvin ahi.
18 Ahinlah Israel leng Jehoash in Judah lengpa Amaziah chu hiche thusim hin adonbut in: “Lebanon Molhoa kon'in lingthing phung khatnin Cedar thingphung kom'ah thu athot in: 'Ka chapa jidingin na chanu chu neipen.' Ahinlah gamsa khat ahungvah len lingphung chu ahung pal bongtan ahi!
19 “Edom mite kajoutai' natin chule hichu na kiletsahpi in ahi. Ahinlah na ina nakitou thimbeh dinga ka seipeh nahi. Nangman Judah mite manthahna ding bep a mi nachou ham?” ati.
20 Ahinlah Amaziah chun mi thusei angaipon, Edom mite doihou ho chu aman jong ahin hou phat a Pathen'in ama chu gal alelsah got ahi.
21 Hiti chun Israel lengpa Jehoash chu Judah lengpa Amaziah toh kisat dingin ahung kondoh tan ahi. Amaho chu Judah gam'a Beth–shemesh mun'ah akimai touvin ahi.
22 Judah Sepai ten alel'un a inlang uvah ajamgam tauvin ahi.
23 Jehoash in Amaziah chu amanin Jerusalem langah akaitan ahi. Hichun aman Jerusalem kulpi pal chu Ephraim kelkot phunga pat kulpi ning kelkot phung geijin feet 600 jen avochim tai.
24 Aman Pathen Hou-In sunga kon'in sana le dangka chuleh thil jouse chu abonchan akichomdoh in, angahpa Obed-edom jong chu amat than chuleh lengpa ina thilgun ho jouse jong achom'in chuleh ahingin mi phabep jong Samaria langah akai tauvin ahi.
25 Israel Lengpa Jehoash thi jouvin Judah Lengpa Amaziah chu kum som le nga ahing nalaijin ahi.
26 Amaziah vaihom akipat apat akichai geija anatoh athilbol ho jouse chu Judah Le Israel Lengte Lekhabua kijihlut sohkeijin ahi.
27 Amaziah Pakaiya konna ahung kiheimanga kon'in Jerusalem a ama dounan tohgon ahung umtan ahileh ama Lachish lam'a ajamtan ahi. Ahinlah ama hon Lachish lam'a mi asol'un hichea chun ahin that tauvin ahi.
28 Hichun ama hon sakol a ahinpo uvin Judah khopi ah apu apate kivuina a avui tauve.