33
Judah Gam'a Manasseh Vaihop
1 Manasseh leng ahung chan chun kum som le ni bep anahin aman Jerusalem'ah kum somnga le nga geijin vai ana hom'in ahi.
2 Ama hin Pakaijin Israel chate masanga ana nodoh namdang ho chonna kidah umtah ho chonna chu ana chepi in Pakai mitmun thilse ngen abol'in ahi.
3 Ama hin apa Hezekiah in ana vohlhuh munsang ho chu ana sapha kit in, Baal doihouna ana tungdoh kit in pathen limsemthu Asherah doi ho chu ana tungdoh kit in ahi.
4 Aman Pakai Hou-In mai leh amiten ama ahin houna ding mun atiuva chun semthu pathen houna maicham atungdoh kit in ahi
5 Pakai Hou-Ina hongcha teni a chun ahsi ho houna maicham ana tungdoh in ahi.
6 Ben-hinnom phaicham'ah achate pumgo thilto in ana tohdoh in ahi. Themka pou anabdongin, ailhim jong, phunsan jong ana chepin, thilha gaochang mi jong ana tahsanin mitphel doithem ho jong ana mangin ahi.. Hiti hin Pakai mitmun thet um tah-tah ana boldoh in Pathen ana phin lunghang in ahi.
7 Hiti in Manasseh hin milim doihouna jong Pathen Hou-In sungah ana tungdoh in, hiche Hou-In chung changa Pathen'in David le achapa Solomon jah a anasei: “Hiche Hou-In sung le keiman Israel phung hijat lah a ka lhendohsa Jerusalem khopi sunga hi a itih chan'a jong keima eiki hou jingna ding mun'a ka lhendoh ahi.
8 Chuleh Israel mipi ten ka thupeh hi ajui uva chuleh ka lhacha pa Mose’n anapeh u dan chu anit uva ahileh apu apa teu kanapeh gam'a konna koima ka kaidoh sah louhel ding ahi,” ati.
9 Manasseh in Judah mipi te achonset sah hi keiman kamite ahung kitol uva kana nodoh peh namdang ho chonsetna sangin agimnei jon ahi.
10 Pakaijin Manasseh le amipi te anagih vang'in ama hon ana nahsah pouvin ahi.
11 Hijeh chun Pakaijin Assyria sepai te atildoh in Judah te chungah gal abolsah in, ama hon Manasseh chu amanun thihkol toh abu tauvin thih khaovin akanun Babylon'ah akailut un ahi.
12 Ahahsat phat in ahung kineosah in a Pakai a Pathen'ah ahung kiheilut in kithopi athumin ahi.
13 Pathen'in Manasseh taona asangin Jerusalem’a alesol'in avaihom sahkit in ahi. Hiche phat chun Manasseh in Pakai chu Pathen tahbeh ahi ahechen tan ahi.
14 Hiche jouhin Manasseh chun David khopi solam panga chun polang pal chu asesangin, Nga Kelkot sahlang Gihon Twiphul kom phaicham a kon'in Ophel kiti khopi kom geijin pal chu asesangin ahi. Kul kiget khum Judah khopi ho khat cheh a chun sepai aloi loijin lamkai khat noija akoijin ahi.
15 Hou-In a kon chun gamdang pathen ho leh milim semthu aman anakoi ho leh namdang maicham thinglhanga atundoh nau ahou-in hou leh Jerusalem mundang danga umho chu aladoh sohkeijin aga paimang jengin ahi.
16 Aman Pakai ahounau maicham jong chu asemphan ahi. Hiche chunga chun chamna thilto leh thangvahna thilto abol'in ahi. Aman Judah mipi te chu Pakai, Israel Pathen chu nahou diu ahi tin thu apen ahi.
17 Ahinlah mipi ho chun munsang dunga pumgo thilto chu achepi jing nalaijun, ahivangin Pakai a Pathen'u kom'a bou abol tauvin ahi.
18 Manasseh in anabol jouse, Pathen henga ataona, themgao hon Pathen min'a akoma thu aseihou abonchan Israel Lengte Thusimbu a akijhlut sohkeijin ahi.
19 Lengpa taona leh Pathen'in adonbutna alung ahin hei masanga achonsetna ho jouse le thilse abol ho, namdang pathen houna le adoihou mun chom-chom'a atundoh ho jouse chu Themgao Ho Lekhabua akijihlut in ahi.
20 Manasseh athi phat in khopi sungah avuijun achapa Amon in lengmun alotan ahi.
Judah Gam'a Amon Vaihop
21 Amon chu Judah gam'a leng ahung chan chun kum somni le ni alhing tan ahi. Ama hin Jerusalem'a kumni aleng changin ahi.
22 Ama apa Manasseh bangin Pakai dounan achonse tan, aman apan anahou doiho chu ana houvin ahi.
23 Ahinlah apa bangin Pakai anga kisuhnemna anabol pon apa sangin chonset ana habol jon ahi.
24 Amon noija natong lamkai ho chu ana kihoutoh un leng inpi sunga chun ana that tauvin ahi.
25 Judah mipi ten Amon that ho chu ana that doh un achapa Josiah chu leng ana chansah un ahi.