26
Uzziah In Judah A Vai Ahop
1 Judah mipi ten Amaziah chapa Uzziah chu kum som le gup alhin kum'in apa khelin leng achan sah tauvin ahi.
2 Apa Amaziah athijou chun Uzziah in Elath anung lahpeh kit in akhopi chu asempha kit in ahi.
3 Uzziah leng ahung chan chun kum som le gup alhing tan ahi, chuleh aman Jerusalem achun kum somnga le ni sungin vai anahom'in ahi. Anu chu Jerusalem’a konna Jecoliah kitinu chu ahi.
4 Apa umdan chu ana chepi in Pathen deilam jong ana bollin ahi.
5 Hou langa ana puihoijah Zechariah anahin laisen Pakai chu kitahna neitah in ana juijin ahileh Pathen'in jong phatthei ana boh in ahi.
6 Uzziah in Philistine te dounan gal ana sat in ahi. Aman Gath, Jemniah leh Ashdod khopi kulpi ho chu ana volhun ahi.
7 Pathen panpina jallin Philistine te Gur a cheng Arab mite Meun mite ana jouvin ahi.
8 Meunim miten jong ama kom'ah kai anape uvin hiti chun ama hi ahung hatdoh lheh jengtan ahileh Egypt gamsung geijin ana minthang peh in ahi.
9 Uzziah in Jerusalem ninglang kelkot leh phaicham lang kelkot chuleh kulpi pal kihei konna mun ho jouse chunga chun insang asadoh in hiti hin khopi kulpi chu ana sudet sohkeijin ahi.
10 Aman gam ong lah jenga jong kulpi dingin insang ho anasan chuleh twiputna dingin mun tamtah ana laijin, lhumlam molpang ho leh phaicham'ah gancha tamtah ana vah in ahi. Aman mipi ho jong lengpilei bol dingin atilkhouvin thinglhang lou phatna hoa jong lou abolsah in ahi.
11 Aman galmi tamtah galsat dinga kigosadem ho aneijin, amaho record chu leng insungmi sepai lamkai Hananiah vetsuina noija thuching teni Jeiel leh Maaseiah in ajihlut lhon'in ahi.
12 A sepai te chu sepai lamkai 2600 ho thupehna noija um ahiuve.
13 Amaho noija lengpa huhna dinga thaneitah a galsat thei sepai 307,500 aneijin ahi.
14 Uzziah sepai hijat dingin ompho, tengcha thih lukhuh asempeh in, thalpi jong asempeh in song sena bom jong asempeh in achang ding jong alokhom peh in ahi.
15 Jerusalem khopia khopi pal chunga konna song lentah-tah sedoh theina ding leh thal kapdoh theina ding manchah semthem ho agoijin ahi. Aman Pathen’a konna panpina amu jeh in athahatna akijesal'in gamtin'ah aminthang lheh jeng tan ahi.
Uzziah Chonset Le Gotna Kipeh
16 Uzziah lengpa hi ahung hatdoh phat in ahung kiletsah tan hiche hin alhuhna ding lampi ahin gongdoh tan ahi. Aman a Pakai a Pathen douna in Hou-In'ah alutnin maicham muntheng achun gimnamtui ahal gotan ahi.
17 Thempupa Azariah chu mi thahat leh mihangsan cheh thempu hotoh akilhonin lengpa chu ajui tauvin ahi.
18 Ama suhtangna ding chun hitin aphoh un, “Uzziah, nangin Pakai dinga gimnamtui halna ding tha nanei poi. Aaron chilhah hitobang bol dinga kisutheng thempu hon bou abol diu ahi. Hiche munthenga kon hin potdoh in nangin Pakai Pathen doumah nabol jeh a hi amalsomna nachan jou louding ahitai,” atiuvin ahi.
19 Uzziah chun gimnamtui halna chu achoijin Hou-In sunga maicham panga chun adingin ahi. Ama thempu ho chunga ahung lunghan jah jeng phat chun tiphah khohtah chu adeh panga ahung chutan ahi.
20 Azariah leh thempu dang ho chun lengpa dehpang chu tijatah in aveuvin ahi. Hijou chun ama chu Hou-In'a kon'in anodoh tho tauve, ajeh chu Pakaijin ama chu ajep ahitai.
21 Uzziah lengpa chu hiche phahna jeh hin ahinkho lhung keijin dan dungjuijin theng louvin aum tan ahi. Hou-Insung lelut kit thei louvin aleng hina a akin tongthei talouvin a in'ah achuti umtan achapa Jotham in ama khelin agam sunga vai ahom tan ahi.
22 Uzziah vaihom sunga atoh ho jouse chu Amoz chapa themgao Isaiah in ajihlut sohkeijin ahi.
23 Uzziah athi phat in lengte kivuina gamsunga avuijun ahinlah aphah jeh chun lengte kivui na lhan avang avui tapouve. Achapa Jotham in aleng mun chu alotan ahi