32
Assyria In Judah Abulu
1 Hezekiah lengpa hin kitahna neitah a Pakai lung deilam ahollai tah in Assyria lengpa Sennacherib hin Judah gamsung ahin bulu tan ahi. Aman kul kikai khum khopiho ahin lonvuh tan chuleh asepai te chu kulpi pal ho chu vochip a khopi sunga lut dingin thu apen ahi.
2 Sennacherib in Jerusalem khopi ahin nokhum tai ti amu phat in,
3 ama noija lamkai ho leh sepai lamkai hotoh akihoutoh in khopi polam'a longdoh twi chu suhtang ding tin akilol tauve.
4 Hiti chun mi tamtah akikhom doh un twi gamsunga longlut jouse chu asutang gam'un hitin asei uve: “Ipi dinga Assyria lengpa chu hunga twi neng jeng junga amuthei diu ham?” atiuve.
5 Hiti chun aman khopi chim ho chu asemphan khopi sunga panmun akisemtoh in akisuhat in pal chunga insang ho jong atungdoh in, chuleh polanga pal chom jong asemben, gal manchah ho leh ompho ho jong nengchet in asem'in ahi.
6 Aman khopi sunga mipi ho chu sepai lamkaiho noija akoiyin amaho chun khopi kelkot kom mun onglaija chun akhom'in hiti hin ajah uva chun tilkhouna thu aseijin ahi.
7 “Hat unlang hangun! Assyria lengpa leh ahin kilhonpi mihonpi jeh khun kicha hih un, ajeh chu ama umpiho sangin eiho umpi ho atamjo uve,” ati.
8 Ajeh chu ama umpi ho hi tahsaphe muthei sepaiho ahiuve, amavang eiho eiumpi uva chu Pakai I-Pathen'u ahin ama tah in igal'u hi eisat peh diu ahi,” ati. Hiti hin Judah lengpa Hezekiah thucheng ho hin mipi ho chu alung ngamsah in ahansan sah lheh jengtan ahi.
Sennacherib In Jerusalem Agih
9 Assyria lengpa Sennacherib chun asohte chu Jerusalem langah asol'in , Judah lengpa Hezekiah leh Jerusalem'a um Judah te jouse kom'a chun aseisah in:
10 Assyria lengpa Sennacherib in hitin aseije: Ipi kisonpi nanei uva kalonvuh khumsa Jerusalem'a hi nahiti um ngam uham?
11 Hezekiah in aseijin, 'Pakai na Pathen uvin nangho keima a konna nahuh diuva asei chu na joulhep u ahin, gilkel le dangchah a na thisah gam kigot u ahi bouve.
12 Ama hilouham houdang maicham leh halnam ho susea Judah te Jerusalem mipi te jah a houkhat seh leh maicham khat seh bou nei ding tia chu Hezekiah hilou ham?
13 Kapu kapa teu leh keiman namdang ho chunga katoh nau hi nahet lou uham? Namdang ho pathen hon Assyria lengpa a konna amite ahuhhing jou mong-mong am?
14 Itih monga gamdang pathen'in agammi keihoa konna ahuhdoh jou beh am? Ahileh tua chu iti na ngait uva na Pathen'u chun keihoa konna na huhdoh jou diuva chu ipin nakinep sah uham?
15 Phatah in kingaito uvin Hezekiah chu hiti chun kilhep lhah sah hih un, tahsan hih un. Koimacha nam Pathen'in Assyria lengpa a kon'in amite ahuhdoh jou pon ahi. Tahbeh in nangho Pathen'in jong kei hoa konna nangho nahuhdoh joubeh ding ham!” ati.
16 Assyria lamkai ho chun Pakai Pathen leh Pathen sohpa Hezekiah demna chu thuthanghoi tah-tah jong aseijun ahi.
17 Assyria lengpan athot lekha chun Pakai Israel Pathen chu aha dem lheh jengin ahi. Hichun aseije: “Namdang ho pathen'in ka thanei nauva kon'in amiteu ahuhdoh jou pouvin ahi. Hezekiah Pathen'in jong keija kon'in amite huhdoh jou ponte,” atin ahi .
18 Ama hon mipi het ding chun Hebrew paovin Jerusalem mipi ho leh pal chunga umho jahsah a lungneosah ding hitia chu bailamtah a jotheina ding atiu ahi
19 Judah te Pathen chu namdang ho semthu pathen toh kibanga aseikhum jengu ahi.
20 Tun Hezekiah lengpa leh Amoz chapa Isaiah chu Pathen hengah kap le pengin atao lhon tan ahi.
21 Hijou chun avantil khat ahin sol'in hiche vantil chun mihang mihat, lamkai Assyria lengpa sepaiho jouse chu athat gamhel tan ahi. Hichun ama jahcha tah leh jumtah in agam'a akile tan ahi. Hichun aman asemthu pathen hou-in'a aum sungin achate alut un chemjam in asatlih tauvin ahi.
22 Hiti chun Pakaijin Hezekiah lengpa leh Jerusalem mipi te chu Assyria lengpa leh galmi dang hoa kon'in ahuhdoh tan ahi. Hiti chun Pathen'in amite chu avel uva cheng gamsung mihoa kon'in jong chamna alensah tan ahi.
23 Mi tamtah in Pakaiya dingin Jerusalem'a kiphaldohna thilpeh tamtah ahin choijun chuleh Judah lengpa Hezekiah dingin kipa thilpeh ahung peuvin hichea konhin Hezekiah chu namtin lah a choisangin aum tan ahi.
Hezekiah Dammo Le Damdoh
24 Hiche phat lai hin Hezekiah chu ahung dammo tan thi natna ahitai. Pathen kom'a ataovin ahileh Pathen'in na damdoh ding ahinai atin melchihna khat apen ahi.
25 Ahinlah Hezekiah chu Pakaijin Judah leh Jerusalem chuleh ama chunga thilpha abolpeh ho chunga kipathu seitheilou khop in ahung kiletsah tan hijeh chun ama chung leh Judah le Jerusalem chunga chun Pathen lunghanna ahung chutan ahi.
26 Hiphat chun ama leh Judah te leh Jerusalem mite ho nasatah in akisunem'un ahileh Hezekiah hinlai sungin achung uva hunglhung ding ho chu asoh tapon ahi.
27 Hezekiah chun nei le gou ahao lheh jengtan jana lentah jong achangin ahi. Aman sana le dangka chuleh songmantam, namtui ho, ompho ho leh thilman tamtah ho koina ding dankhat jong asauvin ahi.
28 Hiche chung chon'in jong chang le mim, lengpitwi chuleh olive thao le gancha ho koitupna ding chuleh kelngoi chal ho inding agetpeh in ahi.
29 Pathen'in kelngoi gancha jat chom-chom tamtah leh nei le gou tamtah anapen khopi tamtah jong ana tundoh sah in ahi.
30 Hezekiah in Gihon twiput twilondoh na achungnungjo chu ana ting tanin David khopi nilhum langa alonsuh sah in ahi. Hezekiah hi atohna lam lam'ah akhangtou lheh jengin ahi.
31 Ahivangin, gamsung’a suhmil theilou thilsoh ho thudol khol dinga Babylon a konna palaiho ahung uva chun, Hezekiah lungthim’a ipi um’em ti vetlhahna in Pathen chu ama a konin akikangse in ahi.
Hezekiah Vaihom Sung Lahchom
32 Hezekiah lengpan athilbol jouse leh Pakaiya akipehna ho jouse chu Amoz Chapa Isaiah Gaothilmu Ho,chu Judah Le Israel Lengte Lekhabu a akijihlut tha in ahi.
33 Hezekiah athi phat in lengte kivuina lhan achungnungpa achun avuijun ahi. Judah ho leh Jerusalem mipi ten athi chun jana nasatah ana peuvin ahi. Hiti chun achapa Manasseh in lengmun alo tan ahi.